Yelemiya 23 - Chiyawo Bible

Cembeceyo ca ndaŵi ja msogolo

¹ AMBUJE* akuti, “Likungu kwa ŵakucinga ŵakusiŵapwilinganya ŵandu ŵangu.

² Ali ni ligongo lyakwe, AMBUJE Mlungu jwa Aisalaeli pakuŵeceta ya ŵakulamulila ŵakwalolela ŵandu ŵakwe, jwalakwejo akuti, ‘Mwapwilingenye ŵandu ŵangu, ni kwajawusya kwakutalika. Myoyo tinjimpa cilango ligongo lya ulemwa* wenu.

³ Kaneko une namsyene tinjasonganya ŵandu ŵangu ŵakusigala, ni kwatyosya ku malo kuŵamwasicile, ni kwawucisya ku cilambo ca kumangwawo. Tacikola ŵanace ŵajinji nipo tacitupa.

⁴ Tinjisagula ŵakulamulila ŵakuti ŵalamulile cenene jemanjajo. Ŵandu ŵangu ngasatenda woga kapena kusokonecela. AMBUJE aŵecete myoyo.’ ”

⁵ AMBUJE akuŵeceta kuti, “Ndaŵi jikwisa jitinjisagula mwenye jwakulupicika cisukulu ca Daudi.* Mwenye jwelejo tacilamulila mwa lunda ni kutenda yayili yakulungamika ni ya cilungamo mcilambo mosope.

⁶ Pandaŵi jitaciŵa mwenye, ŵandu ŵa ku Yuda tacikulupuka, nipo ŵandu ŵa mu Isalaeli tacitama mwa mtendele. Jwele mwenyejo tacimpa lina lyakuti ‘AMBUJE cikulupusyo cetu.’ ”

⁷ AMBUJE akuŵeceta kuti, “Ndaŵi jikwisa jele ŵandu ngasalumbila soni kwa une mpela Mlungu jwa cijumi junakopwesye Aisalaeli mcilambo ca Iguputo.

⁸ Nambo m'malo mwakwe tacilumbila kwa une mpela Mlungu jwa cijumi junakopwesye Aisalaeli ku cilambo ca kumpoto ni ku yilambo yosope kunapwilinganyicisye. Kaneko une tinjawucisya jemanjajo ku malo ginapele acinangolo ŵawo.”

Utenga wa Yelemiya wakwamba ŵakulocesya

⁹ Kwamba ya ŵakulocesya, mtima wangu ukasice, mwakuti m'malungo mugambile kuti sii! Mbele mpela mundu jwamkolelwe, mundu jwasokonecele mtwe ni finyo ligongo lya AMBUJE ni maloŵe gawo geswela.

¹⁰ Cilambo cigumbele ni ŵandu ŵangakulupicika kwa AMBUJE; jemanjajo akusatenda yakusakala. Ligongo lya malweso ga AMBUJE cilambo cikulila soni malo gakulicisya yilangwa gajumwile.

¹¹ AMBUJE akuŵeceta kuti, “Ŵakutaga mbopesi ni ŵakulocesya ali ŵangamjogopa Mlungu. Nasimene jemanjajo ali mkutenda yakusakala m'Nyumba jangu.”

¹² Ali ni ligongo lyakwe matala ga jemanjajo tigaciŵa gakutelesya. Tiyikasye yisawusyo yakogoya pa jemanjajo; pakuti ndaŵi ja cilango cawo jikwisa. Une AMBUJE mbecete myoyo.

¹³ Sikati ja ŵakulocesya ŵa ku Samaliya niciweni cakusakala aci: Jemanjajo ŵalocesyaga mu lina lya Baala,* myoyo ŵasokonesye ŵandu ŵangu Aisalaeli.

¹⁴ Sikati ja ŵakulocesya ŵa ku Yelusalemu naciweni cindu cakogoya mnope: Jemanjajo akusatenda yikululu, kulambusya, nambo soni kwalimbisya mtima ŵandu ŵakusatenda yakusakala; myoyo pangali jwakusaleka yakulemwa yakwe. Kwa uneji, wosopewo ali mpela ŵandu ŵa ku misinda ja Sodomu ni Gomola.

¹⁵ Myoyo, AMBUJE akuŵeceta kwambaga ŵakulocesya acitiji kuti: “Tinjalisya yakusipuka yakuŵaŵa mnope, ni kwapa mesi gagakwete yikoko kuti amwe, ligongo lyakuti yakusakala yosope yayili mcilambomo, yiyice mtande wa ŵakulocesyawo.”

¹⁶ AMBUJE Ŵamaciligosope akwasalila ŵandu kuti: “Mkayipikanila yakuŵeceta ŵakulocesya, pakuti jemanjajo akusalocesya ya unami. Yele yakusamsalila jemanja kuti akuyiwona kupitila m'mesomkulola sili nganisyo syawo, mwakuti yeleyo nganiyiŵa yakuŵecetedwa ni AMBUJE.

¹⁷ Akusapitilisya kwasalila ŵandu ŵakusanyosya une kuti, ‘Yindu tiyicimjendela cenene.’ Kwa ŵele ŵali ŵakucalamandala mitima akusiŵasalila kuti, ‘Cakusawusya cilicose ngasicimyicilila m'mwejo.’ ”

¹⁸ Une naliwusisye kuti, “Mwa ŵakulocesyawo, ana ŵani uŵatemi nawo pa mtemela wa AMBUJE? Ana ŵani uŵaweni ni kugapikana maloŵe gakwe? Ana ŵani mwa jemanjajo uŵasamele maloŵe gakwe ni kugapikanila?

