Ŵaloma 8 - Chiyawo Bible

Kutama ni umi mwamacili ga Msimu wa Mlungu

¹ Sambano pangali magambo gakwasisya ŵandu ŵali mwa Yesu* Klistu.*

² Pakuti lilamusi lya Msimu Ŵaswela, lyele likusatupa umi mwa Yesu Klistu, lingopwele une ku lilamusi lya ulemwa* ni ciwa.

³ Mlungu ŵatesile yele Malamusi giŵalembile Mose* ngimkinigakombola kuyitenda, ligongo ndamo ja ŵandu jakusakala jatendekasisye kuti Malamusi gaŵe gangali macili. Nambo Mlungu ŵamgopwele jemanja piŵatumisye Mwanace jwakwe, jwele juŵayice mu upagwe wa cilu mpela ca uweji ŵandu ŵakulemwa, kukuwugomeka ulemwa.

⁴ Mlungu ŵatesile yeleyi kuti tutendeje yigakuti Malamusi giŵalembile Mose pakumpikanila Msimu m'malo mwakuyipikanila yakusaka ya mitima jetu.

⁵ Ŵandu ŵakusajipikanila ndamo jawo jakusakalajo, akusayika mitima pa yakusaka ya mitima jawo. Nambo ŵandu ŵakumpikanila Msimu Ŵaswela, akusaŵika mitima pa yakusaka Msimu Ŵaswelawo.

⁶ Naga ndamo syakusakala sikulamulila cilu cenu ni kuti yakuyicisya yakwe yili ciwa, nambo naga tukulamulidwa ni Msimu Ŵaswela mbesi jakwe jili jakuti tucikola umi ni mtendele.

⁷ Ŵandu akusaŵengana ni Mlungu naga akulamulilidwa ni yakusaka ya mitima jawo, pakuti jemanjajo ŵangapikanila Malamusi ga Mlungu, soni ngaŵa mkugapikanila.

⁸ Myoyo ŵandu ŵakusapikanila yakusaka ya mitima jawo ngakomboleka kumsangalasya Mlungu.

⁹ Nambo jemanja ngamkulamulidwa soni ni yakusaka ya mitima jenu nambo mkulamulidwa ni Msimu wa Mlungu wawukusatama mwa jemanja. Mundu jwalijose jwanganakola Msimu wa Klistu, ni kuti jwalakwejo nganaŵa jwa Klistu.

¹⁰ Naga Klistu akutama mwenumwe, atamose kuti tim'we ligongo lya ulemwa, nambope Msimu uli mwa m'mwejowo uli cijumi, ligongo Mlungu am'weni kuti mli ŵakulungama pameso pakwe.

¹¹ Naga Msimu wa Mlungu uŵamjimwisye Yesu ku ŵawe akutama mwa jemanja, myoyo jwele juŵamjimwisye Yesu Klistu ku ŵawejo, tacipeleka umi ku yilu yenu yakuwayi kupitila mwa Msimu wakwe wawukusimanikwa mwa jemanja.

¹² Myoyo acalongo acimjangu, tukwenela kutama mwakulingana ni mwakusacila Msimu wa Mlungu kuti uwe tutameje.

¹³ Naga tukutama malinga ni mwele mujikusacila mitima jetu, ni kuti cituwe; nambo naga tukutama mwakamucisidwa ni Msimu Ŵaswela ni kuleka yitendo yakusakalayo, tucikola umi.

¹⁴ Wosope ŵakulongoleledwa ni Msimu Ŵaswela ali ŵanace ŵa Mlungu.

¹⁵ Pakuti Msimu umwapocele jemanja, ngawumtendekasya kuŵa acikapolo nikuti mŵe ŵawoga. Nambo Msimuwo ukusamtendekasya jemanja kuŵa ŵanace ŵa Mlungu, nipo mwamacili ga Mlungu pakupopela kwa Mlungu tukusatiji kuti, “Abba! Atati!”

¹⁶ Msimu Ŵaswela akusasimicisya pamo ni misimu jetu kuti uwe tuli ŵanace ŵa Mlungu.

¹⁷ Pakuti sambano tuli ŵanace ŵa Mlungu, myoyo tucipocela nawo upile uŵasunjile jwalakwejo ŵandu ŵakwe. Pampepe ni Klistu uwe soni tucipocela upile wele Mlungu jwaliji ali amsunjile jwalakwejo. Pakuti naga tukuyiwona yakusawusya pamo ni Klistu, tucipocela soni ni lumbili lwakwe pamo ni jwalakwejo.

Ya lumbili lwatucipocela

¹⁸ Ngusimicisya kuti yisawusyo yitukusimana nayo ngayikuŵajilwa kuyilandanya ni lumbili luŵalinganyisye Mlungu kuti tatulosye msogolo muno.

¹⁹ Yakupanganyikwa yosope yikwembecela kuti Mlungu ŵalosye ŵanace ŵakwe.

