Ŵaloma 7 - Chiyawo Bible

Cilandanyo ca ulombela

¹ Acimjangu, nguŵeceta ni jemanja ŵimkumanyilila Malamusi. Mkumanyilila cenene kuti Malamusi gakusigalamulila ŵandu pa ndaŵi jali cijumi.

² Malamusi gakusatiga kuti jwamkongwe jwamlombedwe ali jwamtaŵidwe ni malamusi ga ŵamkwakwe, ndaŵi syosope pa ndaŵi jali ŵalumewo cijumi. Nambo ŵalumewo naga akuwa, jwamkongwe jula akusagopoka ku malamusi ga ŵamkwakwe gala.

³ Ni ligongo lyakwe naga akutama ni jwamlume jwine, pa ndaŵi jali ŵamkwakwewo cijumi ni kuti pelepo jwamkongwejo atesile cikululu. Nambo ŵamkwakwewo naga akwasika, ni kuti jwamkongwejo agopwece ku malamusi ga ulombela gala, myoyo jwalakwejo ngakolanjidwa kuti jwacikululu naga akulombedwa ni jwamlume jwine.

⁴ Yalumo soni jemanja acimjangu, mwatendedwe kuŵa ŵawe mu cilu ca Klistu* ni kulekangana ni malamusi pakuti jemanja mli yiŵalo ya cilu cimo ni Klistu. Sambano jemanja mli ŵakulumbikana jwine ni mjakwe ni kuti ