Yelemiya 31 - Chiyawo Bible

Kuwujila kwa Aisalaeli kumangwawo

¹ AMBUJE* akuŵeceta kuti, “Ndaŵi jikwisa jele jitinjiŵa Mlungu jwa maŵasa gosope ga Aisalaeli, nipo jemanjajo taciŵa ŵandu ŵangu.

² Maloŵe ga AMBUJE ni aga gakuti: Ŵandu uŵakulupwice ku ngondo, nasalalile mtima mcipululu, pa ndaŵi jele Aisalaeli jiŵasakaga kupumula.

³ Une nawonecele kwa jemanjajo ndili pakutalika. Une namnonyele jemanja ni cinonyelo cangali mbesi, mbele ndili jwakulupicika kwa jemanja mpaka sambano jino.

⁴ Tinjimsamalila soni jemanja ŵandu ŵa ku Isalaeli, myoyo timcisimana cenene. Timcisengwa soni pakwimba tugoma nipo timcijawula nawo pampepe ŵandu ŵakuŵina mwalukondwa.

⁵ Timcilima soni migunda ja mipeleya pa matumbi ga ku Samaliya. Alimi tacipanda mipeleya nipo tacilya yisogosi yakwe.

⁶ Tiliciyika lisiku lyele acilonda ŵa pa matumbi ga Efelemu litacigumila acitiji kuti, ‘Kwende, tujawule ku Siyoni* kwa AMBUJE, Mlungu jwetu.’ ”

⁷ AMBUJE akuŵeceta kuti, “Mjimbe mwakwesya ni mwa lukondwa ligongo lya Yakobo.* Gumilani ligongo lya mtundu wakupunda mitundu josope. Lalicilani, mwalumbeni ni kwenesya kuti, ‘AMBUJE akulupwisye ŵandu ŵakwe, akulupwisye wosope ŵakusigala Aisalaeli.’

⁸ Tinjakoposya jemanjajo kutyocela kumpoto. Tinjasonganya kutyocela kumbesi kwa cilambo capasi. Tinjasonganya soni ŵatatale ni ŵalemale, acakongwe ŵakwete misigo ni ŵele ŵali ciŵandika kuŵeleka. Tiliciŵa likuga lyekulungwa lya ŵandu ŵakuwujila akuno.

⁹ Taciwujila kumangwawo ali mkulila, nambo une tinjapecesya ni mtima wacanasa. Tinjalongolela ku sulo syegumbale ni mesi. Ngisakuŵala, mwakuti litala lyawo tiliciŵa lyakusalala mnope. Une ndili mpela babagwe Isalaeli, nipo kuti Efelemu ali mwanangu jwandanda.”

¹⁰ AMBUJE akuŵeceta kuti, “Jemanja ŵandu ŵa mitundu josope, mumbikanile une, ni kulalicila maloŵe gangu ku yilambo yakwakutalika mungulugulu nyasa. Mlungu juŵapwilingenye Aisalaeli tacasonganya soni. Tacasamalila mpela mwakusamalila mkucinga yilangwa yakwe.

¹¹ AMBUJE awombwele lukosyo lwa Yakobo. Ŵakulupwisye mu yisawusyo yele ngimkanakomboleka kopokamo.

¹² Ŵanduwo taciyika ali mkwimba mwakugumila pa matumbi ga Siyoni, taciŵa ŵakusangalala mnope ligongo lya yambone yejinji yakutyocela kwa AMBUJE. Yindu yamboneyo ni ayi: tiligu, finyo, mawuta, ŵanace ŵangondolo ni ŵanace ŵa ngo'mbe. Umi wawo tiwuciŵa mpela mgunda wakwitililidwa, nambo soni ngisapikana canasa.

¹³ Ŵali taciŵina mwa lukondwa, acacanda ni ŵali ŵakwe tacisangalala. Kulila kwawo kula tinjikutenda kuŵa lukondwa. Tinjasangalasya, kwasengwasya, ni kutyosya canasa cawo.

¹⁴ Ŵakutaga mbopesi tinjalisya cakulya cambone, nipo ŵandu ŵangu tacijikuta yindu yambone ni kukwanilisya yakusoŵa ya ŵandu ŵangu. Une AMBUJE mbecete myoyo.”

Canasa ca Mlungu pa Aisalaeli

¹⁵ AMBUJE akuŵeceta kuti, “Pikanani kulila kukupikanika kutyocela ku Lama, kulila kwakwe kuli kwakutesya canasa. Lakelo akulilila ŵanace ŵakwe. Akukana kwamyalasya, ligongo lyakuti ŵanace ŵakwe asoŵile.”

¹⁶ Mlece kulila kwenu, ni mpukute misosi jenu. Timcipocela mbote ja masengo genu, Ŵandu taciwuja kutyocela ku cilambo ca amagongo.

¹⁷ Sambano cikulupi cipali pa ya msogolo, yisukulu yenu tiyiciyika soni ku cilambo cawo cino.

¹⁸ “Ngupikana ŵandu ŵa ku Isalaeli ali mkulila mwakutesya canasa acitiji kuti, ‘Ŵalakwe atupele cilango mpela mwanace jwa ng'ombe jumkinajiganyidwa, nipo uwe tulijiganyisye kupikanila. Atuwusye kuti tupakombole kuwujila, pakuti ŵalakwe ali AMBUJE, Mlungu jwetu.

¹⁹ Sambano pakuti tugalawice mitima, tukupikana canasa. Sambano pakuti tulijiganyisye, tukuliputa pa mtima, tutesile soni nipo tunyalayisidwe, ligongo lyakuti twatesile ulemwa* pitwaliji acacanda.’

