Yakobo 3 - Chiyawo Bible

Ya lulumi

¹ Acalongo acimjangu akasaŵa ŵajinji ŵakusosa kuwa aciŵalimu, ligongo mkumanyilila kuti uwe ŵatukwiganya tacitulamula mwakupunda ŵandu ŵane wosope.

² Wosopewe tukusalemwa mu yindu yejinji. Naga pana jwine jwangalemwa pakuŵeceta, ni kuti jwalakwejo aŵele jwakulungama, soni kuti jwele komboleka kucilamula cilu cakwe cosope.

³ Naga tukwinjisya kasyano mkamwa mwa haci kuti jitupikanileje, tukusakombola kujilongolela kulikose kutukusosa.

⁴ Mganisye soni, atamose yombo yayikulungwa mnope, yayikusatutidwa ni mbungo jamacili, nambope yikusajongoleledwa ni kasigilo kamnono, yikusapita kulikose mwa lisosa lya jwakuyijongolela yomboyo.

⁵ Yili iyoyo soni ni lulumi: luli kaciŵalo kamnono, nambo lukusalilumba kuti luli lwakupakombola kutenda yayikulungwa. Mganicisye ya ukulu wa ngalango, jajikusajocedwa ni kupya ni moto wamnono.

⁶ Lulumi luli mpela moto. Ligongo lyakuti luli sikati ja yiŵalo ya cilu cetu, lukusacisakasya cilu cetu cosope. Lukusasakasya ndamo syosope sya mundu. Lukusapamba moto mu umi wetu wosope, kutandila pakupagwa, kuyicila lisiku lyakuwa; moto wakwe uli wakutyocela ku Jahena.*

⁷ Mundu komboleka kulanga nyama syamitundumitundu; yijuni, yakwaŵa, ni ya m'nyasa, nipo akasayilangaga kwene.

⁸ Nambo lulumi, pangali mundu jwampaka apakombole kulilanga. Luli lwakusakala, lwangamanyilila kupumula nipo luli lwegumbale ni ululu wakuwulaga.

⁹ Ni lulumi lulolo tukusatogolela Ambuje, ŵele soni ali Atati, nambo soni ni lulumi lulolo tukusiŵalwesa nalo ŵandu acimjetu, ŵele Mlungu ŵapanganyicisye mwakulandana najo.

¹⁰ Pakamwa pakusipakoposya ya upile, papopo soni pakusipakoposya malweso. Acimjangu yindu yeleyi ngayikuŵajilwa kose kutendekwa.

¹¹ Ana nduluko ja mesi jikusakoposya mesi gakunong'a soni gakuŵaŵa pa lisimbo limpepe pelyo?

¹² Acimjangu, ana mkuju komboleka kusogosya yisogosi ya olifi,* kapena mpeleya kusogosya mkuju? Iyoyo soni nduluko ja mesi ga njete ngaŵa mkomboleka kukoposya mesi gakunong'a.

Lunda lwa kwiwunde

¹³ Nduni jwa jemanja ali jwalunda soni jwakuyipikanicisya yindu? Jwalakwejo akwenela kulosya ni yitendo yakwe yambone, kuti lunda lukusamlongolela myitendo yakwe yakulinandiya.

¹⁴ Nambo naga mli ŵamtima wa wiwu soni ŵakulinonyela, mkalikwesyaga ni kusisyana ni usyene pakuŵeceta ya unami.

¹⁵ Lunda lwamti myiyi ngalukutyocela kwinani, nambo luli lwapasi pano, lwa ŵandu ŵanepe, nambo soni lwakutyocela ku misimu jakusakala.*

¹⁶ Pakuti pele pali wiwu ni kulinonyela, pakasaŵa soni ungapikanganana ni yitendo yangalumbana ya mtundu uliwose.

¹⁷ Nambo lunda lwakutyocela kwinani pandanda luli lwakulenjela, nipo soni luli lwa mtendele, lwa kuŵeŵa, lwakupikanicisya cenene. Lukwete canasa soni yisogosi yakwe yambone yili yejinji. Lundalo luli lwangali lusagu kapena ulamba.

¹⁸ Pakusayika ŵandu ni mtendele akusapanda mbeju ja mtendele, nipo tacigowola yisogosi yacilungamo.