Yelemiya 15 - Chiyawo Bible

Likungu kwa ŵandu ŵa ku Yuda

¹ Kaneko AMBUJE* ŵasalile kuti, “Atamose kuti Mose* ni Samuele akajime pameso pangu ni kwacondelela ŵandu ŵeleŵa, ngamkaninakolela canasa ŵandu ŵeleŵa. Mwatyosyani, kuti ngawona soni, ajawuleje basi.

² Naga akamwusye kwakuŵajilwa kwawula jemanjajo, m'mwejo mkasalile kuti Une mbecete kuti: Ŵakwenela kuwa ni yilwele taciwa ni yilwele ŵakwenela kuwa ni upanga taciwa ni upanga, ŵakwenela kuwa ni sala ni taciwa ni sala, ŵakwenela kujigalidwa kwawula ku ukapolo tacijawula ku ukapolo!

³ Une AMBUJE nganisisye kuti yindu mcece yakogoya mnope tiyatendecele jemanjajo: taciwulajidwa ku ngondo, yilu yawo tiyicitawunidwa ni m'mbwa, yijuni tiyicalya jemanjajo, soni yinyama ya kwitinji tiyicilya nyama jakusigalila ja jemanjajo.

⁴ Tinjatendekasya jemanjajo kuŵa cindu cakutesya mselu kwa ŵandu wosope ŵa pa cilambo ligongo lya yele yiŵatesile ŵanace ŵacalume ŵa Hesekiya ku Yelusalemu pa ndaŵi jiŵaliji mwenye jwa ku Yuda.”

⁵ AMBUJE akuŵeceta kuti, “Ana jemanja ŵandu ŵa ku Yelusalemu ana tacimtendela ŵani canasa? Ana ŵitacimlilila ŵani? Ana ŵani ŵitacisepuka ni kwika kukumwusya ya umi wenu?

⁶ Une mwanganile, nambo jemanja mkupelenganya kundosya ndungu syenu. Myoyo nanyakwile mkono wangu ni kumjonanga jemanja, ligongo lyakuti mbesile kumkululucila.

⁷ Napwilingenye kumbali syosope, mpela mwakusatendela ni matimba pakupeta ni lupeta. Natendekasisye ŵandu kuti alile ni kwajonanga, pa ligongo lyakuti nganasaka kuleka ndamo syawo syakusakala.

⁸ Mcilambo mwenu mwana acakongwe ŵajinji ŵamasije kupunda mcenga mungulugulu nyasa. Acakongwe nawulajile ŵanace ŵawo ali ŵacinandipile. Mwacisisimucisya, natendekasisye kuti aŵe ŵa canasa ni woga.

⁹ Jwamkongwe juŵawile ŵanace ŵakwe msano ni ŵaŵili jukomwece, akupumula mwakupumasika. Cipi cimyicilile kuli ciŵela musi. Ŵatendekasisye soni ni ajasile mtima. Ŵakusigala wosope tinjapeleka kwa amagongo kuti ŵawulaje ni upanga. Une AMBUJE mbecete.”

Yelemiya akudandawula kwa AMBUJE

¹⁰ Ŵalakwe mama ŵangu, likungu kwa une, kuti mwambelece une mundu jwakukangana ni jwakusisyana ni ŵandu ŵa pa cilambo cosope. Nganingongola kandu kwa mundu kapena kumkongosya mundu kandu. Nambo ŵandu wosope akundwesa.

¹¹ AMBUJE ŵajanjile kuti, “Yakuwona kuti tinjimcenjela kuti msimane cenene. Amagongo ŵenu tacimdandawulila pa ndaŵi ja likungu ni yisawusyo.

¹² Jemanja ŵandu ŵa ku Yuda, mwampaka mlepele kuswanya cisyano cewanganye ni liganga lya bulonsi, jemanja ngaŵa mkwapunda amagongo ŵenu ŵitacityocela kumpoto.

¹³ “Yipanje yenu yosope pamo ni katundu jwenu tinjapa jemanjajo, ligongo lyakuti ulemwa* wenu uli wejinji pa cilambo cosope.

¹⁴ Tinjimtenda jemanja kuŵa acikapolo ŵa amagongo ŵenu mcilambo cele ngimkucimanyilila jemanja. Kusyene kuti lutumbilo lwangu lukolele mpela moto, ni tilucimjoca kwangalecesya.”

¹⁵ Une natite kuti, “Ŵalakwe AMBUJE akusamanyilila yosope. Angumbucile soni angamucisye. Apelece cilango kwa ŵandu ŵakulagasya. Andendele canasa, akasumula umi. Alole yisawusyo yingusimana nayo ligongo lya ŵalakwe.

¹⁶ Pinapikene maloŵe ga ŵalakwe, nagapocele cenene, maloŵego gambele lukondwa ni kusangalala. Ŵalakwe AMBUJE Ŵamaciligosope, ngusamanyika ni lina lyawo.

¹⁷ Nginingola ndaŵi jakutama ni ŵandu ŵane, kusekaga ni kusangalala nawo. Natamaga jikape ligongo lyakuti ligasa lya ŵalakwe lyaliji pa une, nipo mu mtima mwangu mwagumbele lutumbilo.

¹⁸ Ligongo cici yipwetesi yangu ngayikumala? Ligongo cici maŵanga gangu ngigakumala? Ligongo cici maŵanga gangu ngigakupola? Ana akusaka kundandawulisya une mpela lusulo lwalukusajumula mu ndaŵi ja cawu?”

¹⁹ AMBUJE ŵajanjile kuti, “Naga mkwika kwa une tinjimpocela soni. Pitimŵeceteje yisyesyene, ngaŵaga yakusakala, timciŵa ŵakuŵecete m'malo mwa une. Ŵandu ŵeleŵa akwenela kwika kwa m'mwejo nambo m'mwejo mkawujila kwa jemanjajo.

²⁰ Tinjimtenda kuŵa ŵakulimbangana mpela lipupa lyakucinjilicisya lya cisyano kwa ŵanduwo. Jemanjajo tacilimbana ni m'mwejo, nambo ngisampunda, pakuti une ndili ni m'mwejo, tinjimcenjela ni kumkulupusya.

²¹ Tinjimcenjela kwa ŵandu ŵakusakala, soni tinjimwombola kwa ŵandu ŵangalwe,” Une, AMBUJE nguti myoyo.