²⁰ Pakuti yakupanganyidwayo yaŵele yangali mate, ngaŵaga ligongo lyakuti yasacile kuti yiŵe myoyo, nambo ligongo lyakuti Mlungu ŵasacile kuti yiŵe myoyo. Nambo yakupanganyidwayo yikwete cembeceyo cakuti,

²¹ Mlungu ŵayigopwele yakupanganyidwa yosope kuti yikawola ni kupocela ufulu ni ucimbicimbi wa ŵanace ŵa Mlungu.

²² Tukumanyilila kuti mpaka sambano jino, yiwumbe yosope yiŵele yili mkuwuwula ni ululu, mpela jwamkongwe jwakupikana ululu pa ndaŵi jakuŵeleka mwanace.

²³ Nambo ngaŵaga yakupanganyidwape yele yayikuwuwula; uwe ŵatukwete mituka jandanda ja Msimu Ŵaswela tukuwuwula mu mtima pakwembecela kuti Mlungu atupocele mpela ŵanace ŵakwe, ni kukulupusya yilu yetu.

²⁴ Ni cele cembeceyoci uwe twakulupwice, nambo naga tukuciwona citukwembecelaco, ni kuti celeco nganiciŵa cembeceyo.

²⁵ Nambo naga tukwembecela yele yimkinituyiwone ni meso, tukusalindililaga mwakupilila.

²⁶ Mwa litala lilili Msimu Ŵaswela akusatukamucisya uwe. Tuli ŵangali macili mpela mutuŵelelemu. Pakuti ngitukumanyilila mutukwenela kupopelela. Ali ni ligongo lyakwe Msimu Ŵaswela asyene akusatupopelela ni maloŵe gakuti pangali mundu jwa mpaka agaŵecete.

²⁷ Mlungu jwakusalola m'mitima mwa ŵandu, akusamanyilila yele Msimu Ŵaswela akusaka, pakuti msimuwo, akusiŵapopelela ŵandu ŵa Mlungu mpela mwakusacila Mlungu.

²⁸ Tukumanyilila kuti Mlungu akusayitendekasya yindu kuti yiŵe cenene kwa ŵandu ŵele ŵakusamnonyela jwalakwejo, ŵele jwalakwejo akusiŵaŵilangaga jemanjajo mpela muŵalinganyicisye.

²⁹ Pakuti ŵandu ŵasagulidwe cilepe ni Mlungu, jwalakwejo ŵaŵisile pajika kuti aŵe mpela Mwanace jwamlume, kuti Mwanacejo aŵe mpela jwandanda sikati ja acanasi.

³⁰ Mlungu nganagamba kwaŵika pajika, nambo soni ŵaŵilasile. Nganagamba kwaŵilangape, nambo soni ŵaweni kuti ali ŵakulungama pameso pakwe, ni ŵagaŵile lumbili lwakwe.

Ya cinonyelo ca Mlungu

³¹ Nambi sambano tuŵecete cici ya yosopeyi? Naga Mlungu ali kumbali jetu, ana ŵani mpaka asisyane ni uwe?

³² Jwalakwejo nganakanya Mwanace jwakwe, nambo m'malo mwakwe ŵampelece ligongo lya uwe wosope. Piŵatupele Mwanace jwakwepo, ana jwalakwejo ni mpaka alepele kutupa yosope mwalulele?

³³ Ana ŵani mpaka ŵajimbe magambo ŵandu ŵele ŵiŵasagulidwe ni Mlungu?

³⁴ Ana ŵani mpaka ŵagomece jemanjajo? Klistu Yesu juŵawile, kapena tujile kuti juŵajimwice ku ŵawe, jwele soni jwali ku mkono wamlyo wa Mlungu ni jwele jwakutuŵecetela uwe kwa Mlungujo.

³⁵ Ana ŵani mpaka atulekanganye uwe ni cinonyelo ca Klistu? Ana kapena yisawusyo, kapena yipwetesi, kapena kulagasidwa, kapena sala, kapena usawuci, kapena yakogoya, kapena kuwulajidwa?

³⁶ Malemba gakuti, “Ligongo lya ŵalakwe ndaŵi syosope akusaka kutuwulaga, pameso pawo tuli mpela ngondolo syakwawula nasyo kukusiwulaga.”

³⁷ Mu yindu yosopeyi uwe tuli ŵakupunda mnope ligongo lya ŵele uŵatunonyele uwe.

³⁸ Ngumanyilila mwangakayika kuti pangali cindu cakutulekanganya ni cinonyelo cakwe. Kanga ciwa kapena umi, atamose malayika* kapena ŵakulamulila, kapena yindu yayipali sambano jino, kapena yiticiwoneka msogolo muno, kapena ya macili yine yiliyose;

³⁹ kapena ya kwinani kapena ya pasi pano, kapena soni kandu kane kalikose kakupanganyidwa, ngasikatulekanganya uwe ni cinonyelo ca Mlungu, citukwete mwa Klistu Yesu Ambuje ŵetu.