Yelemiya 20 - Chiyawo Bible

Kukangana kwa Yelemiya ni Pasha

¹ Pandaŵi jele Pasha jwaliji jwakutaga mbopesi soni mwanace jwa Imeli jwele juŵaliji kapitawo jwamkulungwa ku Nyumba ja AMBUJE,* piŵampikene Yelemiya ali mkulocesya yindu yeleyi,

² jwalakwejo ŵalamwile ŵandu kuti ampute Yelemiya ni kumwugalila ku nyumba ja akayidi jijaliji ku Cipata ca Benjamini, ku Nyumba ja AMBUJE.

³ Kundaŵi kwakwe, Pasha ŵamkopwesye Yelemiya m'nyumba ja akayidi jila, nipo Yelemiya ŵamsalile Pasha kuti, “AMBUJE ngamkolanga soni lina lyakuti Pasha, nambo lyakuti ‘Yakogoya ku mbali syosope.’

⁴ AMBUJE akuŵeceta kuti, ‘Tinjimtenda m'mwejo kuŵa cakogoya kwa m'mwejo mwasyene ni kwa acimjenu, nipo m'mwejo timcawona jemanjajo ali mkuwulajidwa ni amagongo ŵawo pakukamulisya masengo mawupanga, m'mwejo mli mkulola. Ŵandu wosope ku Yuda tinjapeleka myala mwa mwenye jwa ku Babiloniya, jutacajigala ŵane mwa jemanjajo ukapolo kuja nawo ku Babiloniya, nipo ŵane tacawulaga ni upanga.

⁵ Cipanje cosope ca mu msindamu, yakupata yosope kutyocela ku masengo gawo, yindu yosope yamtengo wapenani ni yipanje ya ayimwene ŵa ku Yuda tinjiyipeleka kwa amagongo ŵawo, utaciyijigala yosopeyi ni kuja nayo ku Babiloniya.

⁶ Myoyo, m'mwe Pasha ni wosope ŵa mwiŵasa mwenu, timcijigalidwa kuja ku ukapolo ku Babiloniya. Timciwila ni kusicidwa kukoko, m'mwejo pamo ni acimjenu umwasalilaga ya unami ŵala.’ ”

Yelemiya akudandawula kwa AMBUJE

⁷ Ŵalakwe AMBUJE andoŵesye une, yisyene ndoŵele kusyesyene. Ŵalakwe ali ŵamacili kupunda une, soni ŵalakwe ambundile. Jwalijose agamba kuseka une; jwalijose agamba kunyogodola une lisiku lyosope.

⁸ Ngusingwesya maloŵe pa ndaŵi jingusaŵeceta, ngusingumila kuti, “Njojo akuno, basi tujonasice!” AMBUJE, maloŵe ga ŵalakwe gandendekasisye une kuŵa jwakunyosyeka ni kunyogodoledwa masiku gosope.

⁹ Nambo naga nguŵeceta kuti, “Ngusilalicila soni ya AMBUJE, ngisimbeceta soni mu lina lyakwe,” maloŵe ga ŵalakwe gakusakolela mpela moto mu mtima mwangu. Ngusalinjilila kugasunga mu mtima mwangu, nambo panyuma pakwe ngusagakoposya pakuti uneji ngaŵa mkomboleka kupimilila.

¹⁰ Ngusinapikana ŵajinji ali mkusongona acitiji kuti, “Yakogoya yili mbali syosope! Kwende tukamlaŵilile.” Ŵele uŵaliji acimjangu ŵajembecelaga kuti yindu yisokonecele, myoyo ŵatiji kuti, “Mwine mwakwe talambusidwe, uwe Tiwucimkamula ni kuwusya mbusyo pa jwalakwejo.”

¹¹ Nambo AMBUJE ali ni une, jwalakwejo ni msilikali jwakogoya. Ali ni ligongo lyakwe ŵandu ŵakundagasya une tacilepela ngisambunda une. Tacitenda soni mnope ligongo lyakundepelako, soni syawosyo ngasisiliŵalicika mpaka kalakala.

¹² AMBUJE Ŵamaciligosope, ŵakusiŵapa cilango ŵandu mwakulungama, ŵele ŵakusalola ya mu mtima, ngupeleka magambo gangu kwa ŵalakwe. Ngwaŵenda ŵalakwe kuti apelece cilango kwa amagongo ŵangu.

¹³ Amjimbile AMBUJE, ni kumlumba! Jwalakwejo ni jwakusakulupusya ŵakulaga kwa amagongo ŵawo.

¹⁴ Lilwesece lisiku linapagwile. Likalapililidwa lisiku liŵambelece mama ŵangu!

¹⁵ Likungu kwa mundu jwele juŵasangalesya baba ŵangu ni utenga wakuti, “Ku nyumba kwenu kupagwile mwanace jwamlume.”

¹⁶ Mundu jwelejo aŵe mpela misinda jiŵajijonasile AMBUJE mwangali canasa jila. Apikane kulila kwa kupweteka kundaŵi, nambo soni masegwe ga asilikali ŵa ngondo musi,

¹⁷ ligongo lyakuti nginambulajila mcitumbo, nikuti citumbo ca mama ŵangu cikaliji lilembe lyangu.

¹⁸ Ana ligongo cici napagwile? Ana napagwile yipwetesi ni canasa, kuti umi wangu uŵeje wa soni ndaŵi syosope?