Yakobo 4 - Chiyawo Bible

Ya uganja ni cilambo capasi

¹ Ana ngondo sikusatyocela kwapi? Ana ukangani pasikati jenu ukusatyocela kwapi? Ana ngaŵa yikusatyocela ku yalisosa ya cilu cenu, yayikusatenda ngondo mwa jemanja?

² Mli ŵakuyisosasosa yindu, nambo ŵangayisimana, ni ligongo lyakwe mkusamwulaga mundu. Mkusayikumbila yindu, nambo ngaŵa mkupakombola kuyipata ni ligongo lyakwe mkumenyana ni kutendaga ngondo. Pakuti jemanja ŵangamŵenda Mlungu, ni ligongo lyakwe nganimkola yimkusayisosa.

³ Jemanja ŵangapocela kutyocela kwa Mlungu atamose kumŵenda ligongo akusamŵenda mwa ulemwa. Yindu yayimkusaŵenda yikusaŵa yakumkamucisya ni kumnonyelesya mwasyene.

⁴ Jemanja ŵandu ŵangakulupicika, ana ngamkumanyilila kuti naga mkutenda uganja ni cilambo capasi uli uŵengani ni Mlungu? Iyoyo mundu jwalijose jwakusaka kuŵa pa uganja ni cilambo capasi akusalitenda jika kuŵa m'magongo jwa Mlungu?

⁵ Ana mkupela kuti yiyalembedwe m'maloŵe ga Mlungu yili yangali mate, yayikuti, “Mlungu akusawusosa ni wiwu, msimu wele Ŵalakwewo ŵawuŵisile kuti utameje mwa uweji?”

⁶ Nambo umbone mtima wakwe uli wekulungwa. Ni ligongo lyakwe maloŵe ga Mlungu gakuti, “Mlungu akusiŵasisya ŵakulikwesya, nambo ŵakulinandiya akusiŵapa umbone mtima.”

⁷ Sambano, mlipeleceje kwa Mlungu. Mumkaneje Satana* nipo tacimtila.

⁸ Mwaŵandicile Mlungu, nipo Ŵalakwe tacimŵandicila jemanja. Mtyosye nganisyo syakusakala m'mitima jenu, jemanja ŵandu ŵa unakunaku.

⁹ Lagani m'mitima, mtendeje canasa nipo mlileje misosi kwa jemanja kuŵe kulila nipo kusengwa kwenu kuŵe canasa.

¹⁰ Mlinandiye pameso pa Ambuje, nipo tacimkwesya.

Akwatetela kuti akasiŵalamula acimjawo

¹¹ Acalongo acimjangu mkasinjililanaga. Jwakumsinjilila mlongo mjakwe kapena kumlamula, akusagasinjilila ni kugalamula malamusi ga Mlungu. Nambo naga mkugalamula malamusi ga Mlungu, ni kuti ngamkutenda yigakuŵeceta malamusigo, nambo mŵele jwakulamula.

¹² Mlungu jika, ni jwakutupa malamusi nipo soni jwakutulamula. Jwele soni apakombole kukulupusya ni konanga. Ana m'mweji mli nduni kuti mumlamule mjenu?

Ya kulikwesya

¹³ Mlole sambano, jemanja ŵimkuti, “Lelo, mwine malaŵi tucijawula ku msinda wamtiwamti, nipo kweleko tutukatende malonda caka cimo kuti tukapate mbiya,”

¹⁴ pelepo jemanja ya malaŵi ngamkuyimanyilila. Ana umi wawo uli wamti uli? Pajatu jemanja mli mpela lyosi, lyalikusawoneka mwakatema, ni kusimilila mwangakaŵa.

¹⁵ Kusyesyene mkwenela kuŵeceta kuti, “Naga Ambuje akutukunda, tuciŵa cijumi, tucitenda yamtiyamti.”

¹⁶ Nambo naga muyiŵelele pelepa, jemanja akusalikwesya ni kulilumba. Kulikwesya kwamti iyiyi kuli ulemwa.*

¹⁷ Jwalijose jwakusamanyilila yindu yambone yakwenela kuyitenda, nambo jwangayitenda yele, ni kuti akulemwa.