Yelemiya 3 - Chiyawo Bible

Ŵandu ŵa ku Isalaeli ŵangakulupicika

¹ AMBUJE* akuti, “Naga jwamlume akumleka ulombela jwamkongwe, kaneko jwamkongwejo ni kutyoka kuja kulombedwa ni jwamlume jwine, ana jwamlume jwandanda jula ali jwakomboleka soni kumjigala jwamkongwejo? Ana naga akutenda myoyo ngaŵaga kuti pelepo ni kuti cilambo cisakasidwe mnope? Sambano jemanja ŵandu ŵa ku Isalaeli, mtesile lilama ni maganja genu gejinji. Ana mpaka komboleka kuwujila soni kwa une?

² Mlole kwinani kwa matumbi. Ana pana malo gimkinimtendelapo cikululu? Mwatamaga mungulugulu litala, kwembecela maganja genu, mpela Mluya jwakutama mcipululu kwembeceya kwaswamba ŵa pa ulendo. Msakesye cilambo ni ndamo syenu syakusakala sya cikululu.

³ Ali ni ligongo lyakwe AMBUJE ŵalekasisye ula, mwakuti atamose ula ja m'masika nganijiyika. Nambo uwonece wenu wosope uli wa jwamkongwe jwalilama, nginimkola soni amta panandi.

⁴ “Ana ngati sambano mŵele mli mkumsalila kuti, ‘M'mwejo mli Atati ŵangu, soni mwanonyele kutyocela ndili likandi.

⁵ Ana AMBUJE tacimbila mtima mpaka cakaci? Ana tacitumbila mpaka cakaci?’ Amu ni mumwaŵecetelaga. Nambope m'mwejo mwapelengenye kutenda yakusakala mpela mumwapakombolele.”

Isalaeli ni Yuda akwenela kupitikuka mtima

⁶ Yosiya piŵaliji mwenye, AMBUJE ŵambusisye kuti, “Ana myiweni yatesile Isalaeli jwangakulupicika jula? Ŵakwelaga kuja petumbi soni ŵajaga pasi pa yitela yakutenjela mnope kukulambila. Mwakuti kweleko ŵatendagako ya lilama.

⁷ Naganisyaga kuti pitamale kutenda yosope yeneyi, taciwujilila, nambo nginawujilila. Sambano Yuda, mlongo mjakwe jwangakulupicika jula ŵayiweni yeleyo.

⁸ Ŵaweni kuti Isalaeli jwangakulupicika jula umasile ulombela ligongo lya cikululu cakwe. Nambope Yuda, mlongo mjakwe, nginajogopa. Jwalakwejo jwaŵele jwangakulupicika, jwajile kutenda ya lilama.

⁹ Lilama lya Isalaeli lyaliji lyakutesya soni, mwakuti pakumalisya pakwe ŵasakesye cilambo. Ŵatesile yakusakala pakulambila milungu jine jakupanganyidwa ni maganga ni yitela.

¹⁰ Nambo piŵatesile yosope yeneyi, Yuda mlongo mjakwe jwangakulupicika jula nganawujila soni kwa une ni mtima wosope, nambo mwagamba kulambusyape, akuti myoyo AMBUJE.”

¹¹ AMBUJE ŵasalile soni kuti, Isalaeli jwangakulupicika jula kugatanda kwakwe magambo kukusaŵa kwapanandi, kulekangana ni Yuda jwangakulupicika jula.

¹² Ŵasalile kuti njawule ku cilambo ca Isalaeli ngalalicile utenga awula wakuti, “M'mwe Isalaeli ŵangakulupicika, mwujile,” akuti myoyo AMBUJE. Une ndili ciŵela jwa canasa soni ngasinimtumbilila, mpaka kalakala.

¹³ Mgambe kwiticisya kulemwa kwenu, mjiticisye kuti mwalemwecesye AMBUJE Mlungu jwenu, kuti mwalambile nawo milungu ja cilendo, pasi pa yitela yakutenjela, nambo soni kuti nginimpikanila maloŵe gangu. Une AMBUJE mbecete myoyo.

¹⁴ “Mwujile jemanja ŵandu ŵangakulupicika, pakuti mbuje gwenu ni une. Tinjimjigala kwawula ni namwe ku Siyoni,* jumo kutyocela ku msinda uliwose, soni ŵaŵili kutyocela ku liŵasa lililyose.

¹⁵ Kweleko tinjimpa ŵakucinga ŵakusambikanila une. Jemanjajo tacimlongolela mwa lunda ni mwa umanyilisi wosope.

¹⁶ Pitimcitupa masiku gelego mcilambomo, ŵandu ngisaŵeceta soni ya Libokosi lya Cilanga ca AMBUJE. Ngasaliganicisya kapena kulikumbucila, kapena kulisoŵa, nipo ngasapanganya soni line.

¹⁷ Pa ndaŵi jelejo Yelusalemu tacikolanjidwa ‘Citengu ca Ucimwene ca AMBUJE,’ mitundu josope ja ŵandu tijicisongana kulicimbicisya lina lya AMBUJE. Ngasakanilila kujikuya mitima jawo jakusakala.

¹⁸ Masiku gelego lukosyo lwa Yuda tilucilumbikana ni lukosyo lwa Isalaeli. Wosope ŵene tacityocela ku cilambo ca kumpoto kwawula ku cilambo cinapele acinangolo ŵawo kuti ciŵe cawo.”

Ungakulupicika wa ŵandu ŵa Mlungu

¹⁹ AMBUJE akuŵeceta kuti, “M'mwe Isalaeli, nganonyele kumtamika sikati ja ŵanace ŵangu ni kumpa cilambo cambone, cakupata cambone mnope kupunda yilambo yine ya mitundu jine ja ŵandu. Naganisyaga kuti timcingolanga kuti ‘Atati,’ nambo soni ngasimleka kunguya.

²⁰ Nditu, mpela mwakusatendela jwamkongwe jwangakulupicika, m'mwejo soni mŵele ŵangakulupicika kwa Une,” akuti myoyo AMBUJE.

²¹ Pakupikanika maloŵe penani pa matumbi, Aisalaeli akulila nipo akuŵenda canasa, pakuti akuyisye matala gakusakala, nambo soni ŵaliŵalile AMBUJE, Mlungu jwawo.

²² Mwujile kwa une jemanja ŵandu ŵangu ŵangakulupicika, Tinjimposya kuti mŵe ŵakulupicika. Mkusaŵeceta kuti, “Elo, tukwisa kwa wawo AMBUJE, ligongo ŵalakwe ali Mlungu jwetu.

²³ Kulambila penani pa matumbi kwangakamucisya, soni kutenda yindimba pa matumbi kwangali masengo. Yisyene, mwa AMBUJE, Mlungu jwetu ni mwele mucili cikulupusyo ca Isalaeli.

²⁴ Kutyocela pandanda pa mtundu wetu, Baala,* mlungu jwakutesya soni jula, aŵele ali mkutujonanjisya cakupata pa masengo ga acinangolo ŵetu ni ng'ombe syawo, ŵanace ŵawo ŵacalume ni ŵacakongwe.

²⁵ Sambano kwende tugone pasi mwa soni, soni kunyosyeka kwetu kutusise. Paja twalemwisye pamo ni acinangolo ŵetu, kwalemwecesya AMBUJE Mlungu ŵetu, kutandila tuli ŵanace mpaka lelo jino. Nganitupikanila maloŵe ga AMBUJE Mlungu jwetu.”