Yelemiya 18 - Chiyawo Bible

Yelemiya ku nyumba ja jwakugumba yiŵiga

¹ AMBUJE* ŵasalile une kuti,

² “Mnyakuce ni mjawule ku nyumba ja mkugumba yiŵiga, kweleko tingampe utenga wangu.”

³ Myoyo une nanyakwice kwawula ku nyumba ja mkugumba yiŵiga jula, ni namsimene ali mkugumba yiŵiga.

⁴ Naga cindu cakugumbaco cilemele, jwalakwe jula jwagumbaga soni cindu cine pakukamulicisya masengo litaka lilyolyo, mpela mujwasacilaga msyene mkugumba jula.

⁵ Sambano AMBUJE ŵambusisye kuti,

⁶ “Ana une nganingola ufulu wakutenda kandu pa jemanja Aisalaeli mpela mujwatendele mkugumba yiŵiga ni litaka lyakwe lila? Jemanja mli m'magasa mwangu mpela mulikusaŵela lilongo myala mwa jwakugumba yiŵiga.

⁷ Naga ndaŵi jilijose nguwukalamusya mtundu wa ŵandu kapena ucimwene kuti tinjiwugwisya ni kuwujonaga,

⁸ naga mtundu unawukalamwisyewo ukuleka kundemwecesya, ni kuti une ngasimbeleka cilango mpela munaganicisyaga.

⁹ Myoyo soni naga ngusaka kutandisya kapena kuwutamilisya mtundu kapena ucimwene wine,

¹⁰ nambo mtunduwo ukupitilisyaga kutenda yakusakala pameso pangu, ni kungambikanila, myoyo ngasinawutendela soni yambone yinasosaga kuwutendela.

¹¹ Sambano mkasalile ŵandu ŵa ku Yuda ni ku Yelusalemu kuti AMBUJE akuti, Une nguliŵicila cile pa yakuti nimtende jemanja, nguganisya yakuti nimpe cilango. Mwujilani sambano, jwalijose alece matala gakwe gakusakala. Kolosyani ndamo ni yitendo yenu.

¹² Nambo jemanjajo tacijanga kuti, ‘Yeleyi yili yangali mate! Tutendeje mutukusacila, soni jwalijose jwa uwe tacigambaga kukuya yakusakala ya mtima wakwe wakucalamandala.’ ”

Ŵandu akwakana AMBUJE

¹³ Ali ni ligongo lyakwe AMBUJE akuŵeceta kuti, “Mkawusye ŵandu ŵa mitundu josope, naga sikati ja jemanjajo apali jwine juŵapikenepo yeleyi. Ŵandu ŵa ku Isalaeli ŵele uŵaliji mpela mwalimwalipe atesile cindu cakusakala mnope.

¹⁴ Ana lipundugulu likusamala pa malwala ga mwitumbi lya Lebanoni? Ana sulo sya mesi gakusisima gakutyocela Kwitumbi lya Lebanoni gakusapwa?

¹⁵ Nambo ŵandu ŵangu andiŵalile une; akusajitutumicisya ubani* milungu ja unami. Akusakuŵala m'matala gawo; giŵajendagamo kala, mwakuti sambano akwendaga m'matala gamwitinji, kuleka matala gambone.

¹⁶ Cilambo cawo akusacitendesya kuti ciŵe cakunyalaya, ni cakutendekasya kulila mtande wa woga mpaka kalakala. Jwalijose jwakupitamo taciŵa jwakusimonga ni kupukunya mtwe.

¹⁷ Tinjapwilinganya pameso pa amagongo ŵawo mpela luwundu lwalukwika ni mbungo jajikupuga kutyocela kungopoko lyuŵa. Tinjatundumalila jemanjajo, mwakuti ngisinakamucisya yipwetesi patiyiciyika.”

Amagongo ŵa Yelemiya akumtenda ciswamba

¹⁸ Kaneko ŵandu ŵatite kuti, “Kwende tulangane yakuti tumtende Yelemiya. Ŵakutaga mbopesi ŵakutulongolela tuciŵa nawope. Tuciŵa nawo ŵandu ŵalunda ŵakutusalila yakwenela kutenda, ŵakulocesya ŵakutulalicila maloŵe ga Mlungu. Kwende tupate magongo gakuti tumjimbe magambo, soni tulece kupikanila yakuŵeceta jwalakwejo.”

¹⁹ Myoyo, napopesile kwa Mlungu njitiji kuti, “Ŵalakwe AMBUJE, ambikanile, apikane yele yakumbecetela amagongo ŵangu.

²⁰ Ana cakusakala mpaka ciŵe malipilo ga cambone? Asolele lisimbo kuti ngwilemo. Akumbucile kuti paja nayice kwa ŵalakwe kukwapopelela jemanjajo kuti alece kwatumbilila.

²¹ Myoyo ŵape cilango ŵanace ŵawo pakwagwicisya sala; ŵajonaje jemanjajo ni upanga, aciŵamkwawo aŵe ŵamasije, soni ŵangali ŵanace. Acalume ŵawo awe ni ma ulwele gane ni gane, ni acacanda ŵawo akawile ku ngondo.

²² Ŵatumicisye likuga lya asilikali ŵa ngondo kuti lipute ngondo ni jemanjajo mwacisisimucisya, soni kulila kwa woga kupikanice m'majumba mwawo. Jemanjajo asosile lisimbo lyakuti ambonyelemo, soni atejile sajo syangu ni citega.

²³ AMBUJE, ŵalakwe akumanyilila yiswamba yawo yosope yakusaka kumbulaga une. Akasiŵakululucila yakusakala yawo, kasiŵatyocesya ulemwa* wawo. Ŵakunde jemanjajo kuti apundidwe pameso pa ŵalakwe, soni ŵape cilango mu lutumbilo lwa ŵalakwe.”