²⁰ “Isalaeli m'mwejo mli mwanangu jwa pa mtima, jweleju jungusasengwa najo mnope. Ndaŵi josope pingusamjamuka, ngusinamkumbucila ni cinonyelo, mwakuti mtima wangu ukusamganicisyape. Tinjimtendela canasa.

²¹ Mliŵicile mwacimsyene yimanyisyo ni yikwangwali. Mwulolecesye cenene msewuwo, wele umwapitile pakwawula. Mwujilani jemanja ŵandu ŵa ku Isalaeli, ujilani ku misinda jenu jila.

²² Ana timciŵa ŵakayicila mpaka cakaci, jemanja ŵandu ŵangali cikulupi? Une mbanganyisye cindu casambano pa cilambo capasi: Pakuti jwamkongwe ni jwakusatanda kusosasosa jwamlume.”

Kwenda yindu cenene kwa ŵandu ŵa Mlungu

²³ AMBUJE Ŵamaciligosope, Mlungu jwa Aisalaeli akuŵeceta kuti, “Pandaŵi jitinjiwucisya soni mtendele kwa ŵandu, ku cilambo ca Yuda ni misinda jakwe tikucipikanika soni maloŵe, gele gitigacitiji kuti, ‘AMBUJE ampe upile m'mwe malo ga cilungamo, nambo soni m'mwe litumbi lyeswela.’

²⁴ Ŵandu tacitama ku Yuda ni ku misinda jakwe, pamo ni anamalima ni ŵakucinga yilangwa.

²⁵ Pakuti une tinjipeleka macili gasambano kwa ŵandu ŵangali macili, soni tinjalisya ŵandu ŵa sala nipo tacijikuta.

²⁶ Myoyo ŵandu taciti, ‘Napite kugona ni njimwice ni macili.’

²⁷ “Une AMBUJE nguŵeceta kuti jikwisa ndaŵi jitinjiculuya ŵandu ni yilangwa mu Isalaeli ni mu Yuda.

²⁸ Mpela munasamalile jemanjajo, kwacuŵa, kwapasulanya, kwagumula, kwajonanga ni kwatenda yakusakala, myoyo soni tinjisamala kuti nataŵe ni kwapanda soni.

²⁹ Pitijiciyika ndaŵi jelejo ŵandu ngasaŵeceta soni kuti, ‘Acinangolo alile yisogosi ya mpeleya yangajiwula, nambo ŵanace ni ŵatesile cikawu.’

³⁰ M'malo mwakwe ŵele ŵalile mpeleya wangajiwula meno gawo tigatende cikawu; soni jwalijose taciwa ligongo lya ulemwa wakwe.”

³¹ AMBUJE akuŵeceta kuti, “Ndaŵi jikwisa jitinjitenda cilanga* casambano ni ŵandu ŵa ku Isalaeli ni ku Yuda.

³² Cilangaco ngasiciŵa mpela cilanga cinatesile ni acinangolo ŵenu cila, pa ndaŵi jinakamwisye jemanjajo kwakoposya mcilambo ca Iguputo. Jemanjajo ŵakasile cele cilangaco, atamose kuti naliji mbuje gwawo.

³³ Nambo cilanga citinjitenda ni ŵandu ŵa ku Isalaeli paticigamala masiku gelego ni aci: Tinjiŵika malamusi gangu mwa jemanjajo, mwakuti tinjitenda kugalemba m'mitima mwawo. Myoyo une tinjiŵa Mlungu jwawo, nipo jemanjajo taciŵa ŵandu ŵangu.

³⁴ Pandaŵi jelejo jwine ngasalajila soni kumjiganya mlongo mjakwe kuti ŵamanyilile AMBUJE. Pakuti wosopewo, ŵanace ni acakulungwa ŵakwe ŵamanyilile, nipo tinjakululucila ulemwa wawo, mwakuti ngisinawukumbucila soni. AMBUJE akuŵeceta myoyo.”

³⁵ AMBUJE akuŵeceta soni kuti ngusaŵalisya lyuŵa musi, soni ngusaŵalisya mwesi ni ndondwa cilo. Jwalakwejo ni jwakusajitendekasya nyasa kuti jikukume, lina lyakwe lili AMBUJE Ŵamaciligosope.

³⁶ Naga yeleyi yikutendekwa tiyilece, une ndili papopo, pelepo ni pitiwucimala mtundu wa Aisalaeli, nipo ngasiwuŵa soni mtundu wa ŵandu pameso pangu mpaka kalakala.

³⁷ Akagambe kusimanikwa mundu jwakupakombola kupima kwinani, ni kuwungunya yilimbilimbi ya cilambo capasi, pelepo ni kuti une tinjilujasa lukosyo losope lwa Aisalaeli, ligongo lya yakusakala yosope yiŵayitesile. Une AMBUJE nguŵeceta myoyo.

³⁸ AMBUJE akuŵeceta soni kuti, “Ndaŵi jikwisa, jele msinda wa AMBUJE ula tiwucitaŵidwa kutyocela ku Sanja ja Hananele mpaka ku Cipata ca Ndumba.

³⁹ Kutyocela pelepo malile gakwe tigacipelenganya mpaka Kwitumbi lya Galebu, ni kukotela kulola ku Gowa.

⁴⁰ Ciŵata cosope kwakusajasila mitembo ni liwu, nambo migunda josope kutyocela ku Lusulo lwa Kidiloni mpaka pa ndumba ja Cipata ca Haci cakungopoko lyuŵa, yosopeyo tiyiciŵa yakusaguka yapadela ya AMBUJE. Msinda wa Yelusalemu ngasiwujonanjidwa soni kapena kugwisidwa.”