Yelemiya 22 - Chiyawo Bible

Utenga wa Yelemiya wakuja ku Nyumba ja Ucimwene ku Yuda

^1-2 AMBUJE* ŵasalile kuti mjawule ku nyumba ja mwenye jwa ku Yuda, ni mkasalile kuti, ŵalakwe mwenye jwa ku Yuda, apikane maloŵe ga AMBUJE. Ŵalakwe ŵakusatama pa citengu ca ucimwene ca Daudi,* ŵalakwe pamo ni ŵakwatumicila ŵawo soni ŵandu ŵakusajinjilila pa yipata ayi:

³ AMBUJE akuŵeceta kuti: “Mtendeje yindu yayili yakulungama ni yacilungamo. Mundu jwele jwajiŵilidwe yindu yakwe mkwenela kumkulupusya kwa jwakumsawusyajo. Mkasimumlagasya mlendo, jwamkongwe kapena mwanace jwamasije. Mkasimwawulaga ŵandu ŵangalemwa pa malo agano.

⁴ Naga mkugapikanila maloŵe gelega, ni kuti ayimwene ŵakutama pa citengu ca ucimwene wa Daudi tacijendelecela kulamulila. Tacijinjililaga pa yipata ayi ya ku nyumba ja mwenye, ali akwesile pa mageleta ni mahaci, jemanjajo pamo ni ŵakutumicila ni ŵandu ŵawo.

⁵ Nambo naga ngasimpikanila maloŵe gangu, ngulumbila kuti malo agano tigaciŵa masame. AMBUJE akuŵeceta myoyo.

⁶ “Aga gali maloŵe ga AMBUJE gakwamba mwenye jwa ku Yuda: Atamose une ngusinamnonyela mpela Giliyadi, kapena mpela songa ja Litumbi lya Lebanoni, nambope tinjimtenda kuŵa cipululu, msinda wangali ŵandu.

⁷ Tinjatuma ŵandu ŵakuti tamjonanje jemanja, jwalijose ali ajigele cida cakwe. Tacikata yitela njalamila sya mikungusa jenu jajili jambone mnope, ni kujiponya pa moto.

⁸ “Ŵandu ŵa mitundu jine* pitacipita pa msinda welewo, taciwusyanaga kuti, ana ligongo cici AMBUJE ŵawujonasile camti myiyi msinda wekulungwawu?

⁹ Jemanjajo tacijanga kuti, lili ligongo lyakuti ŵandu ŵakwewo ŵalesile cilanga* ciŵalangene ni AMBUJE, Mlungu jwawo. Ŵatandite kujilambila milungu jine ni kujitumicila.”

Utenga wa Yelemiya wakuŵeceta ya Yowahasi

¹⁰ Ŵandu ŵa ku Yuda mkasimumlilila Mwenye Yosiya; kapena kumtendela canasa jwalakwejo. Nambo mumlilile juŵamtyosisye mcilambo cakwe ligongo lyakuti ngasawujila soni, ngasaciwona soni cilambo cakwe.

¹¹ AMBUJE akuŵeceta yakwamba Yowahasi, mwanace jwa Yosiya juŵajinjile m'malo mwa babagwe pa citengu ca ucimwene uŵawulesile. Myoyo pakuŵeceta ya jwalakwe jula AMBUJE akuŵeceta kuti, “Jwalakwejo ngasawujila soni.

¹² Taciwila ku cilambo ca ukapolo, soni ngasaciwona cilambo acino.”

Utenga wa Yelemiya wakwamba Yehoiyakimu

¹³ Likungu kwa mundu jwakutaŵa nyumba jakwe mwangali cilungamo, jwakutaŵa yipinda yakwe ya unami, pakukamulisya masengo ŵandu ŵamasengo, nambo ngiŵapa kose malipilo ga masengo gakamwilego.

¹⁴ Mundujo akusaŵeceta kuti, “Tinjilitaŵila nyumba jekulungwa, ja yipinda ya mwinani jekulungwa mnope.” Tinjiŵika mawindo, ni komamo matabwa ga mkungusa, ni kupaka utoto wecejewu.

¹⁵ Ana mkuganisya kuti m'mwejo mli mwenye pakuti nyumba syenu sili sya mkungusa? Mganisye ya baba ŵenu: ana ngati paja ŵakwete yosope yakusosekwa pa umi wawo? Ana ngaŵa ŵalamulaga magambo mwangali lusagu? Yosope yene yajendelaga cenene.

