Yelemiya 17 - Chiyawo Bible

Ulemwa ni cilango ca ŵandu ŵa ku Yuda

¹ AMBUJE* akuŵeceta kuti, “Ulemwa* wa ŵandu ŵa ku cilambo ca Yuda uli welembedwe ni cakulembela cacisyano, cele lusonga lwakwe luli lwa liganga lya dayamondi. Ulemwawo ulembedwe pa mitima jawo soni ugobedwe pa ndumba sya malo genu gakupelecela mbopesi.

² Ŵandu ŵenu akusalambila pa malo gakupelecela mbopesi ni gele gamŵicile mlungu jwamkongwe jwakolanjidwa Ashela pasi pa yitela yakutenjela mnope, ni pa matumbi ga mcilambomo.

³ Tinjipeleka yipanje yenu ni katundu jwenu josope kwa amagongo ŵenu, kuti yiŵe malipilo ga ulemwa wenu wakutendecekwa mcilambo cenu cosope.

⁴ Timcijasa cilambo cinampele kuti ciŵe cenu. Tinjimsandusya kuŵa acikapolo ŵakwatumicila amagongo ŵenu mcilambo cimkakucimanyilila. Lutumbilo lwangu luli mpela moto wawukukolela, nipo tiwucikolela mpaka kalakala.”

Yakuŵeceta yakulekanganalekangana

⁵ AMBUJE akuŵeceta kuti, “Likungu kwa mundu jwakusajegamila pa mundu mjakwe, jwele jwakusaŵika cikulupi cakwe pa mundu mjakwe kuti amkamucisye jwalakwejo, citamileco jemanjajo ali angalawucile une.

⁶ Jwamti myoyojo taciŵa mpela mawukutu ga mcipululu, gagakusamela mu cipululu mwamuli mwangali mesi, pa litaka lya cijete kwele ŵandu ngaŵa mkomboleka kutamako.

⁷ “Nambo tinjipeleka upile kwa ŵele ŵakusaŵika cikulupi cawo mwa une.

⁸ Taciŵa mpela citela cakupandidwa mungulugulu lusulo, cele cikusatambalalisya miciga jakwe mungulugulu mwa mesi. Cangajogopa naga kutesile citukuta pakuti masamba gakwe ganganyala. Cangadandawula mu ndaŵi ja cilala soni cangaleka kusogola yisogosi.

⁹ “Mtima wa mundu uli cindu cakunyenga mnope kupunda yindu yosope; kusakala kwakwe kuli kwangapikana mtela kula. Ana ŵani ŵampaka apakombole kuwupikanicisya?

¹⁰ Une AMBUJE ngusawungunya nganisyo sya mundu ni kuwupima mtimawo. Ngusinamtendela mundu jwalijose mwakulingana ni ndamo syakwe nambo soni mwakwenela ni masengo gakwe.”

¹¹ Mundu jwakusapata mbiya pakwajiŵila ŵandu ŵane, ali mpela cijuni cacikusawutamila ni kusosola mandanda gimkanigaŵa gakwe. Masiku mkanigatupe, yipanjeyo yikusiyim'malila, pambesi pakwe akusaŵa mpela jwakuloŵela.

¹² Nyumba jetu jakupopelelamo jili mpela citengu ca ucimwene ca lumbili, cakutamilicika petumbi kutyocela pandanda.

¹³ AMBUJE, ŵalakwetu ali cembeceyo ca Aisalaeli wosope ŵakwakana ŵalakwe tacatesya soni. Wosope ŵakwaleka ŵalakwe tacisimasika mpela mena gakulembedwa pa mcenga, ligongo lyakwakana ŵalakwe AMBUJE, uliŵa wa mesi gakupeleka umi.

Yelemiya akumŵenda Mlungu kuti amkamusye

¹⁴ Ŵalakwe AMBUJE, ambosye ni tinjipola kusyesyene. Angulupusye ni tinjikulupuka kusyesyene. Ŵalakwe ni ŵele ŵingusinalumba.

¹⁵ Ŵandu akumbusya kuti, “Ana ayila yiŵaŵecetaga AMBUJE yila yili kwapi? Yitendekwetu kuti tuyiwone!”

¹⁶ Une ngininakanganicisya ŵalakwe kuti atumisye yakusakala, kapena kusaka kuti lisiku lya yipwetesi liyice, ŵalakwetu akumanyilila maloŵe gigakusatyocela pa ngomo syangu.

¹⁷ Akandendesya woga. Ŵalakwe ali pakutilila pangu, naga likungu lingwilile.

¹⁸ Nambo jwalijose jwakundagasya une ni jutatende soni ngaŵaga uneji.

Kusunga lisiku lyakupumula lya Ayuda

¹⁹ AMBUJE ŵasalile kuti, “Mjawule mkajime pa cipata cekulungwa cakusapitila ŵandu ŵajinji cele ŵandu ŵa ku Yuda akusajinjilila ni kukopocela. Mjawule soni ku yipata yosope ya ku Yelusalemu.

²⁰ Mkasalile kuti: Mpikane maloŵe ga AMBUJE, jemanja ayimwene, ŵandu ŵa ku Yuda, ni ŵandu wosope ŵakutama mu msinda wa Yelusalemu ŵakusajinjilila pa yipatayi.

²¹ Maloŵe ga AMBUJEGO ni aga: Mwusunje umi wenu, mwusamale cenene kuti pa lisiku lyakupumula* mkanyakula katundu, kapena kwinjila najo pa yipata ya Yelusalemu.

²² Mkanyakula katundu jwalijose ni kopoka najo m'majumba mwenu, kapena kukamula masengo galigose pa lisiku lyakupumulalyo kuti liŵe lyeswela, mpela munalamulile acinangolo ŵenu.

²³ Jemanjajo nganapikanila kapena kusamala, nambo ni mitima jawo jakanika ŵakanile kugapikana ni kupocela misyungu jangu.

²⁴ “Nambo naga mkumbikanila, ni kuleka kunyakula katundu kapena kopokaga najo pa yipata ya msinda awuno pa lisiku lyakupumula, nambo kulisunga lisiku lyakupumula kuti liŵe lyeswela ni kungakamula masengo pa lyele lisikuli,

²⁵ ni kuti pa yipata ya msinda welewu tipacijinjililaga ayimwene ŵitacitama pa citengu ca Daudi.* Tacijinjilaga ali akwesile pa mageleta ni pa mahaci, ali pamo ni acimlongola ŵawo ni ŵandu ŵa ku Yuda ni ku Yelusalemu. Ŵanduwo tacitamilicika mu msinda welewu mpaka kalakala.

²⁶ Ŵandu tacityocela ku misinda ja Yuda ni malo gosope gakusyungulila Yelusalemu, ku cilambo ca Benjamini, cilambo ca ku ciŵata, cilambo ca matumbi nambo soni kum'mwela kwa Yuda, ali ajigele mbopesi syakutinisya, mbopesi sya utandi, mbopesi sya ubani,* soni mbopesi syakutogolela kwawula nasyo ku Nyumba ja AMBUJE.

²⁷ Nambo naga ngimkupikanila, ni kuleka kulisunga lisiku lyakupumula kuti liŵe lyakusaguka, nambo soni naga mkunyakula katundu jwalijose ni kwinjilaga pa yipata ya Yelusalemu pa lisiku lyakupumula, ni kuti tinjicoma yipatayo ni moto. Moto tiwucitinisya nyumba sya ucimwene sya ku Yelusalemu, moto wakwe tiwuciŵa wangakomboleka kuwusimisya.”