Yelemiya 2 - Chiyawo Bible

Cisamalilo ca Mlungu pa Aisalaeli

¹ AMBUJE* ŵasalile une acitiji kuti,

² mjawule mkagombelesye kwa ŵandu ŵosope ŵa ku Yelusalemu ali mkupikana kuti, “Ngumanyilila mumwatendelaga pakulupicika mu ndaŵi ja ucanda wenu, mumwatendelaga pakunonyela une pandanda pala mpela mwakusatendela mlombela jwamkongwe. Jemanja mwanguyisye une mcipululu ku malo kukwaliji kwangapandidwako kandu.

³ Jemanja ŵandu ŵa ku Isalaeli mwaliji ŵakusaguka ŵa Mlungu. Mwaliji mpela yisogosi yakwe yandanda kukomala. Naŵisile yipwetesi ni yisawusyo yekulungwa, pa wosope uŵamlagasisye m'mwejo, nipo likungu lyagwilaga jemanjajo, une AMBUJE nguti myoyo.”

Ulemwa wa acinangolo ŵakala ŵa Aisalaeli

⁴ Mpikane maloŵe ga AMBUJE jemanja ŵimli yisukulu ya Yakobo* nambo soni ŵimli ŵa mwiŵasa lya Isalaeli.

⁵ AMBUJE akumwusya kuti: “Ana acinangolo ŵenu asimene kuti une ndemwisye cici cakuti mpaka kundila ni kulekangana ni une? Ŵakuyisye milungu jangalumbana, myoyo soni jemanjajo acimsyene ŵaŵele ŵangalumbana.

⁶ Jemanjajo, nganasamala kose ya une atamose kuti une nakulupwisye jemanjajo kutyocela ku Iguputo ni kwalongolela jemanjajo mu cipululu. Mcilambo cejumu ni cesokocesokoce cila, mcilambo cacilala ni ca cipi camti bii, mcilambo cangapitamo ŵandu soni kwangatamako ŵandu.

⁷ Une namjigalile jemanja ku cilambo ca cajila kuti mlye yisogosi yakwe ni yambone ya kweleko. Pandaŵi jimwagambile kwinjila mcilambomo mwacisakesye, cilambo cinampele une mwacitendekasisye kuŵa cakunyalaya.

⁸ Nombe nawo ŵakutaga mbopesi nganawusya kuti, ‘Ana AMBUJE ali kwapi?’ Ŵandu ŵakumanyilila mnope malamusi nganamanyilila. Ŵakulamulila ŵanjimucile. Ŵakulocesya ŵiŵalocesyaga mu lina lya Baala,* nombe nawo ŵakuyaga milungu jangalumbana.

Mlungu akwajimba magambo ŵandu ŵakwe

⁹ “Sambano Une, AMBUJE tinjimjimba magambo. Tinjiyijimba soni magambo yisukulu yenu.

¹⁰ Jawulani cakungapilo lyuŵa, ku cilumba ca Saipulasi, ni mkalole, mtumisye soni ŵandu cakungopoko lyuŵa, ku Kedala kuti akawungunye. Timciyiwona kuti yamti myiyi nganiyitendecekweje ni kala kose:

¹¹ Ana upali mtundu wa ŵandu ŵangu uliwose uwacenjilepo milungu jakwe, atamose kuti nganijiŵa milungu jisyesyene? Nambotu ŵandu ŵangu andindenye une, Mlungu juŵayice ni ucimbicimbi kwa jemanjajo; kwa milungu jakupanganyidwa jele ngaŵa mkutenda kandu kwa jemanjajo.

¹² Myoyo ngulamula kwinani, msimonje nayo yeleyi mtetemele ni woga, AMBUJE akuti myoyo.

¹³ Ŵandu ŵangu atesile ulemwa uŵili: Andesile une jundili uliŵa wa mesi gakupeleka umi, jemanjajo alisokolele acimsyene yakusunjila mesi yegangasice yangakomboleka kusunga mesi.

Yakuyicisya ya ungakulupicika wa Aisalaeli

¹⁴ “Ŵandu ŵa ku Isalaeli nganaŵa acikapolo, jemanjaji nganapagwila ku ukapolo. Nambi ligongo cici akamwilwe camti myiyi?

¹⁵ Masimba gakwabangulila jemanjajo; acisyusisye cilambo cawo kuŵa cipululu. Misinda jawo ŵajijonasile ni jaŵele masame.

¹⁶ Asilikali ŵakutyocela ku Iguputo ku misinda ja Memfisi ni Tapanesi amkasile mitwe jenu.

¹⁷ Yeleyi yimtendecekwele pa ligongo lyakuti mwalesile AMBUJE Mlungu jwenu, piŵamŵisile jemanja pa litala lyambone.

¹⁸ Nambi sambano timcipata cici pa ndaŵi jitimciwujila ku Iguputo, kukumwa mesi ga mu Lusulo lwa Nayilo? Ana mkuganisya kuti timcipata cici pitimcijawula ku Asiliya kukumwa mesi ga mu Lusulo lwa Yufuleti?

¹⁹ Timcipegwa cilango pa ulemwa wenu pewo pakuti munganile une, tinjimjimba magambo. Mganicisye cenene ya kusakala kwakundeka une, AMBUJE, Mlungu jwenu. Mganicisye cenene ya kusakala kwakwe kwakuŵa mundu jwanganjogopa une. Une AMBUJE Mlungu Jwamaciligosope mbecete myoyo.”

