Yelemiya 29 - Chiyawo Bible

Cikalata cakuja kwa Ayuda uŵaliji ku ukapolo ku Babiloniya

¹ Yelemiya ŵalembile cikalata pa ndaŵi jiŵaliji ku Yelusalemu nipo ŵacitumisye kwa acimlongola uŵaliji mu ukapolo, kwa ŵakutaga mbopesi, ŵakulocesya, ni kwa ŵandu ŵane wosope ŵele Nebukadinesa ŵajigele ku Yelusalemu kuja nawo ku ukapolo ku Babiloniya.*

² Yeleyi yatendekwe pa ndaŵi jakuti Yehoiyakini ni mamagwe, nduna sya mwenye ni acakulungwakulungwa wa ku Yuda ni ku Yelusalemu, kwisa soni acimisili ni afundi pa ndaŵi jiŵaliji ali atyosile ku Yelusalemu.

³ Cikalataco ŵampelele Eliyasa mwanace jwa Shafani pa yala, ni Gemaliya mwanace jwa Hilikiya, jwele Sedekiya mwenye jwa ku Yuda uŵatumsye kwa Mwenye Nebukadinesa jwa ku Babiloniya. Mcikalatamo ŵalembilemo kuti:

⁴ “AMBUJE* akwasalila ŵandu wosope ŵa ku Yelusalemu, uŵajigalidwe kuja ku ukapolo ku Babiloniya kuti,

⁵ ‘Mtaŵe majumba ni mtameje mwelemo. Mlime migunda, ni mlyeje yitimgowoleje mwelemo.

⁶ Mlombele, ni mŵelece ŵanace ŵacalume ni ŵanace ŵacakongwe, ŵanace ŵacakongwewo mwasagulile acalume alombane nawo, kuti nombe nawo aŵelece ŵanace ŵacalume ni ŵacakongwe; mtupe kweleko, ngaŵaga kuti mnandipeje.

⁷ Mpopeleje kuti kuŵeje kwana mtendele ku Babiloniya nambo soni mkamuleje masengo mwakulimbika kuti msindawo ujendelecele kuja msogolo nambo soni jemanja timciŵa pambone.

⁸ AMBUJE Ŵamaciligosope, Mlungu jwa Aisalaeli akuŵeceta kuti, mkakunda kuti ŵakulocesya amlambusye, atamose mwa ŵakulondola cisango ŵali pasikati penu, soni mkapikanila sagamisi syawo.

⁹ Jemanjajo akusalocesyaga ya unami mu lina lyangu, Une ngininatuma jemanjajo.’ ”

¹⁰ AMBUJE akuŵeceta kuti, “Pitiyicimala yaka makumi msano ni gaŵili ku Babiloniya, tinjimjendela ni kutenda yitwatesile cilanga yila, tinjimwucisya ku malo agano.

¹¹ Une ni jungusamanyilila yinamkolocesye jemanja, yakuti timciŵa pambone ngaŵaga pakusakala, kuti mkole cembeceyo cisyesyene pa yamsogolo.

¹² Pa ndaŵi jelejo timcimbilanga ni kwika kukupopela kwa une, nipo une tinjimjanga.

¹³ Timcisosasosa, nipo timcisimana pa ligongo lyakuti timciŵa mli mkusosasosa une ni mtima wenu wosope.

¹⁴ Nguŵeceta kuti timcisimana, nipo une tinjimwucisya ku cilambo cenu pakumsonganya wosope ŵene kutyocela ku yilambo yosope ni ku malo kosope kunamtopocesye une. Tinjimwucisya ku malo kumwaliji pandanda, mkininamtumisye ku ukapolo. Une AMBUJE mbecete myoyo.”

¹⁵ Jemanja mkusaŵeceta kuti, “AMBUJE atupele ŵakulocesya ŵetu ku Babiloniya.

¹⁶ Mpikane yakuŵeceta AMBUJE kwambaga ya mwenye jwakulamulila ucimwene uŵalamulile Daudi* nambo soni ya ŵandu ŵa mu msinda welewu, kwele kuli kuŵeceta kuti, acimjenu ŵa mcilambomo ŵele ŵimkanajigalidwa kwawula ku ukapolo pamo ni jemanja.

¹⁷ AMBUJE Ŵamaciligosope akuŵeceta kuti, ‘Tiyiyikasye ngondo, sala, ni yilwele pa jemanjajo ni tinjatenda jemanjajo kuŵa mpela nguju syewole mnope syakuti ngaŵa mkulilika.

