Yelemiya 11 - Chiyawo Bible

Yelemiya ni Cilanga ca AMBUJE

¹ AMBUJE* ŵamsalile Yelemiya kuti,

² “Mpikane maloŵe ga cilanga* aci, ni mŵecete nawo ŵandu ŵa ku Yuda ni ŵa ku Yelusalemu.

³ Mwasalile kuti maloŵe ga AMBUJE, Mlungu jwa Aisalaeli ni aga: Alwesece mundu jwangakusunga maloŵe ga cilanga,

⁴ cinatesile ni acinangolo ŵenu pinakopwesye mcilambo ca Iguputo. Pinatyosisye ku ng'aso sya moto sila, nasalile kuti, ‘Naga mumbikanileje ni kutenda yingumsalila, jemanja timciŵa ŵandu ŵangu, nipo une tinjiŵa Mlungu jwenu.

⁵ Myoyo tinjitenda yinatesile cilanga kwa acinangolo ŵenu mwakulumbila, yakuti tinjapa cilambo cangasoŵa cine cilicose, mcilambo cimkutamaci.’ ” Sambano une najanjile kuti, “Yiŵe myoyo, ŵalakwe AMBUJE.”

⁶ Sambano AMBUJE ŵasalile kuti, “Mgombelesye maloŵe gosopega ku misinda ja ku Yuda ni m'misewu ja ku Yelusalemu. Mwasalile kuti. ‘Mpikane maloŵe ga cilanga aci, ni mgasunje.

⁷ Mwa ndaŵi ni ndaŵi mbele ndili mkwakalamusya acinangolo ŵenu kutyocela pa ndaŵi jinakopwesye ku cilambo ca Iguputo mpaka lelo jino. Mbele ndili mkwasalila kuti, “Mpikanile maloŵe gangu.”

⁸ Nambo jemanjajo nganayikamulisya masengo. Jwalijose jwagambile kumusya mtima wakwe, ni kukuyaga ndamo syakwe syakusakala. Nalamwile kuti asunje cilanga cangu, nambo jemanjajo nganacisunga. Ali ni ligongo lyakwe napele cilango mpela munaŵecetele.’ ”

⁹ Kaneko AMBUJE ŵasalile kuti, “Ŵandu ŵa ku Yuda ni ku Yelusalemu anjimucile.

¹⁰ Awujilile soni kutenda ulemwa* wa acinangolo ŵawo uŵakanile kumbikanila une, nipo akujikuya milungu jine ni kujipembesyaga. Ŵandu ŵa ku Isalaeli ni ku Yuda akasile cilanga cinatesile ni acinangolo ŵawo.

¹¹ Ali ni ligongo lyakwe une AMBUJE nguŵeceta kuti jemanjajo tinjaŵika mu yipwetesi yitacilepela kuyiŵambala atamose talile camtuli kwa une, ngisinapikanila.

¹² Ŵandu ŵa m'misinda ja ku Yuda ni Yelusalemu tacijawula kuŵenda cikamucisyo kwa milungu jawo jiŵajipaga mbopesi. Nambo milungujo ngaŵa mkomboleka kwakulupusya jemanjajo pa ndaŵi ja yisawusyo yawo.

¹³ Yisyene, jemanja ŵandu ŵakutama ku Yuda, milungu jenu jitupile mpela ciŵalanjilo ca misi jenu. Malo gakutinicisya mbopesi kwa Baala* gatupile mpela misewu ja mu Yelusalemu.

¹⁴ Sambano m'mwe Yelemiya, mkasimwapopelela ŵandu ŵeleŵa. Mkasimwaŵendela cikululucilo ca ulemwa wawo kwa une kapena kudandawula m'malo mwa jemanjajo. Une, ngisinapikanila pitaciŵilanga pa lina lyangu mu ndaŵi ja yisawusyo yawo.

¹⁵ Ana ŵandu ŵakunonyeledwa tacitenda cici m'Nyumba mwangu? Ana ngaŵaga jemanja jila ŵatesile yakusakala mnope? Ana kulumbila* kwenu ni nyama syakupeleka ku mbopesi ngaŵa mkomboleka kumcinjilicisya ku likungu lyenu?

¹⁶ Kalakala, Mlungu ŵam'wanicisyaga jemanja ni citela ca olifi* cetenjele mnope ni ca yisogosi yakusalala. Nambo sambano tacicijoca ni kokoma kwamti mpela kwa njasi, nipo nyambi syakwe tisicitinika.

¹⁷ AMBUJE Ŵamaciligosope ŵiŵampandile, alamwile kuti tampe jemanja cilango cakogoya, ligongo lya yakusakala yimwatesile, jemanja ŵa mwiŵasa lya Isalaeli ni Yuda. Mumtumbilisye Mlungu pakupeleka mbopesi syakutinisya kwa Baala.”*

Ŵandu akumtenda ciswamba Yelemiya

¹⁸ AMBUJE ŵanjuwulile, nipo nayimanyi ya ciswamba ca ŵandu. Jwalakwejo jwawugwile meso gangu, ni kundosya masengo gawo gakusakala.

¹⁹ Naliji mpela mwanace jwangondolo jwakwawula najo kukumwulaga. Nginimanyilila kuti yikwamba pa une, ya ciswamba ciŵaliŵicilaga cile ni kuŵecetaga kuti, “Kwende tucikate citelaci cili cijumi. Kwende tumwulaje mundu jweleju, kuti akakumbucila soni.”

²⁰ Kaneko napopesile kuti, “AMBUJE Ŵamaciligosope ŵakusalamula mwakulungamika, ŵele ŵakusalinga mtima ni nganisyo sya mundu, alolecesye kuti ŵalakwe ŵawucisye jemanjajo, pakuti yosope nayipelece m'myala mwa ŵalakwe.”

²¹ Ali ni ligongo lyakwe Mlungu akuŵeceta ya ŵandu ŵa ku Anatoti ŵakusaka konanga umi wangu ni kuŵecetaga kuti mkalocesya mu lina lya AMBUJE kogopela kuti tutakumwulaga.

²² Ali ni ligongo lyakwe AMBUJE Ŵamaciligosope ŵaŵecete kuti, “Tinjapa cilango. Acacanda ŵawo taciwulajidwa ku ngondo. Ŵanace ŵawo ŵacalume ni ŵacakongwe taciwa ni sala.

²³ Ngasakulupuka atamose jumo jose, ligongo tinjijonaga ŵandu ŵa ku Anatoti, piticicikwana caka cawo cakupegwa cilango.”