Yelemiya 12 - Chiyawo Bible

Madandawulo ga Yelemiya

¹ Ŵalakwe AMBUJE* ndili ndite kuti sisyane ni ŵalakwe, ŵalakwetu ni ŵampaka aŵe ŵakulondola nditu. Nambope ngusaka kwawusya ŵalakwe ciwusyo cakwamba magambo gangu. Ana ligongo cici ŵandu ŵakusakala yindu yikusiyajendela cenene? Ana ligongo cici ŵandu ŵangakulupicika akusaŵa pambone?

² Ŵalakwetu ŵapandile jemanjajo, nipo wamesile miciga. Akusakula, ni kusogolaga yisogosi. Akusanonyela kuŵeceta ya ŵalakwe, citamileco mitima jawo jili kwakutalika ni ŵalakwe.

³ Nambotu ŵalakwe AMBUJE akusamanyilila une. Akundola, nipo akusawulinga mtima wangu, ni kuwona kuti une ngusinanonyela ŵalakwe. Ŵawute ŵandu ŵakusakala mpela ngondolo syasikuja kuwulajidwa. Ŵaŵice jemanjajo pambali mpaka lisiku lyakuja kuwulajidwa.

⁴ Ana ŵandu ŵa mcilambo taciŵa ali mkulila mpaka cakaci? Nambi manyasi ga mcilambomo tigaciŵa gejumu mpaka cakaci? Pangali yijuni kapena yinyama yayisigele ligongo lyakuti ŵandu ŵakutama mwelemo ali ŵakusakala kwejinji. Jemanjajo akusati, “Mlungu ngasayiwona yitiyicitutendecekwela uwe pa masiku gambesi.”

⁵ AMBUJE ŵajanjile kuti, “Yelemiya, naga kukumpesya kuwutuka ni ŵandu, ana timcipakombola uli kutenda mpikisano ni mahaci? Naga mkulepela kulimbangana mcilambo camboneci, nambi timcitenda uli mu ukweti wa ku Yolodani?

⁶ Atamose acalongo acimjenu, ŵane ŵa mwiŵasa mwenu, amlambwisye m'mwejo, wosopewo akusasaka ya kumjimba m'mwejo magambo, myoyo mkasimwakulupilila jemanjajo, atamose ali aŵecete ni m'mwejo maloŵe gambone camtuli.”

AMBUJE akwatendela canasa ŵandu ŵakwe

⁷ AMBUJE akuŵeceta kuti, “Nililesile liŵasa lya Isalaeli, najasile ŵandu ŵinasagwile. Ŵakunonyeledwa ŵangu napelece kwa amagongo ŵawo.

⁸ Ŵandu ŵangu ŵakusagulidwa aŵele sambano mpela masimba ga mwitinji, akusangumila une mwa ukali. Ali ni ligongo lyakwe ngusaŵengana nawo.

⁹ Ŵandu ŵakusagulidwa ali mpela cijuni ca maŵalamaŵala cele cisinjidwe ni yitotola kutyocela mbali syosope. Mkayisonganye yinyama yakwitinji, ni myice nayo akuno ku cindimba.

¹⁰ Ŵakucinga ŵajinji ŵajonasile mgunda wenu wa mipeleya, ŵapondilepondile mgunda wangu. Mgunda wambone ula ŵawusandwisye cipululu.

¹¹ Yisyene ŵawusandwisye cipululu, ukundilila une uli jikajikape. Cilambo cosope cisandwice cipululu, soni pangali jwakusamala ya yeleyo.

¹² Ŵandu ŵakonanga apwilinganile ku mikuli josope ja mcipululu, mwakuti une AMBUJE natumisye ŵa ngondo kuti akajonaje cilambo cosope, kutyocela ku mtepa mpaka ku mtepa wine. Pangali jwalijose jwampaka atame mwa mtendele.

¹³ Ŵandu ŵamisile tiligu, nambo ŵagowele miŵa. Ŵakamwile masengo mwakulimbika, nambo nganapindula kalikose. Yakugowola yawo yili yakutesya soni, ligongo lya lutumbilo lwakogoya lwa AMBUJE.”

Ya Cilanga ca AMBUJE ku yilambo yakuŵandikana ni ca Isalaeli

¹⁴ AMBUJE akuŵeceta kuti, “Ŵandu wosope ŵakusakala ŵakutama myilambo yayiŵandikene ni cilambo ca Isalaeli, akwasumulaga Aisalaeliwo cilambo, cinapele ŵandu ŵanguwo. Pa ligongo lyeleli une tinjatyosya mcilambo celeco, soni tinjityosya liŵasa lya Yuda pasikati pawo.

¹⁵ Nambope pitinjatyosyapo, tinjatendela canasa, nipo tinjiwuwucisya soni mtundu uliwose ku cilambo cawo.

¹⁶ Naga jemanjajo tacilijiganya cenene ni mitima jawo josope matala ga ŵandu ni kulumbila* mu lina lyangu kuti, ‘Pana AMBUJE ŵacijumi,’ mpela jemanjajo muŵajiganyicisye ŵandu ŵangu, kulumbila mu lina lya Baala,* ni kuti jemanjajo tinjatamika sikati ja ŵandu ŵangu.

¹⁷ Nambo naga mtundu uliwose ngasiwumbikanila une, tinjiwujonanga. Une AMBUJE mbecete myoyo.”