Yakobo 2 - Chiyawo Bible

Akwatetela kuti akatendaga lusagu

¹ Acalongo acimjangu, pakuti jemanja akusiŵakulupilila Ambuje ŵetu Yesu* Klistu,* Ambuje ŵalumbili, mkatendaga lusagu.

² Mwacilandanyo: mundu jwakusicila kwika mu msongano wa jemanja ali awete mbete ja golidi* ni yakuwala yambone, ni kwika soni mundu jwakulaga ali awete yiwisa,

³ naga jemanja mkumcimbicisya mnope jwakusicilajo ni kumsalila kuti, “Mtame pa citengu apa,” nipo jwakulagajo ni kumsalila kuti, “Mjawule mkatame ako,” kapena kuti, “Myice, mtame ku sajo syangunesi.”

⁴ Ana lwelelo ngaŵa lusagu pasikati pa jemanja, nipo kuti jemanja mli ŵakulamula ni nganisyo syakusakala?

⁵ Acalongo acimjangu mpikane, ana ngaŵa Mlungu jwele ŵasagwile ŵandu ŵakulaga ŵa mcilambo capasi kuŵa ŵakusicila mcikulupi, soni kuti akapocele mtuka wa cilanga* ca Mlungu kwa wosope ŵakumnonyela?

⁶ Nambo jemanja mkwanyosya ŵakulagawo, ana ngaŵa jemanjaji ŵakusicila ŵakusamlagasya? Ngaŵa jemanjaji ŵakusicila ŵakusamjigalila kwa ŵakulamula ŵa cilambo capasi?

⁷ Ana ngaŵa jemanjaji ŵele ŵakasalitendela cipongwe lina lya ucimbicimbi lya Klistu, lyamkusakolanjidwa nalyo?

⁸ Naga mkulilondesya lilamusi lya ucimwene lyalilembedwe m'maloŵe ga Mlungu kuti, “Mumnonyeleje mjenu mpela mumkusati pakulinonyela mwasyene,” mkutenda cenene.

⁹ Nambo naga mkulosya lusagu ni kuti mkulemwa, nipo malamusi ga Mlungu gakumsisya jemanja kuti, mli ŵakulemwa.

¹⁰ Pajatu mundu jwakugalondesya malamusi gosope, naga alepele kulondesya atamose lilamusi limo, jwele akusaŵa jwakuleŵela malamusi gosope.

¹¹ Ana ngaŵa Mlungu ŵiŵatite kuti, “Kasimtenda cikululu,” ŵele soni ŵatite kuti, “kasimwulaga?” Naga jemanja ŵangatenda cikululu nambo mkasimwulaga, ni kuti pelepo jemanja mli ŵakugaleŵela malamusi gosope.

¹² Jemanja mŵeceteje ni kutendaga mpela ŵandu ŵitacalamula Mlungu, ni lilamusi lilikusamgopola mundu.

¹³ Mundu jwalijose jwakulamula mwa ngalwe, Mlungu soni tacimlamula mwa ngalwe. Nambo jwalijose jwakusatendaga canasa akasajogopa kulamula kwa Mlungu.

Ya cikulupi ni masengo gakwe

¹⁴ Acalongo acimjangu, ana mundu komboleka kupata cici naga akuti, “Ngwete cikulupi,” nambo yitendo yakwe ngayikulosya? Ana cikulupi cele komboleka kwakulupusya?

¹⁵ Ana naga pasikati pa jemanja, pana acalongo ŵane ŵali ŵangali yakuwala, soni yakulya ya lisiku ni lisiku,

¹⁶ ni jwine mwa jemanja kwasalilaga kuti, “Jawulagani mumtendele, mkalitukutileje ni kulijikutisya,” nambo ngapa yayikwasoŵa, ana pelepo komboleka kupata cici?

¹⁷ Iyoyo, cikulupi cele cangali yitendo cili cewe nditu.

¹⁸ Nambo soni jwine komboleka kuŵeceta kuti, “Jemanja mkwete cikulupi, uneji ngwete masengo,” kwende mundosye cikulupi cenu cele cangali masengoco, une ni masengo gangu tinimlosye cikulupi cangune.

¹⁹ Jemanja yiŵele yambone kuti mkukulupilila kuti kwana Mlungu jumpepe basi. Nambotu, atamose misimu jakusakala* jikusakulupilila yeleyi soni jikusatetemela ni woga.

²⁰ M'mwe ŵakuloŵela, ana mkusosa kuti amlosye kuti cikulupi cangali masengo cili cangali mate?

²¹ Ana Abulahamu,* nangolo jwetu, ngaŵa jwalungamisidwe ni yitendo, piŵampelece mwanace jwakwe Isaki pa malo gakupelecela mbopesi?

²² Ana ngamkulola kuti, cikulupi cakwe ni masengo gakwe yatendecekwe yalumo? Yitendo yakwe ni yiyacitesile cikulupi cakwe kuŵa cekwanile.

²³ Myoyo yatendekwe yiyalembedwe m'maloŵe ga Mlungu kuti, “Abulahamu ŵakulupilile Mlungu, ni ligongo lyakwe Mlungu ŵamtesile kuŵa jwakulungama,” nipo ŵamkolangaga kuti mlongo jwa Mlungu.

²⁴ Mlolite sambano kuti, yitendo yakwe ya mundu yikusamtendesya kuŵa jwakulungama pameso pa Mlungu, ngaŵaga cikulupipe.

²⁵ Ana ngaŵa yatite myoyo soni ni Lahabu, jwamkongwe jwacigwagwa jula? Jwalakwe jwapocele ŵamitenga ŵala, ni kwawucisya kumangwawo pakupitila litala line, nipo jwalakwejo jwasimanikwe kuwa jwakulungama pameso pa Mlungu ligongo lya yiŵatesileyo.

²⁶ Mucikusaŵelela cilu kuti, naga cili cangali msimu cili cewe, iyoyo soni cikulupi cangali yitendo cili cewe.