Yelemiya 19 - Chiyawo Bible

Citagu ca lulo lwekasice

¹ AMBUJE* ŵasalile kuti, “Mjawule mkasume lulo lwa litaka kwa mundu jwakugumba ulo. Mwajigale soni acakulungwakulungwa ŵane ni ŵakutaga mbopesi ŵane ŵali ŵacikulile,

² ni mjawule ku Ciŵata ca Benihinomu, ciŵandika ni Cipata ca Mapale ni mkajenesye yingumsalila apanoyi.

³ Mkaŵecete kuti, jemanja ayimwene ŵa ku Yuda ni wosope ŵakutama mu Yelusalemu, pikanani maloŵe ga AMBUJE. AMBUJE Ŵamaciligosope, Mlungu jwa Aisalaeli, akuŵeceta kuti, ‘Tinjipeleka likungu lyakogoya pa malo agano, myoyo jwalijose jutacipikana tacitojima mnope.

⁴ Pa ligongo lyakuti ŵandu anganile une, nambo soni asakesye malo agano pakututumisya ubani* kwa milungu jine jele jemanjajo, acinangolo ŵawo atamose ayimwene ŵa ku Yuda ngakujimanyilila. Ŵasulucisye miasi ja ŵandu ŵangalemwa pa malo agano.

⁵ Ŵataŵile sanja jakumlambililapo Baala, ni kupelecelapo ŵanace ŵawo kwa Baala* kuti aŵe mbopesi jakutinisya. Une nganinalamula jemanjajo kutenda yeleyi, kapena kuyiŵeceta atamose kuyiganisya, amta panandi.

⁶ Ali ni ligongo lyakwe ndaŵi jikwisa jakuti malo agano ngasigakolanjidwa soni kuti Tofeti kapena Ciŵata ca Hinomu. M'malo mwakwe tigacikolanjidwa kuti Ciŵata Cakuwulaga.

⁷ Pa malo agano tinjisokonesya nganisyo sya ŵandu ŵa ku Yuda ni ku Yelusalemu. Ŵandu ŵakutama mwelemo tinjawulajisya kwa amagongo ŵawo ku ngondo. Mitembo jawo tijiciŵa cakulya ca yijuni ni yinyama ya mwitinji.

⁸ Msinda welewu tinjiwusandusya kuŵa malo gakunyalaya, nambo soni gakulilisya mwa woga. Jwalijose jwakupita pelepo tacinyalayidwa ni malogo nipo tacigumila mwa woga ligongo lya wonasice wakwe.

⁹ Amagongo taciwusyungulila msindawo kuti awulaje ŵandu ŵakutama mwelemo. Tacakanganicisya ŵandu ŵakutama mu msindamo kuti alye ŵanace ŵawo ŵakuliŵelecela ŵacalume ni ŵa acakongwe.’

¹⁰ “Sambano m'mwejo timkase lulo lula, ŵandu wosope ŵitimcilongana nawo ŵala ali mkulola.

¹¹ Myoyo timwasalile kuti, amu ni mutinjajonanjila ŵandu ŵeleŵa, mpela mwele jwakugumba malulo mwakusakasila lulo lwakwe, mwakuti ngaŵa mkomboleka kulugumba soni. Ŵandu ŵawewo tacisicidwa ku Tofeti, pa ligongo lyakuti kwine kulikose tikuciŵa kuli kwangali malo gakuti ŵasice jemanjajo.

¹² Amu ni mucinjitendela nago malo gano pamo ni ŵandu ŵakwe. Msinda welewu tinjiwutenda kuŵa mpela wa Tofeti.

¹³ Nyumba sya Yelusalemu nambo soni sya ayimwene tinjisitenda kuŵa mpela sya ku Tofeti, pa ligongo lyakuti sili nyumba syele pa misakasa jakwe ŵatinicisyaga mbopesi kwa milungu ja mwinani ni kupelekaga mbopesi ja yakumwa kwa milungu jine.”

¹⁴ Kaneko Yelemiya ŵawusile ku Tofeti, kuŵamtumile AMBUJE kuti akalocesye kula, ni ŵajimi mu luŵala lwa Nyumba ja AMBUJE. Jwalakwejo ŵasalile ŵandu wosope kuti,

¹⁵ AMBUJE Ŵamaciligosope, Mlungu jwa Aisalaeli akuŵeceta kuti, “Tinjipeleka likungu ku msinda awuno pamo ni misi jakwe josope mpela munaŵecetele, ligongo lyakuti ŵandu ŵakwe ali ŵakucalamandala mitima, soni akukana kugapikanila maloŵe gangu.”