¹⁸ Tinjawulaga ni ngondo, sala ni yilwele yakulekanganalekangana soni tinjasandusya kuŵa cindu cakunyalaya kwa ŵandu ŵa ma ucimwene gosope ga pa cilambo capasi. Taciŵa ŵalwesece ni ŵakutesya woga, ŵakusecesya ni ŵanyosyece sikati ja mitundu josope ja ŵandu kwele kunatopocesye.

¹⁹ Ayi tiyiciŵa myoyo ligongo lyakuti nganapikanila malamusi gangu, une pinaŵele ndili mkwatumicisya ŵakutumicila, ŵakulocesya ŵangu. Nambo jemanja soni nganimpikanila.

²⁰ Ali ni ligongo lyakwe jemanja acikapolo wosope unamjigele kutyoka ku ukapolo ku Yelusalemu kwawula ku Babiloniya, mgapikanile maloŵe ginguŵeceta une AMBUJE.’

²¹ “AMBUJE Ŵamaciligosope, Mlungu jwa Aisalaeli aŵecete yakwamba Ahabu mwanace jwa Kolaya, ni ya Sedekiya mwanace jwa Maaseya, juŵalocesye ya unami kwa jemanja mu lina lya AMBUJEWO. Aŵecete kuti tinjapeleka kwa Nebukadinesa mwenye jwa ku Babiloniya, nipo jwalakwejo tacawulaga jemanja mli kulola.

²² Ligongo lya ŵandu ŵaŵiliwo, mena gawo tacigakolanga ŵandu ŵa ku Yuda ŵakutama ku Babiloniya pakwalwesa acimjawo, Tacijilaga kuti, ‘AMBUJE atende namwe yakomboleka mpela muŵatendele ni Sedekiya ni Ahabu, uŵajocedwe ali cijumi ni mwenye jwa ku Babiloni!’

²³ Ndamo syawo ku Isalaeli syaliji syakusakala, ŵatendaga cikululu ni acakongwe ŵacimsyene, ŵalocesyaga ya unami mu lina lyangu, une mkininalamule. Une nguyimanyilila, komboleka kuyitendela umboni yeleyi, AMBUJE akuti myoyo.”

Cikalata ca Shemaya

²⁴ Shemaya jwa ku Nehelamu mkamsalile kuti,

²⁵ “Maloŵe ga AMBUJE Ŵamaciligosope, Mlungu jwa Aisalaeli gali gakuti: M'mwejo mwatumisye cikalata mu lina lyenu kwa ŵandu wosope ŵa ku Yelusalemu, kwa Sefaniya jwakutaga mbopesi mwanace jwa Maaseya, ni kwa ŵakutaga mbopesi wosope. Mcikalatamo ŵalembilemo kuti:

²⁶ “Mlungu amŵisile m'mwejo Sefaniya, kuti mŵe jwakutaga mbopesi m'malo mwa jwakutaga mbopesi Yehoyada. Amŵisile kuti mŵe kapitawo jwakulolela Nyumba ja AMBUJE. Mumŵiceje m'nyumba ja ukayidi ni kum'weca likongwa mlukosi mwakwe mwa mundu jwalijose jwa masoka jwakusaliganicisya kuti ali jwakulocesya.*

²⁷ Nambi ligongo cici nginimumtenda yeleyi Yelemiya jwa ku Anatoti, jwele jwakusaŵaga mpela jwakulocesya pasikati penu?

²⁸ Uwetu ku Babiloniya kuno, Yelemiya atutumicisye maloŵe gakuti: Ndaŵi jakutama mu ukapolo wenu tijiŵe jelewu mnope. Myoyo mtaŵe majumba gakuti mtamejemo, soni mlime migunda kuti timlyeje yakugowola yakutyocela mwelemo.”

²⁹ Myoyo jwakulocesya Sefaniya ŵaŵalasile cikalataco pameso pa une,

³⁰ kaneko AMBUJE ŵasalile Yelemiya kuti,

³¹ mtumisye utenga kwa acikapolo wosope, mwasalile maloŵe ga AMBUJE gakwamba Shemaya jwa ku Nehelamu, jwalakwejo akuti, Shemaya amlocesyele jemanja, atamose kuti une nganinamtuma jwalakwejo, nipo amlambwisye jemanja kuti mkulupilileje ya unami.

³² Ali ni ligongo lyakwe une AMBUJE nguŵeceta kuti, “Tinjipeleka cilango kwa Shemaya pamo ni yisukulu yakwe. Mwiŵasa mwakwemo pangali mundu jutacitama sikati ja mtundu awuno wa ŵandu, wele ŵitaciyiwona yindu yambone yitinjatendela ŵandu ŵangu, pa ligongo lyakuti jwalakwejo alalicile yakunjimucila une. Une AMBUJE mbecete myoyo.”