Yakobo 5 - Chiyawo Bible

Akwagombelesya ŵandu ŵakusicila

¹ Jemanja ŵakusicila, mpikane; mlileje ni kugumila ligongo lya yisawusyo yitiyicimgwila msogolo.

² Cipanje cenu cili cewole soni yijosolo yilile yakuwala ya jemanja.

³ Golidi* ni silifa,* ya jemanja yitesile mkuwo, nipo mkuwowo tiwuciŵa mboni jakumsisya. Mkuwowo tiwucijonanga cilu cenu mpela moto. Mliwunjicile cipanje masiku agano gagali gambesi.

⁴ Ŵamasengo ŵagowola m'migunda jenu nganimwalipila. Mbiya syakwalipilila jemanjajo sikulila mwakumsisya, soni kugumila kwa ŵamasengowo kupikanice m'mapikanilo ga Ambuje wa Macili gosope.

⁵ Mŵele mli mkutenda yindimba, yakuwunonyelesya umi wenu ni yindu ya cilambo capasi. Mlitendesye kuŵa ŵakwimbala kwa lisiku lyakuwulaga ŵandu.

⁶ Mumlamwile mundu jwangalemwa kuŵa jwakulemwa, soni mumwuleje. Jwalakwejo nganalimbalimba nomwe.

Ya cipimililo ni lipopelo

⁷ Acalongo acimjangu mŵeje ŵakupimilila kwembecela kwika kwa Ambuje. Mlole mwakusatendela mundu jwakulima. Akusajembecela kuti yisogosi yakunong'a yiwonece mu mgunda mwakwe.

⁸ Jemanja soni mlisinje mtima. Mlimbe mtima pakuti Ambuje ali ciŵandika kwisa.

⁹ Acimjangu kasimŵecetaga yangalumbana pasikati penu, kogopa kuti Mlungu atakumlamula. Mlole, jwakulamula ajimi pa mlango.

¹⁰ Mkumbucile cisyasyo ca ŵakulocesya ŵiŵaŵecete mu lina lya Ambuje. Jemanja ŵayiweni yisawusyo, nambope ŵapimilile.

¹¹ Ŵandu ŵitukusiŵakolanga kuti ŵana upile, ŵelewo ni ŵaliji ŵakupimilila. Mwayipikene ya kupimilila kwa Yobu, nipo mwayiweni soni yiŵamtesile Ambuje pakumalisya, pakuŵa Ambuje ali ŵacanasa soni ŵakusalala mtima.

¹² Nambo kupunda yosope acalongo acimjangu, mkasimlumbila. Mkasimlumbila pakolanga kwinani kapena cilambo capasi, kapena cine cilicose. Pakusosa kwiticisya kandu mgambeje kuti, “Elo.” Pakusosa kusisya kandu mgambeje kuti, “Iyayi.” Mtendeje iyoyo kogopela kuti Mlungu pakumlamula tacimsimana mli ŵakulemwa.

¹³ Ana jwine mwa jemanja ali myisawusyo? Apopele. Ana jwine asangalele? Ajimbe nyimbo syakumlumba Mlungu.

¹⁴ Ana jwine mwa jemanja akulwala? Ŵaŵilanjisye acakulungwa ŵa mpingo, ŵele tacapopelela soni kwapakasya mawuta gamaswela mu lina lya Ambuje.

¹⁵ Naga tapopele ni cikulupi, jwakulwalajo tacipola, Ambuje tacimjimusya nipo naga jwaliji jwakulemwa Ambuje tacimkululucila ulemwa* wakwewo.

¹⁶ Pesyani yakulemwa yenu jwine ni mjakwe, nipo mpopelelaneje kuti mpole. Lipopelo lya mundu jwakulungama likusaŵa lya macili, nipo lyangapita pacabe.

¹⁷ Eliya* jwaliji mundu mpela uweji. Jwalakwejo jwapopesile kwakulimbika kuti ula jikagwa, nipo ula nganijigwa kusyene kwa yaka yitatu, miyesi msano ni umo.

¹⁸ Piŵapopesile soni, ula jagwile, nipo cilambo catandite soni kumelesya yakumela ya pacilambo.

¹⁹ Acalongo acimjangu, naga jwine mwa jemanja asokonecele ni kuleka usyesyene, nipo mjakwe akumwujilisya,

²⁰ m'manyilile kuti jwele jutacimtendekasya mundu jwakulemwajo kuwujila ku litala lyakwe lya ulemwa, tacikulupusya umi wa mundujo ku ciwa, nipo ligongo lya jwalakwejo ulemwa wejinji tucikululucidwa.