Yelemiya 28 - Chiyawo Bible

Yelemiya ni jwakulocesya Hananiya

¹ Mu caka cicoco mwesi wa msano wa caka camcece, Sedekiya ali ajinjile ucimwene wa ku Yuda, Hananiya mwanace jwa Asuli jwakulocesya* jwa ku Gibiyoni ŵaŵecete ni une ku Nyumba ja AMBUJE.* Pandaŵiji ŵakutaga mbopesi ni ŵandu wosope ŵaliji mkupikana, nipo jwalakwejo jwatite kuti,

² AMBUJE Ŵamaciligosope, Mlungu jwa Aisalaeli akuŵeceta kuti, “Mbosokwele likongwa lya ukapolo lya mwenye jwa ku Babiloniya.

³ Mkiniyimale yaka yiŵili, tinjiwucisya yida yosope ya ku Nyumba jangu ku malo agano, yele Nebukadinesa, mwenye jwa ku Babiloniya yiŵayityosisye kwawula nayo ku Babiloniya.

⁴ Tinjimwusya soni ku malo agano Yekoniya mwanace jwa Yehoiyakimu mwenye jwa ku Yuda. Tinjawusya acikapolo wosope ŵakutyocela ku Yuda uŵajigalidwe ukapolo kuja ku Babiloniya. Pakutenda myoyo tinjiposokola likongwa lya ukapolo lya mwenye jwa ku Babiloniya.”

⁵ Pelepo jwakulocesya Yelemiya ŵamjanjile jwakulocesya Hananiya pameso pa ŵakutaga mbopesi ni ŵandu wosope uŵaliji m'Nyumba ja AMBUJE, Jwalakwejo jwatite kuti,

⁶ “Yiŵe myoyo! AMBUJE atende kwene iyoyo. AMBUJE atende yalocesye, pakuwucisya yida ya ku Nyumba jakwe ni acikapolo wosope ku malo agano kutyocela ku Babiloniya.

⁷ Nambo mpikane yitinimsalile m'mwejo pamo ni ŵandu wosope.

⁸ Ŵakulocesya uŵapali kalakalako ŵalocesyaga ya ngondo, ya sala, ni ya yilwele yakulekanganalekangana, yaticiyika pa yilambo yejinji ni ma ucimwene gakupikanika.

⁹ Nambo naga jwakulocesya akulocesya yakwayana ni mtendele ni kusimanika kuti yalocesyeyo yitendekwe, pelepo tiyicimanyika kuti jwalakwejo atumidwe ni AMBUJE.”

¹⁰ Pelepo, jwakulocesya Hananiya jwatyosisye likongwa mu lukosi mwa Yelemiya ni kuliposokola.

¹¹ Ŵasalile ŵandu wosope kuti, “AMBUJE akuŵeceta kuti, ‘Amu ni mutinjiposokolela likongwa lya ukapolo lya Nebukadinesa mwenye jwa ku Babiloniya. Tinjilityosya mlukosi mwa ŵandu ŵa mitundu josope mkiniyimale yaka yiŵili.’ ” Yili yitite myoyo jwakulocesya Yelemiya jwatyosile.

¹² Jili jipite ndaŵi panandi Hananiya ali aposokwele likongwa mu lukosi mwa Yelemiya, AMBUJE ŵamsalile Yelemiya kuti,

¹³ “Mjawule mkasalile Hananiya maloŵe ga AMBUJE gakuti, ‘M'mwejo mposokwele likongwa lya citela, ni myoyo m'malo mwakwe une tinjiŵika likongwa lya cisyano m'malo mwa lya citelalyo.

¹⁴ AMBUJE Ŵamaciligosope, Mlungu jwa Aisalaeli, akuŵeceta kuti, Mbisile likongwa lya cisyano mungosi sya ŵandu ŵa mitundu josope jeneji, kuti amtumicileje Nebukadinesa, mwenye jwa ku Babiloniya. Tacimtumicila jwalakwejo kusyesyene, soni nimpele ulamusi atamose pa yinyama yamwitinji.’ ”

¹⁵ Sambano Yelemiya ŵamsalile Hananiya kuti, “Mpikane, m'mwe Hananiya, AMBUJETU, nginamtuma, soni m'mwejo mwalambwisye ŵanduŵa kuti apikanileje yakulocesya ya unami.

¹⁶ Ali ni ligongo lyakwe AMBUJE akuŵeceta kuti, ‘Mkalamuce, tinjimtyosya pa cilambo capasi. Tim'we caka acino mkinicimale, ligongo lyakuti mŵele mli mkulalicila yakwajimucila AMBUJE.’ ”

¹⁷ Yatendecekwe myoyo kuti jwakulocesya Hananiya ŵawile caka cicoco, pa mwesi wa msano ni jiŵili.