Yakobo 1 - Chiyawo Bible

¹ Cikalataci cikutyocela kwa une Yakobo,* jwakutumicila jwa Mlungu ni Ambuje Yesu* Klistu.* Ngwalembela ŵandu ŵa Mlungu wosope kutyocela mu ngosyo likumi ni siŵili sya Isalaeli, ŵiŵapwilingene nipo alimkutama myilambo ya cilendo.

Ya cikulupi ni lunda

² Acalongo acimjangu mŵeje ŵakusengwa pimkusimangana ni yakumlinga yejinji,

³ ligongo mkumanyilila kuti kulinjikwa kwa cikulupi cenu kukusamtendekasya kuŵa ŵakupilila.

⁴ Nambo kupimilila kweleku, kukamuleje masengo gakwe ndaŵi syosope, kuti jemanja msimanikwe mli ŵangali ulemwa* soni cakumsisya naco cilicose, soni kuti, mŵe ŵangapelembela mu yiliyose.

⁵ Naga jwine mwa jemanja jwangali lunda ŵaŵende Mlungu, ŵakusapeleka kwa mundu jwalijose mwa umbone mtima wakwe, soni mwangamnyosya.

⁶ Nambo jwakuŵendajo aŵendeje ni cikulupi, akasakayicila kose, ligongo mundu jwakayicilakayicila ali mpela matumbela ga pa nyasa gagakusajawula kwajikupujila mbungo.

⁷ Mundu jwamti myiyi, akusaganisya kose kuti tacipocela kandu kutyocela kwa Ambuje, iyayi;

⁸ pakuti jwelejo ali mundu jwa unakunaku, soni jwangatamilicika mu yitendo yakwe yosope.

Ya usawuci ni cipanje

⁹ Acalongo ŵakulinandiya akwenela kusengwa, pele pakwakwesya Mlungu,

¹⁰ soni acalongo ŵakusicila atende iyoyo, pakwanandiya Mlungu, pakuti ŵakusicila tacimala mpela liluŵa lya mwitinji.

¹¹ Lyuŵa likusakopoka ni citukuta cakwe, ni kugajumusya manyasi. Liluŵa likusagwa pasi, nipo kusalala kosope kukusamalila papopo. Iyoyo umi wa mundu jwakusicila tucimala ali sikati ja yitendo yakwe.

Ya kulinga ni kulinjidwa

¹² Jwana upile mundu jwakusapimilila alimkulinjidwa, ligongo naga apundile tacipocela umi, jeleji jili mbote ja mcilanga ca Mlungu kwa ŵandu wosope ŵakusamnonyela.

¹³ Naga jwine akulinjidwa akasaŵeceta kuti, “Ngulinjidwa ni Mlungu,” ligongo Mlungu jwangalinjidwa ni yangalumbana, nambo soni Mlungu msyene ngaŵa mkumlinga jwalijose.

¹⁴ Nambo mundu jwalijose akusalinjidwa ni yakunyenga, pele lisosa lya mtima wakwe likusamwutila ku ulemwa, nipo likusamgwisya mu ulemwa.

¹⁵ Pelepo lisosa lya mundu likusaŵeleka ulemwa. Ulemwa patiwukusilepo ukusaŵeleka ciwa.

¹⁶ Acalongo acimjangu ŵakunonyelwa, mkasimlilambusya.

¹⁷ Mtuka uliwose wambone, soni wangali cakuwusisya naco ukusatyocela kwinani, kwa Mlungu Atati ŵele ŵapanganyicisye yakumulicila ya kwinani. Ŵeleŵa ŵangacenga kose, nipo lilanguka lyawo lyangacinjidwa atamose panandi.

¹⁸ Mwalisosa lya ŵalakwewo ŵatupele umi kupitila m'maloŵe gawo gasyesyene, kuti pasikati pa yosope yiŵapanganyisye, uwe tuŵe mpela yisogosi yandanda yiŵalisagulile ŵalakwewo.

Ya kugapikanila ni kugatenda maloŵe ga Mlungu

¹⁹ Acalongo acimjangu ŵakunonyelwa, mundu jwalijose akwenela kuŵa jwacitema kupikana, jwakokoŵa kuŵeceta, soni jwangatumbila citema,

²⁰ ligongo lutumbilo lwa mundu ngapakombola kumtendekasya mundu kuŵa jwakulungama.

²¹ Myoyo, mlece yisyowelo yiliyose yakunyalaya, soni ndamo silisyose syacabe. Mpocele mwakulinondiya maloŵe ga Mlungu gagapandidwe mwa jemanja, gampaka gapakombole kumkulupusya.

²² Kasimlilambusya ni kugapikanilape maloŵe ga Mlungu, nambo mtendeje yigakuŵeceta maloŵego.

²³ Mundu jwakusagamba kugapikanilape maloŵe ga Mlungu, nambo jwangatenda yigakuŵeceta maloŵego ali mpela mundu jwakusalilolela ngope jakwe pa ligalasi,

²⁴ nipo pitamalisye kujilola ngopejo, mwangakaŵa akusaliŵalila kuti ali jwamti uli.

²⁵ Malamusi ga Mlungu gali gangali ulemwa nambo gakusampa mundu ufulu. Mundu jwakugapocela ni kugakuya malamusigo, ngaŵa jwagamba kugapikanape ni kugaliŵalila, jwele Mlungu tacimpa upile mu yitendo yakwe yosope.

²⁶ Naga jwine akulitenda kuti ali jwa dini mnope, nambo ali jwakuŵecetaga yangalumbana, dini jakwejo jili ja mtega, soni akusagamba kulilambusya.

²⁷ Dini jisyesyene jajili jangali ulemwa pameso pa Mlungu Atati, ni aji: kwakamucisya ŵanace ŵa masije ni acakongwe ŵawililwe myisawusyo yawo, nambo soni kuligosa jika ku yangalumbana yosope ya mcilambo capasi.