Yelemiya 26 - Chiyawo Bible

Kutaŵidwa kwa Yelemiya

¹ Pandaŵi jele Yehoiyakimu, mwanace jwa Yosiya mwenye jwa ku Yuda, piŵatandite kulamulila, AMBUJE* ŵasalile Yelemiya kuti,

² “Mkajime mu luŵala lwa Nyumba ja AMBUJE. Kweleko mkaŵecete ni ŵandu wosope ŵakutama m'misinda ja ku Yuda, ŵakusaja kulambila ku Nyumba jelejo. Mkasalile jemanjajo yosope yene yinamlamwile kuti mkaŵecete ngaleka kandu kane kalikose.

³ Mwine mwakwe komboleka kuti tacipikanila, nipo jwalijose tacileka kutenda ulemwa* wakwe. Myoyo ngasinapa jemanjajo cilango cinatite kuti nape, ligongo lya masengo gawo gakusakala.”

⁴ Mkasalile jemanjajo kuti, AMBUJE akuŵeceta kuti, “Naga ngimkumbikanila une, soni naga ngimkukuya malamusi ginampele

⁵ soni naga ngimkugapikanila maloŵe ga ŵakulocesya, ŵakundumicila ŵangu, ŵimbele ndili mkwatuma kwa jemanja, atamose kuti nganimwapikanilaga.

⁶ Naga mkupitilisya ungapikanila jemanjajo, tinjitenda ku Nyumba ajino yinatesile ku msinda wa Shilo, nipo msinda welewu tinjiwutendekasya kuŵa welwesece kwa mitundu josope ja pa cilambo capasi.”

⁷ Ŵakutaga mbopesi, ŵakulocesya, ni ŵandu wosope ŵambikene une ndili mkuŵeceta yindu yeleyi m'Nyumba ja AMBUJE.

⁸ Yelemiya piŵamasile kuŵeceta yiŵamsalile AMBUJE kuti ŵasalile ŵandu wosope, ŵakulocesya, ŵambopesi ni ŵandu wosopewo ŵamkamwile jwalakwejo, ni kumsalila kuti, “Mkwenela kuwulajidwa.

⁹ Ana ligongo cici mlocesye mu lina lya AMBUJE kuti Nyumba ajino tijicijonanjidwa mpela msinda wa Shilo, nambo soni kuti msinda awuno tiwuciŵa wangali ŵandu mpela cipululu?” Myoyo ŵandu wosope tacisongana ni kumsinga Yelemiya ku Nyumba ja AMBUJE.

¹⁰ Acakulungwa ŵa ku Yuda piŵapikene yiyatendekwagayo ŵanyakwice kutyocela ku nyumba ja mwenye kwawula ku Nyumba ja AMBUJE ni kutama pa luŵala lwawo ku cipata casambano ca Nyumba ja AMBUJE.

¹¹ Pelepo ŵakutaga mbopesi ni ŵakulocesya ŵasalile acakulungwakulungwawo ni ŵandu ŵane wosope kuti, “Mundu jweleju akwenela kuwulajidwa ligongo lyakuti alocesyeje yakusakala ya msinda awuno, mpela mumlipikanile jemanja mwacimsyene ni mapikanilo genu.”

¹² Kaneko Yelemiya ŵasalile acakulungwakulungwa ni ŵandu wosope ŵala kuti, “AMBUJE ŵatesile kunduma kuti njenesye maloŵe gosope ginagapikene gakujigamba nyumba ajino pamo ni msindawu.

¹³ Nambo sambano naga mkukolosya ndamo syenu ni masengo genu gakwe, ni kutanda kwapikanila AMBUJE Mlungu jwenu ni kuti jwalakwejo tacikululuka ngasampa cilango mpela mwele jwalakwejo muŵasacile.

¹⁴ Une ndili myala mwenu. Mtende cilicose cicikumnonyelesya.

¹⁵ Nambo cakuti m'manyilile cili cakuti naga mkumbulaga ni kuti jemanja pamo ni msinda awuno ni ŵandu wosope ŵakutama mwelemo, timcigatanda magambo gakumwulaga mundu jwangalemwa. Yisyene kuti AMBUJE ni ŵiŵandumile une kwa jemanja kuti mpikane yosope yinguŵecetayi.”

¹⁶ Papopo acakulungwakulungwawo ni ŵandu ŵane ŵasalile ŵakutaga mbopesi ni ŵakulocesya kuti, “Munduju ngakwenela kuwa, pakuti aŵecete ni uwe mu lina lya AMBUJE, Mlungu jwetu.”

¹⁷ Piyamasile yeleyo, acakulungwakulungwa ŵane ŵa mcilambo ŵajimi ni kwasalila ŵandu uŵasongene kuti,

¹⁸ “Ndaŵi jele Hesekiya ŵaliji mwenye jwa ku Yuda, Mika jwa ku Moleseti ŵalocesyaga, ni ŵasalile ŵandu wosope ŵa ku Yuda kuti AMBUJE Ŵamaciligosope akuŵeceta kuti, ‘Msinda wa Siyoni* tiwucilimidwa mpela mgunda. Msinda wa Yelusalemu tiwuciŵa masame soni litumbi lya Nyumba ja AMBUJE tiliciŵa ukweti.’

¹⁹ Nambi sambano ana Mwenye Hesekiya ni ŵandu wosope ŵa ku Yuda ŵamwuleje jwalakwe jula? Ana ngaŵaga mwenye ŵajogwepe AMBUJE ni kwaŵenda kuti ŵasalalile mtima? Ana ngaŵaga AMBUJE ni ŵiŵatesile ngapa jemanjajo cilango ciŵatiji kuti ŵape? Nambotu uwe tuli ciŵandika kuliŵilanjila twacimsyewe likungu lyekulungwa.”

²⁰ (Jwapali mundu jwine juŵalocesyaga mu lina lya AMBUJE, lina lyakwe ŵaliji Uliya mwanace jwa Shemaya ŵa ku Kiliyati Yelimu. Jwalakwejo jwalocesye soni yitiyicitendekwa soni ku msinda awuno ni cilambo acino mpela muŵatendele Yelemiya.

²¹ Pandaŵi jele Yehoiyakimu pamo ni acakulungwakulungwa ŵakwe ni ŵa ngondo ŵakwe, piŵapikene yiŵaŵecete, ŵasacile kumwulaga. Uliya piŵapikene yeleyo, ŵatesile woga nipo ŵatilile ku Iguputo.

²² Nambo mwenye Yehoiyakimu ŵamtumile Elinatani mwanace jwa Akiboli, pamo ni ŵandu ŵane ku Iguputo,

²³ Jemanjajo ŵajile kukumkamula Uliya ku Iguputo kuŵatilileko, ni kwika najo kwa Mwenye Yehoiyakimu. Mwenyejo jwalamwile kuti Uliyajo awulajidwe, nipo mtembo wakwe ŵajile kuwusika ku malembe ga ŵandu wamba).

²⁴ Nambo Ahikamu mwanace jwa Shafani ni juŵamcenjele, myoyo nganapelecedwa kwa ŵandu kuti amwulaje.