Yelemiya 30 - Chiyawo Bible

Yilanga ya AMBUJE kwa ŵandu ŵakwe

¹ AMBUJE* ŵasalile Yelemiya kuti,

² Une AMBUJE, Mlungu jwa Aisalaeli, nguŵeceta kuti: “Mlembe m'buku yosope yene yinamsalile.

³ Ndaŵi jikwisa jakuti tinjawucisya ŵandu ŵangu Aisalaeli ni Ayuda, ku cilambo cinapele acinangolo ŵawo, nipo ticiciŵa cawo.”

⁴ Maloŵe gakusala ya Isalaeli ni Yuda ni aga:

⁵ “Mbikene kulila kwakudandawulisya, kuwuwula kwa woga soni pangali mtendele palipose.

⁶ Mwusye kuti mpate umanyilisi, Ana mundu jwamlume mpaka apakombole kuŵeleka mwanace? Nambi ligongo cici ngumwona mundu jwamlume jwalijose ali akamwile makono pa lutumbo mpela jwamkongwe pa ndaŵi jakwe jakuŵeleka? Ana ligongo cici ngope syosope sigwile?

⁷ Kongwene! Lisiku lyakogoya likwisa; lyelelo ngaŵa mkuliwanicisya ni lisiku line lililyose; ngasipapagwa lisiku line lililyose lyakulandana nalyo. Tijiciŵa ndaŵi ja yisawusyo kwa Yakobo,* nambope tacikulupuka ku yisawusyoyo.”

⁸ AMBUJE Ŵamaciligosope Mlungu jwa Aisalaeli akuŵeceta kuti, “Pa lisiku lyelelo tinjiposokolanya likongwa lya ukapolo mlukosi mwawo, tinjikutula ngonji sisyataŵile. Aisalaeli ngasaŵa soni acikapolo kapena ŵandu ŵa cilendo.

⁹ Tacigamba kwatumicila AMBUJE, Mlungu jwawo, ni Daudi,* mwenye jwawo, jwele jutinjasagulila.” Myoyo AMBUJE akuŵeceta kuti,

¹⁰ “Mkatenda woga, m'mwe jwakutumicila jwangu Yakobo, jemanja Aisalaeli mkajasa mtima. Tinjimkulupusya kutyocela ku cilambo cakwakutalika. Tinjikulupusya soni yisukulu yenu kutyocela ku cilambo kwali mu ukapolo. Jemanja wosope timciwujila soni, timcitama ni mtendele soni ngasipapagwa jwakumjogoya.

¹¹ Une ndili ni jemanja, nipo tinjimkulupusya. “Tinjijonanga mitundu josope ja ŵandu kunampwilinganyicisye, nambo une ngisinimjonaga kwakumalilatu. Tinjimpa cilango pakukuya cilungamo, ngisinimlecelela ngampa cilango. Une AMBUJE mbecete myoyo.”

¹² AMBUJE akuŵeceta ni ŵandu ŵakwe kuti, “Yilonda yenu yili yangapola, soni maŵanga genu gagamba kusulula mesi.

¹³ Pangali jwa mpaka apakombole kumŵicila kunyuma pa magambo genu. Pangali mtela wakuposya liŵanga lyenu. Pangali mtela wakuposya ulwele wenu.

¹⁴ Ŵakunonyelwa ŵenu wosope amliŵalile, ngakumtendela soni masengo. Nimpele cilango mwa ngalwe, pakuti magambo genu gali gekulungwa, ulemwa* wenu uli wejinji.

¹⁵ Ana ligongo cici mkudandawula nalyo liŵanga lyenu? Liŵanga lyenu ngaŵa mkupola, magambo ni ulemwa wenu yili yekulungwa, ali ni ligongo lyakwe nimtesile yeleyi.

¹⁶ Sambano wosope uŵamjonasile jemanja, nombe nawo tinjajonanga. Wosope ŵakumlagasya tinjajigala kwawula nawo ku ukapolo. Wosope ŵakujigala yindu yenu mwakusumula, nombe nawo yindu yawo tiyicisumulidwa. Wosope ŵakumjonanga jemanja, tinjitenda yindu yakuti nombe nawo ajonanjidwe.

¹⁷ Tinjimtenda jemanja kuŵa cenene, tinjiposya liŵanga lyenu, atamose amagongo ŵenu aŵecete kuti, ‘Jemanja ŵandu ŵa ku Siyoni* mli ŵakusa, ŵangali ŵakwasamalila.’ Une AMBUJE mbecete.”

¹⁸ AMBUJE akuŵeceta kuti, “Tinjawucisya soni ŵa mwiŵasa lya Yakobo ku cilambo cawo. Tinjilosya soni cinonyelo cangu ku malo gakwe gosope. Msinda wa Yelusalemu ula tiwucitaŵidwa soni pa masame gakwe palapala. Nyumba ja ucimwene tijicitaŵidwa soni pa malo gakwe.

¹⁹ Ŵanduwo tacijimba nyimbo syakwalumba AMBUJE, nipo tipacipikanika masegwe ga lukondwa. Tinjatupiya, mwakuti ngasaŵa ŵakuŵalanjika soni. Tinjapa ucimbicimbi, mwakuti ŵane ngisiŵanyosya soni.

²⁰ Ŵanace ŵawo taciŵa soni mpela muŵaŵelele kalakala. Mpingo wawo wosope tinjiwutamilisya soni namsyene. Tinjipeleka cilango kwa wosope ŵakumlagasya.

^21-22 Jwakwalamulila taciŵa jumo jwa jemanjajo, mlongola jwawo tacityocela pasikati pawo. Une tinjimwutila jwalakwejo ciŵandika ni une, nipo jwalakwejo taciŵandikana ni une. Ana ŵani ŵampaka alimbe mtima pajikape kuti aŵandikane ni une? Myoyo jemanja timciŵa ŵandu ŵangu, nipo une tinjiŵa Mlungu jwenu. Une AMBUJE mbecete.”

^23-24 Mlole mbungo jamacili ja AMBUJE! Mbungo jamacili ja cimbunga, jikupuga pa mitwe pa ŵandu ŵakulemwa. Lutumbilo lwa AMBUJE ngasilutyoka mpaka luli lumasile kutenda yosope yiwukusaka mtima wa AMBUJE. Timcipikanicisya cenene yeleyi masiku gakwisaga.