¹⁹ Mlole mbungo jamacili jakutyocela kwa AMBUJE! Mlole ukali wakwe wakupuga mpela mbungo jamacili mnope; tijicipujila pa mitwe ja ŵandu ŵakusakala.

²⁰ Lutumbilo lwa AMBUJE ngasilumala, mpaka ali atesile yosope yiŵasimicisye mu mtima mwakwe. Yeleyi timciyimanyilila masiku gakwisaga.

²¹ AMBUJE akuŵeceta kuti, Ŵakulocesya ŵeleŵa nganatumidwa ni une, nambo citamileco ŵajendaga posepose kulalicila utenga wangu. Nganimbeceta nawo, nambope ŵalocesyaga.

²² Akaŵe ni une pa mtemela wangu akalalicile kusyesyene maloŵe gangu kwa ŵandu ŵangu, ni kwatyosya m'matala gawo gakusakala, kuti alece ulemwa wawo.”

²³ “Une ndili Mlungu jwakusimanikwa palipose ngaŵaga malo gampepe.

²⁴ Ana mundu mpaka ajuŵe pakusisika pamti uli, pakuti une ngakomboleka kumwona? Ana uneji ngati ndili palipose kwinani ni cilambo capasi cakwe?

²⁵ Niyipikene yakuŵeceta ŵakulocesya, ya unami mu lina lyangu, ni kugumilaga acitiji kuti ‘Sagamile! Sagamile!’

²⁶ Ana ya unamiyi taciyisunga mu mtima mwawo mpaka cakaci ŵakulocesya ŵa unamiŵa, ŵakusalocesya ya unami ya mu mtima mwawo?

²⁷ Ŵakulocesya ŵeleŵa akusakulupilila kuti ŵandu ŵangu tacindiŵalila naga akupikana ya kusagamilayi, mpela mwele acinangolo ŵawo muŵaliŵalilile lina lyangu pakumlambila Baala.*

²⁸ Mpela jwakulocesya* jwasagamile sagamisi alondesye sagamisi syakwesyo. Nambo jwakwete maloŵe gangu, alalicile maloŵe gangugo mwakuwona. Ana manyasi gekatekate mpaka galandane ni tiligu?

²⁹ Ana maloŵe gangu nganigaŵa mpela moto, nambo soni mpela nyundo jajikusakasa lwala?

³⁰ Ali ni ligongo lyakwe ngwakana ŵakulocesya ŵakusajiŵilana maloŵe gangu acimsyenepe ni kulalicilaga mpela utenga wa une.

³¹ Ngwasisya ŵakulocesya ŵakusanonyela kuŵeceta ya unami, aciŵecetaga kuti gelega gali maloŵe ga AMBUJE.

³² Ngusisyana nawo ŵakulocesya wakusasagamila ya unami, ni kwasalilaga ŵandu ni kwasokonesya ni ya unami yawoyo. Une nganinatuma jemanjajo, kapena kwalamula, soni ŵangakamusya ŵandu amta panandi, une AMBUJE mbecete myoyo.”

Ya msigo wakusitopa wa AMBUJE

³³ AMBUJE ŵamsalile Yelemiya kuti, “Ŵandu ŵeleŵa, kanga ŵakulocesya, kanga ŵakutaga mbopesi naga akumwusya kuti, ‘Ana utenga wakusitopa wa AMBUJE ukuti cici?’ M'mwejo timwajanje kuti, ‘Jemanja mli msigo wakwasitopesya AMBUJE nipo tacimjasa.’

³⁴ Jwakulocesya, jwakutaga mbopesi, kapena mundu jwine jwalijose, akuŵeceta kuti, ‘msigo wa AMBUJE,’ jwalakwejo tinjimpa cilango pamo ni liŵasa lyakwe.

³⁵ Nambo maloŵe gele jwalijose gitamwusyeje mjakwe gaŵeje gakuti, ‘Ana AMBUJE aŵecete yamtuli?’

³⁶ Nambo mkaŵecetaga kuti, ‘Awu uli utenga wakusitopesya wa AMBUJE.’ Utenga wa jwalijose ni wa jwalakwejo msyene, mwakuti jemanja mwasokonesye maloŵe ga Mlungu jwacijumi, AMBUJE Ŵamaciligosope, Mlungu jwetu.

³⁷ Nambo m'mwe Yelemiya timwawusye ŵakulocesyawo kuti, ‘Ana AMBUJE amjanjile yamtuli? Nambi AMBUJEWO aŵecete yamtuli?’

³⁸ Nambo naga akuja kungapikanila ni kuŵeceta kuti, ‘Awu uli utenga wakusitopa wakutyocela kwa AMBUJE,’ m'mwejo mkasalile kuti,

³⁹ Une namsyene tinjanyakula mpela msigo wakusitopa ni kuja kukumjasa kwakutalika. Tinjimtyosya pameso pangu jemanja pamo ni msinda unampele jemanja ni acinangolo ŵenu.

⁴⁰ Tinjimnyosya mpaka kalakala, tinjimtesya soni syangaliŵalicika.”