Yelemiya 25 - Chiyawo Bible

Amagongo ŵakutyocela kumpoto

¹ Aga gali maloŵe gigatyocele kwa Yelemiya, gakwamba ŵandu wosope ŵa ku Yuda. Maloŵe ginagapocele mcaka ca mcece ca ucimwene wa Yehoiyakimu mwanace jwa Yosiya, mwenye jwa ku Yuda, celeci caliji mcaka candanda ca ucimwene wa Nebukadinesa mwenye jwa ku Babiloniya.*

² Jwakulocesya* Yelemiya ŵasalile ŵandu wosope ŵa ku Yuda ni ŵakutama ku Yelusalemu kuti,

³ “Kwa yaka makumi gaŵili ni yitatu, kutyocela mcaka ca likumi ni yitatu ya ucimwene wa Yosiya mwanace jwa Amoni mwenye jwa ku Yuda, mpaka lelo jino, mbele ndili mkupocela maloŵe gakutyocela kwa AMBUJE,* une nikulagaga kumsalila jemanja, nambo jemanja nganimpikanila.

⁴ Jemanja nganimwupikanila utenga, atamose kuti AMBUJE nganaleka kumtumicisya jemanja ŵakutumicila ŵakwe ŵakulocesya.

⁵ Ŵakulocesyawo ŵatiji kuti, jwalijose jwa jemanja naga akuleka ndamo syakwe syakusakala, ni yitendo yakwe yakusakala, timcitama mcilambo ciŵampele AMBUJE jemanja pamo ni acinangolo ŵenu mpaka kalakala.

⁶ Mkajikuyaga milungu jine, soni mkajitumicilaga ni kujilambila. Mkalutandaga lutumbilo lwangu ni milungu jakupanganyidwa ni magasa genu. Sambano une ngasinimjonanga.

⁷ Nambo jemanja nganimumbikanila une. Mwalutandite lutumbilo lwangu ni milungu jimwapanganyisye ni magasa genu, mwakuti mwalijonasile mwacimsyene, akuŵeceta myoyo AMBUJE.

⁸ “Myoyo AMBUJE Ŵamaciligosope akuŵeceta kuti, pa ligongo lyakuti nganimpikanila maloŵe gangu,

⁹ ‘Tinjiŵilanga ngosyo syosope sya kumpoto pamo ni jwakutumicila jwangu Nebukadinesa, mwenye jwa ku Babiloniya. Tinjatuma kuti apute ngondo ni ŵandu ŵa mcilambomo, ni ngosyo sine syakusyungulila cilamboco. Tinjajonanga ni kwatendesya kuŵa cindu cakunyalaya, cakunyosyeka nambo soni cakutesya soni mpaka kalakala.

¹⁰ Tinjimasya lukondwa losope ni kusangalala kosope sikati jawo. Tinjilekasya maloŵe ga lukondwa ga mlombela jwamlume ni jwamkongwe. Ngasigapikanika soni masegwe ga lisyago, nipo tinjisimisya nyali syosope.

¹¹ Kaneko yili yimasile yaka makumi msano ni gaŵili, mitundu jeleji, tijicitumicila mwenye jwa ku Babiloniya.

¹² Yaka makumi msano ni gaŵiliyo yili yimasile, tinjipeleka cilango kwa mwenye jwa ku Babiloniyajo pamo ni ŵandu ŵakwe ligongo lya yakusakala yawo, nipo cilambo cawo tinjicisandusya masame mpaka kalakala.

¹³ Tinjitenda yosope yinaŵecete yakwayana ni cilambo ca Babiloniya, yosope yiyalembedwe m'bukumu, nambo soni yosope yiŵaŵecete jwakulocesya Yelemiya yakusisyana ni ŵandu ŵeleŵa.

¹⁴ Jemanjajo taciŵa acikapolo ŵa ŵandu ŵa mitundu jejinji ni ayimwene ŵakupikanika. Myoyo tinjawucisya pakukuya yitendo yawo ni masengo ga yala yawo.’ ”

Kwamuka kwa Mlungu pa ŵandu ŵa mitundu jine

¹⁵ AMBUJE, Mlungu jwa Aisalaeli, ŵasalile une kuti, “Jigalani mgawo awu wegumbale ni lutumbilo lwangu, ni mkamwesye ŵandu ŵa mitundu josope kuti namtume.

¹⁶ Ali amwele, tacitanda kupepeluka nipo tacitenda masoka ligongo lya ngondo jitinjijitumisya pasikati pawo.”

¹⁷ Sambano napocele mgawowo myala mwa AMBUJE ni napele ŵandu ŵa mitundu josope, kuti amwe mpela muŵandamulile AMBUJE.

¹⁸ Ŵandumile ku Yelusalemu, ku misinda ja ku Yuda, kwa ayimwene ŵakwe ni kwa nduna syakwe, kuti nasandusye mpela masame, ni cindu cakunyosyeka ni cakusecesya mpela mwaŵelele sambano jinomu.

