Yelemiya 27 - Chiyawo Bible

Yelemiya akuwala likongwa

¹ Pandaŵi jele Sedekiya mwanace jwa Yosiya mwenye jwa ku Yuda jiŵatandite kulamulila, AMBUJE* ŵaŵecete ni Yelemiya ni kumsalila kuti,

² “Mjigale ngonji sya mapende ni makongwa ga yitela ni mlitaŵe mu lukosi mwenu.

³ Kaneko mtumisye utenga kwa ayimwene ŵa ku Edomu, ku Mowabu, ku Amoni, ku Taya ni ku Sidoni, kupitila mwa ndumetume syayice ku Yelusalemu kuno kukumlola Sedekiya mwenye jwa ku Yuda.

⁴ Mwasalile kuti akamanyisye acimlongola ŵawo kuti AMBUJE Ŵamaciligosope, Mlungu jwa Aisalaeli, akwasalila acimlongolawo kuti:

⁵ Napanganyisye cilambo capasi ni macili ni kulimbangana kwangu. Napanganyisye soni ŵandu ni yinyama pa cilambo capasi, ni ngusacipeleka kwa jwele jungumwona kuti ali jwakuŵajilwa.

⁶ Sambano mbelece yilambo yosopeyi kwa Nebukadinesa jwakutumicila jwangu, mwenye jwa ku Babiloniya, soni napele yinyama ya mwitinji kuti yimtumicileje jwalakwejo.

⁷ Ŵandu ŵa mitundu josope tacimtumicila jwalakwejo, mwanace jwakwe cisukulu cakwe, mpaka pitijiciyika ndaŵi jakuti cilambo cakwe cijonanjidwe. Pelepo cilambo cakwe ticicitumicila yilambo yamacili mnope ni ayimwene ŵamacili mnope.

⁸ “Nambo naga ŵandu ŵa mtundu wine uliwose kapena cilambo cine cilicose akukana kumtumicila Nebukadinesa kapena kulipeleka pasi pa ulamusi wakwe, Uneji tinjapa cilango pakwatumicisya ngondo, sala, yilwele yakulekanganalekangana, mpaka ndili napelece myala mwakwe kwakumalilatu.

⁹ Myoyo mkasimwapikanila ŵakulocesya ŵenu, ŵacisango ŵenu, ŵakugopolela sagamisi, ni ŵakutenda ya matipwi, acimsalilaga kuti mkasimumtumicila mwenye jwa ku Babiloniya.

¹⁰ Jemanjaji akusamlambusya jemanja, ni cakulinga cakuti amagongo ŵenu amtyosye jemanja mcilambo cenu, ni kumjawusya kwakutalika. Tinjimtoposya nipo timcijonasika.

¹¹ Nambo mtundu wine uliwose, wele utucitenda yakusaka ya mwenye jwa ku Babiloniya ni kumtumicilaga, tinjiwuleka kuti utameje mcilambo mwakwe, kuti ulimeje, ni kutamaga kukoko. Une AMBUJE mbecete myoyo.”

¹² Namsalile soni Mwenye Sedekiya jwa ku Yuda maloŵe gagaga kuti: “Mlipelece ku ulamusi wa mwenye jwa ku Babiloniya ni kumtumicilaga myoyo pamo ni ŵandu ŵakwe. Naga mkutenda myoyo, timciwukulupusya umi wenu.

¹³ Ana ligongo cici kuti m'mwejo ni ŵandu ŵenu mkuwa ligongo lya ngondo, sala ni yilwele? Yeleyi ni yatite AMBUJE kuti tiyicitendekwa kwa mtundu uliwose wele ungakulipeleka kwa mwenye jwa ku Babiloniya.

¹⁴ Mkasimwapikanila ŵakulocesya uŵatite kuti jemanja ngasimumtumicilaga mwenye jwa ku Babiloniya, pakuti jemanjajo akulocesya mwa unami.

¹⁵ Une ngininatuma jemanjajo, atamose kuti jemanjajo akulambusya kuti akulocesya mu lina lyangu. Ligongo lya yeleyi, tinjimtoposya, nipo timcijonasika jemanja pamo ni ŵakulocesya ŵakusala ya unamiyi.”

¹⁶ Kaneko nasalile ŵakutaga mbopesi pamo ni ŵandu ŵane wosope kuti: “Mkasimwapikanila ŵakulocesya ŵenu ŵakumsalila kuti, ‘Yida ya ku Nyumba ja AMBUJE taciyiwusya soni mwacitema kutyoka ku Babiloniya.’ Jemanjajo akumlambusya jemanja.

¹⁷ Mkasimwapikanila jemanjajo. Mlipelece kwa mwenye jwa ku Babiloniya ni timcitama ni umi. Ana ligongo cici msindawu ukuŵa masame?

¹⁸ Naga jemanjajo ali ŵakulocesya ŵasyesyene soni naga akwete maloŵe ga AMBUJE, apopele kwa AMBUJE Ŵamaciligosope kuti yida yiyasigele m'Nyumba ja AMBUJE nambo soni ku nyumba ja mwenye jwa ku Yelusalemu yikajigalidwa kwawula ku Babiloniya.”

¹⁹ AMBUJE Ŵamaciligosope akuŵeceta ya yipilala, tanki ja mesi, yipaka ni yida yosope yiyasigele mu msindamu,

²⁰ yele Mwenye Nebukadinesa mwenye jwa ku Babiloniya nganayijigala, pa ndaŵi jiŵamjigele ukapolo Yekoniya mwanace jwa Yehoiyakimu mwenye jwa ku Yuda, kutyoka ku Yelusalemu kuja ku Babiloniya pamo ni acimlongola ŵa ku Yuda ni ŵa ku Yelusalemu.

²¹ Gelega gali maloŵe ga AMBUJE Ŵamaciligosope gakwamba yida yiyasigele m'Nyumba ja AMBUJE, m'nyumba ja mwenye jwa ku Yuda nambo soni mu Yelusalemu gakuti,

²² “Jemanjajo tacijigalidwa kwawula ku Babiloniya nipo tacitama kukoko mpaka pa ndaŵi jitinjiyikumbucila soni. Pelepo tinjiyijigala soni ni kuyiwucisya ku malo agano. Une AMBUJE mbecete myoyo.”