Yelemiya 10 - Chiyawo Bible

Ya milungu ja unami ni ya dini jisyesyene

¹ Jemanja ŵandu ŵa ku Isalaeli mpikane maloŵe gakumsalila AMBUJE,*

² Jwalakwejo akuŵeceta kuti, “Mkakuya ndamo sya ŵandu ŵa mitundu jine.* Mkatenda woga ni yimanyisyo yakumasya lunda yayikuwoneka kwinani, atamose kuti ŵandu ŵa mitundu jine akusatenda nayo woga yeleyi.

³ Ndamo sya ŵandu ŵeleŵa sili syangali mate. Jemanja jila akusajawula kukata citela ku ukweti, nipo mundu jwakwete ufundi akusepa citela cila ni liŵago.

⁴ Ŵandu ŵane akusacisalalisya cakusepaco ni golidi* ni silifa,* kaneko akusacikomela ni misomali, kuti cikatenganyikaga.

⁵ Milungu jawo ja unami jili mpela yakuŵinjila yijuni m'matimbe ga mpunga; mwakuti ngaŵa mkupakombola ni kuŵeceta kose. Akwenela kuyinyakula pakuti ngaŵa mkwenda jisyenepe. Mkasiyijogopaga yeleyo, pakuti ngaŵa kumtenda jemanja cakusakala cilicose nambo soni yangali macili gakutendela cambone cilicose.”

⁶ AMBUJE, pangali jwalijose jwampaka alandane ni ŵalakwe, Ŵalakwe ali ŵakulungwa mnope, soni lina lyawo lili lyamacili mnope.

⁷ Ana ŵani mpaka alece kwajogopa ŵalakwe, mwenye jwa mitundu josope ja ŵandu? Kuli kwakusosekwa kwajogopa ŵalakwe; pakuti sikati ja ŵandu wosope ŵalunda nambo soni sikati ja ayimwene wosope ŵa pa cilambo capasi pano, pangali jwalijose jwampaka alandane ni ŵalakwe.

⁸ Wosope ŵenewo ali ŵakuloŵela ni ŵangali lunda. Lunda lwawo akusalijiganya kutyocela ku milungu jawo ja unami jakupanganyidwa ni citelajo.

⁹ Milungu jawojo akusajisalalisya ni silifa jwa ku Talishishi ni golidi jwa ku Ufasi. Milungu jawojo gali masengo gakupanganyidwa ni afundi ni afundi ŵakumanyilila kusokota golidi. Akusajiwecaga milungujo nguwo syakunyesimila ni syecejewu. Yosopeyi gali masengo ga afundi.

¹⁰ Nambo AMBUJE ali Mlungu jusyesyene, jwalakwejo ali Mlungu jwa cijumi nambo soni ali mwenye jwampaka kalakala. Cilambo capasi cikusatenganyika ni ukali wa AMBUJE, soni ŵandu ŵa mitundu jine ngaŵa mkupakombola kupimilila ni ukali wakwewo.

¹¹ Jemanja mkasalile ŵanduwo kuti jele milungujo nganijipanganya cilambo cakwinani ni cilambo ca pasi, tijicijonasika palipose, pa cilambo capasi.

Nyimbo jakumtogolela Mlungu

¹² AMBUJE ni ŵiŵapanganyisye cilambo capasi ni macili gakwe. Jwalakwejo ni juŵapanganyisye yosope ni lunda lwakwe soni ni ufundi wakwe, jwalakwejo ŵatambasukwile mawunde ga kwinani.

¹³ Jwalakwejo naga ali aŵecete, kukusapikanika kukukuma kwa mesi kwinani, jwalakwejo ni jwakwikasya mawunde kutyocela kumbesi kwa cilambo capasi. Jwalakwejo akusatendekasya kuti njasi jimesye mu ula ni kujitumisya mbungo kutyocela kwele kwakusajisunga.

¹⁴ Ŵandu wosope ali ŵakuloŵela ni ŵangali lunda. Fundi jwalijose akusatenda soni ni milungu jakwe. Milungu jakusapanganya jemanjajo jili ja unami, mwa milungu jelejo mwangali umi.

¹⁵ Milungujo jili jangali mate, jikwenela kusecedwa, soni pa ndaŵi jiticipegwa cilango, milungujo tijicijonasika.

¹⁶ Nambo jwalakwe jula jwali Mlungu jwa Yakobo,* nganaŵa mpela milungu jinejo, Jwalakwejo ali mkupanganya jwa yosope. Jwalakwejo ŵasagwile Aisalaeli kuti aŵe ŵandu ŵakwe, lina lyakwe lili AMBUJE Ŵamaciligosope.

Kulocesya kwakwawula ku ukapolo

¹⁷ Jemanja ŵandu ŵa mu Yelusalemu, amagongo ŵenu awusyungulile msinda uno, myoyo msonganye katundu jwenu, ngamleka pasi.

¹⁸ AMBUJE akuŵeceta kuti, “Sambano tindyosye ŵandu wosope mcilambo muno. Tinjaŵika pa yipwetesi, mpaka wosope ŵene ali amasile.”

¹⁹ Jwalijose jwaliji mkuŵeceta acitiji, “Ngondone, ligongo lya yipwetesi yakogoya! Liŵanga lyangu lili lyakutesya canasa. Kalakala natiji kuti celeci cili cilango cangu, ngambe kupimilila basi!

²⁰ Matenti getu gajonasice, soni ngonji syakwe syosope sikatice. Ŵanangu andesile ni kwangali soni. Pangali soni jwine jwakuti mpaka aninganyicisye tenti, kapena jwakuti atambasukulanye nguwo syakwe.”

²¹ Najanjile kuti, “Acimlongola ŵetu ali ŵakuloŵela; jemanjajo ŵangaŵenda lunda kwa Mlungu. Ali ni ligongo lyakwe yindu ngiyikwajendela cenene, soni ŵandu ŵetu apwilingene.

²² Mpikane, kuyice ngani. Kumpoto kukutyocela likuga lya ŵandu lilimkutenda masegwe; asilikali ŵakwe ŵa ngondo tacimjonanjilatu misinda ja ku Yuda, kuti jiŵe m'masame, mwakutama makule.”

²³ Ŵalakwe AMBUJE, ngumanyilila kuti umi wakwete mundu nganiwuŵa wakwe; mundu ngaŵa mkomboleka kulilongolela jikape.

²⁴ Anjongolele, ŵalakwe AMBUJE, nambo mwa kulungamika. Akandumbilila kogopela kuti amta kunjonanga.

²⁵ Ukali wa ŵalakwe ukolele pa ŵandu ŵa mitundu jine jikakwamanyilila ŵalakwe, gopolela kuti ŵandu ŵangalambila ŵalakwe. Jemanjajo ŵajonasile ŵandu ŵawo, ni kwajonanga kwakumalilatu nipo cilambo cawo ŵacisyusisye kuŵa masame.