^19-26 Awu uli mndandanda wa ŵandu ŵane umwamwele nawo mu mgawo: Mwenye jwa ku Iguputo, nduna syakwe, ŵandu ŵakwe wosope; ni ŵandu ŵa mitundu jine* ja cilendo jijikutama pasikati pawo; ayimwene wosope ŵa ku cilambo ca Usi; ayimwene wosope ŵa ku misinda ja Afilisiti ku Ashikeloni, ku Gasa, ku Ekiloni ni kumbali jakusigala ja ku Ashidodi; ŵandu ŵa ku Edomu, ku Mowabu nambo soni Aamoni; ayimwene wosope ŵa ku Taya ni ku Sidoni; ayimwene ŵa myilambo ya mungulugulu nyasa; misinda ja Dedani, Tema, Busi; ni kwa wosope ŵakusasenga umbo ca mumbali; ayimwene wosope ŵa ku Alebiya; ayimwene ŵane ŵakutama mcipululu; ayimwene wosope ŵa ku Simuli; ayimwene wosope ŵa ku Elamu ni ku Mediya; ayimwene wosope ŵa ku mpoto; ŵapakuŵandika ni ŵakwakutalika ŵakwe, ni ku ma ucimwene gosope ga cilambo capasi. Pambesi pakwe ali amwele wosope ŵene, ŵitacimwa ni mwenye jwa ku Babiloniya.

²⁷ Kaneko timwasalile jemanjajo kuti, AMBUJE akuŵeceta kuti, “Mwasalile ŵandu kuti amwe akolelwe, atapice, agwe ni ngajimuka soni, ligongo lya ngondo jingutumisya pasikati pawo.

²⁸ Naga akukana kupocela mgawo kutyocela myala mwenu kuti amwe, mwasalile kuti, AMBUJE Ŵamaciligosope akuŵeceta kuti, mkwenela kumwa!

²⁹ Sambano tindande kupeleka cilango kwa ŵandu ŵa mu msinda wawukusamanyika ni lina lyangu. Ana mkuganisya kuti jemanja ngasimpegwa cilango? Iyayi, jemanja ngaŵa mkulupuka. Tindumisye ngondo kwa ŵandu wosope ŵakutama pa cilambo capasi. Une AMBUJE Ŵamaciligosope nguŵeceta myoyo.

³⁰ “Sambano m'mwe mjenesye maloŵe gakwasisya, mwasalile kuti, ‘AMBUJE tacibangula kwinani, maloŵe gakwe tigacipikanika mpela kulindima kutyocela ku malo gakwe gakusaguka. Yakuwona, tacibangula, kwakalipila ŵandu ŵakwe, tacitongola mnope mpela ŵandu ŵangali mipeleya, pakulimbana ni ŵandu wosope ŵa pa cilambo capasi.

³¹ Masegwe gekulungwa tigacipikanika pa cilambo cosope capasi, ligongo AMBUJE akwajimba magambo ŵandu ŵa mitundu josope. Akuti ŵalamule ŵandu wosope nipo ŵakusakala taciwulajidwa. AMBUJE aŵecete myoyo.’ ”

³² AMBUJE Ŵamaciligosope akuŵeceta kuti, Mlole, likungu likusati naga lityosile pa mtundu wine likusaja kugwila soni pa mtundu wine. Nipo kumbesi kwa cilambo capasi kukutanda mbepo jamacili mnope.

³³ Pa lisiku lyelelo, wosope ŵakuwulajidwa ni AMBUJE tacigamba kupita pa cilambo capasi kutyoka mtepa awu kuja kwika kumtepa wine. Pangali jutacalilila, kapena kuja kukwasika m'malembe. Tacigamba kulecedwa mpela ndoŵe posepose.

³⁴ Jemanja acimlongola mlile mnope, gumilani mwamacili. Jemanja acimlongola ŵa ŵandu ŵangu, pakalani liwu. Ndaŵi jakuti mkawulajidwe jikwanile, nipo timcitenda kuwulajidwa mpela ngondolo sya mikambako.

³⁵ Acimlongolawo tacisoŵa kwakutilila acimsyene ŵangondolo tacisoŵa litala lyakulupucila.

^36-37 Mpikane, kulila kwa acimlongola, ni kulila kwa acimsyene ŵangondolo! Pakuti AMBUJE akonanga malo gakulicisya yilangwa yawo. Macinga gawo ga ngondolo gigaliji pa mtendele, gaŵele masame mtande wa ukali wakogoya wa AMBUJE.

³⁸ AMBUJE ŵalesile ŵandu ŵakwe mpela lisimba lyalilesile mbanga jakwe, nipo cilambo cawo ciŵele cipululu, ligongo lya yisawusyo ya ngondo ni lutumbilo lwakogoya lwa AMBUJE.