¹⁶ Ŵacinjilicisyaga ŵandu ŵakusoŵa ni ŵakulaga, nipo yosope yajendelaga cenene. Ana yeleyi nganiyilosya kuti womwanjawo ŵamanyililaga une? AMBUJE aŵecete myoyo.

¹⁷ Nambo nganisyo ni mtima wenu nganiyiŵa pane soni, yili pa kupata cakupata mwa litala lya unami, pa kuwulaga ŵandu ŵangalemwa, ni pa ngalwe ni kwalagasya ŵandu ŵane.

¹⁸ Ali ni ligongo lyakwe AMBUJE pakuŵeceta ya Yehoiyakimu mwanace jwa Yosiya, mwenye jwa ku Yuda, akuti, “Ngasipasimanikwa jwakumlilila jwalakwejo acitiji kuti, ‘Ngondone, mjangu, yakogoya!’ Ngasipasimanikwa jwakumlilila jwalakwejo, ‘AMBUJE ŵangu! Mwenye jwangu!’

¹⁹ Tacimsika mpela bulu, kutenda yakumkwekwelemya ni kuja kumjasa kusyeto kwa yipata ya Yelusalemu.”

Utenga wa Yelemiya wakwamba Yelusalemu

²⁰ Sambano jemanja ŵandu ŵa ku Yelusalemu, mjawule ku matumbi ga Lebanoni, mkalile mwakugumila ku matumbi ga ku Mowabu, maloŵego gayice mpaka ku Bashani. Mkalile mwakugumila mli ku matumbi ga Mowabuko, pa ligongo lyakuti wosope umwajegamilaga ajonanjidwe.

²¹ Namkalamwisye jemanja yindu piyamjendelaga cenene. Nambo jemanja mwatite kuti, “Ngasitupikanila.” Amu ni mumŵele mli kutendela kutandila mli ŵanace ŵanandi, nganimgapikanila maloŵe gangu.

²² Acimlongola ŵenu wosope tacityosyedwa ni mbungo jamacili, soni ŵele umwajegamilaga tacijigalidwa kuja ku ukapolo. Myoyo timcinyosyedwa, timcitenda soni, ligongo lya yakulemwa yenu yejinji.

²³ Jemanja ŵimkusatama ku nyumba ja ku Lebanoni, umwataŵile majumba genu sikati ja mikungusa, timcilila mnope pitiyicimgwila yisawusyo mpela ya jwamkongwe pa ndaŵi jakuŵeleka.

Cilango ca Mlungu kwa Yehoiyakini

²⁴ AMBUJE ŵamsalile Mwenye Yehoiyakini, mwanace jwa mwenye Yehoiyakimu jwa ku Yuda kuti, “Atamose mkaŵe kuti mli mpela mbete ja ku cala cangu camlyo, ngamwusile ni kumjasa.

²⁵ Tinjimpeleka kwa ŵandu ŵakusaka kumwulaga, ŵele umwajogopaga, ni kwa Nebukadinesa mwenye jwa ku Babiloniya ni ŵandu ŵakwe.

²⁶ Tinjimjawusya ku cilambo cine pampepe ni mama ŵenu uŵamŵelece. Elo, jemanja nganimpagwila kweleko, nambope timciwila kukoko.

²⁷ Ngasimwujila soni ku cilambo kwatimcisaka kuwujila.”

²⁸ Une natite kuti, “Ana Yehoiyakiniju aŵele mpela lulo lwakunyosyeka, lwakasika, cindu cangakucisamala ŵandu? Nambi ligongo cici jwalakweju ni ŵanace ŵakwe akwatyosya ni kuja kukwaŵika ku cilambo cangamanyika kose?”

²⁹ Ŵandu ŵangu, ŵandu ŵangu, pikanani maloŵe ga AMBUJE.

³⁰ AMBUJE akuti, mundu jweleju mumjigale mpela jwangali ŵanace, mundu jweleju ngasapunda pa cilicose pa umi wakwe. Pangali ni jumo jose mwa yisukulu yakwe, jutacitama pa citengu ca ucimwene wa Daudi ni kulamulila soni cilambo ca Yuda.