Aisalaeli ŵakanile kumpembeka Mlungu

²⁰ AMBUJE Mlungu akuŵeceta kuti, “Kutyocela kalakala jemanja Aisalaeli mwanganile une, ni kukasa mkamulano uwapali sikati ja jemanja ni une. Jemanja mwatite kuti, ngitumtumicila; jemanja mŵele mpela jwamkongwe jwa lilama, mkujilambila milungu jine pakutenda ya lilama petumbi lililyose soni pasi pa citela cakutenjela cilicose.

²¹ Nambo namŵeni m'mwe Isalaeli mpela citela ca mpeleya cakusaguka, mwaliji mpeleya wambone mnope. Nambi ligongo cici mŵele mpeleya wangalondeka, wakulandana ni wakwitinji?

²² Atamose kuti mjojele sopo jwamacili mnope kuŵilila kwa ulemwa wenu kukusawoneka ciŵela pameso pangu.

²³ Ligongo cici mkuŵeceta kuti, nganimlisakasya, soni nganimkuya mlungu jwakolanjidwa Baala?* Mkumbucile mumwalemwecesye m'ciŵata mula, mkumbucile yimtesile. Mŵele mpela ngamila* jajikongwe, jijikusawutuka aku nakuku.

²⁴ Mŵele mpela bulu jwasyoŵelele kutama mcipululu, jwele jijikusajenda ni kunusyaga mpweya wa mcipululu kwineku juli mkusosa kuti jugone ni jwalijose. Ana ŵani mpaka ajulekasye yakusaka ya mtima wakwe? Jwamlume julijose jwakumsaka jwalakwejo ngasalaga, tacisimana mu ndaŵi jakwejo.

²⁵ Isalaeli, lekani, kogopela kuti sapato syenu sitakum'malila ku sajo peko, ku lukosi kwenu komboleka kumula ni njota ligongo lya kujikuya milungu jine. Nambo m'mwejo mkuti, ‘Iyayi, ngayikomboleka kutendela mwine, pakuti ngusajinonyela milungu ja cilendoji, ni ngaŵa mkomboleka kuleka kujikuya.’ ”

Isalaeli akwenela kupegwa cilango

²⁶ AMBUJE akuŵeceta kuti, “Liŵasa lya Isalaeli tilicitenda soni, mpela mwakusatendela ŵawiyi naga ali akamwilwe. Jemanja Aisalaeli pamo ni ayimwene ŵenu, ŵakutaga ŵenu mbopesi ni ŵakulocesya ŵenu, wosopemwe timcitenda soni.

²⁷ Jemanja wosope timcitenda soni ni kucisalila citela kuti, m'mwejo mli baba ŵetu, soni liganga lili mama ŵetu. Nambo une akusandumbilila, m'malo mwakugalawucila kwa Une. Nambo naga mli pa yipwetesi mkusimumbenda kuti yice kukumkamusya jemanja.

²⁸ “Nambi milungu jenu jili kwapi, ajila jimwalipanganyicisye mwacimsyene jila? Jiyicetu kuti jimkulupusye, pa ndaŵi jenu ja yipwetesi. Jemanja ŵandu ŵa ku Yuda, mkwete milungu jejinji, winji wakwe mpela mujitupile misinda jenu.”

²⁹ Ligongo cici mkunjimba magambo? Ligongo cici soni jemanja mkunjimucila une? Napelece cilango kwa ŵanace ŵenu mwangapindula cilicose, jemanjajo nganalijiganya kalikose kutyocela ku cilango cinapelececo.

³⁰ Mpela mulikusatendela lisimba lya ukali, jemanja mwawuleje ŵakulocesya ŵenu ni upanga.

³¹ Jemanja ŵimli ŵa mpago awuno, mgapikanileje maloŵe ginguŵeceta unejiga. Ana mbele mpela cipululu kwa jemanja Aisalaeli, kapena ndili mpela cilambo ca cipi camti bii? Nambi ligongo cici sambano ŵandu ŵangu akuŵeceta kuti, uwe tuli alukosyo, soni tukusituyika kwa jemanja?

³² Ana mwali akusaliŵalila yakulisalalisya nayo pa cilu, kapena mlombela kuliŵalila yakuwala yakwe ya ulombela? Nambope ŵandu ŵangu andiŵalile une kwa masiku gejinji.

³³ Jemanja akusamanyilila cenene matala gakupatila maganja gapacisyepela. Atamose acakongwe ŵakusakala mnope, jemanja ni ŵimkusimwajiganyaga jemanjajo.

³⁴ Yakuwala yenu yicejele ni miasi ja ŵandu ŵakulaga ŵangalemwa. Jemanja nginimwasimana ŵanduwo ali mkasanya majumba. “Atamose kuti yindu yili myoyo,

³⁵ Jemanja mkuŵecetaga kuti, ‘Tuli ŵangalemwa, lutumbilo lwa Mlungu lutondweŵe sambano!’ Une tinjimjimbape magambo ligongo lyakuŵeceta kuti nganimlemwa.

³⁶ Ana ligongo cici mkulinyosya mwacimsyene pagambaga kucengacenga matala genu! Iguputo tacimkamulisya liganga lya moto mpela muŵamtendekasisye jemanja soni Asiliya ŵala.

³⁷ Timcikopoka kweleko jwalijose jwa jemanjaji ali akamwile makono ku mtwe. Une AMBUJE nakanile ŵimkusimwajegamila jemanja, nipo jemanjajo ngisamkamucisya atamose panandi.”