Yelemiya 1 - Chiyawo Bible

Yelemiya

¹ Lina lyangu Yelemiya. Ndili jwakutaga mbopesi, mwanace jwa Hilikiya, jumo jwa ŵakutaga mbopesi ŵakutyocela ku msinda wa Anatoti mu upande wa lukosyo lwa Benjamini. Aga gali maloŵe ga AMBUJE* giŵaŵecete ni une.

² AMBUJE ŵaŵecete ni une pandanda mu caka ca likumi ni yitatu pa ndaŵi jele Yosiya mwanace jwa Amoni ŵaliji mwenye jwa ku Yuda.

³ AMBUJE ŵapelengenye soni kuŵeceta ni une kupitila mu ndaŵi jele Yehoiyakimu mwanace jwa Yosiya jiŵaliji mwenye jwa ku Yuda mpaka pa mwesi wa msano wa caka ca likumi ni cimo ca ucimwene wa Sedekiya mwanace jwa Yosiya mwenye jwa ku Yuda, pa ndaŵi jiŵajigalidwe ŵandu ŵa ku Yelusalemu kuja ku ukapolo.

Kuŵilanjidwa kwa Yelemiya

⁴ AMBUJE ŵasalile kuti,

⁵ “Mkaninimgumbe mcitumbo mwa mama ŵenu, naliji ndili nam'manyilile kala. Mkanimpagwe naliji ndili namsagwile kala, namsagwile kuti mŵe jwakulocesya* kwa ŵandu ŵa mitundu josope.”

⁶ Une najanjile kuti, “Aa, AMBUJE Mlungu! Une ndili mwanace, soni ngingumanyilila kuŵeceta.”

⁷ Nambo jwalakwejo jwanjanjile kuti, “Mkajila kuti, Une ndili mwanace timcijawula kwa ŵandu wosope kwele kutinjimtuma une, nipo timciŵeceta cilicose citinjimtuma.

⁸ Mkatenda woga, pakuti une ndili ni m'mwejo soni tinjimcenjela. Une AMBUJE mbecete myoyo.”

⁹ Sambano AMBUJE ŵatambasukwile mkono wakwe ni ŵakwayiye pakamwa pangu. Ni ŵasalile kuti, “Mpikane, nguŵika maloŵe gangu mkamwa mwenu.

¹⁰ Ngumŵika lelo jino kuti mŵe ni ulamusi pa yilambo yosope ni pa ma ucimwene gawo, kuti mkacuŵe ni gwisya, kuti mkajonanje ni gumula, kuti mkataŵe ni kupanda.”

Mesomkulola gaŵili

¹¹ AMBUJE ŵandosisye cindu cine cakwe kupitila m'mesomkulola. Myoyo ŵambusisye kuti, “Yelemiya, ana mkuciwona cici?” Une najanjile kuti, “Nguluwona lunyambi lwa citela ca mtowo.”

¹² AMBUJE ŵaŵecete ni une acitiji kuti, “Mlolite cenene. Une tinamlosye kuti yitendekwe yinasasile.”

¹³ AMBUJE ŵandosisye soni kaŵili ni ŵambusisye kuti, “Ana mkuciwona cici?” Une najanjile kuti, “Nguwuwona mpika uli mkutokota, uli ulolite kumpoto.”

¹⁴ Kaneko AMBUJE ŵasalile kuti, “Yeleyi yikugopolela kuti likungu lya ŵandu ŵa mcilambo muno tilicityocela kumpoto.

¹⁵ Sambano ndili ciŵandika kusiŵilanga ngosyo syosope sya mu ma ucimwene ga kumpoto. Ayimwene ŵawo taciyika nipo jwalijose taciŵika citengu cakwe ca ucimwene pa yipata yakwinjilila mu msinda wa Yelusalemu, nambo soni pakugasyungulila mapupa gakwe ni kulimbana ni misinda josope ja ku Yuda.

¹⁶ Tinjisala ya magambo gangu mwakusisyana ni ŵandu ŵangu, ligongo lya yakusakala yiŵatesile pakundeka une. Jemanjajo ŵatutumisye ubani* kwa milungu jine, ni kuyilambilaga yindu yiŵapanganyisye acimsyenewo ni magasa gawo.

¹⁷ Nambo m'mwe Yelemiya, mkwenela kuŵa tayale. Nyakukani ni mjawule mkasalile yosope yene yingumlamula m'mwejo. Mkaja kwajogopa jemanjajo, kogopela une komboleka kumjogoya m'mwejo jemanjajo ali mkulola.

¹⁸ Lelo jino une ngumlimbisya mpela msinda wa mapupa, njalamila sya yisyano nambo soni mpela mapupa ga yisyano, kuti m'mwejo mkatenda woga ni jwine jwalijose mcilambo cosope, kanga ayimwene ŵa ku Yuda, nduna sya kweleko, ŵakutaga mbopesi kapena ŵandu wamba.

¹⁹ Jemanjajo tacilimbana namwe, nambo ngasampunda, pakuti une ndili ni m'mwejo nipo tinjimkulupusya. Une AMBUJE ni jumbecete gele maloŵega.”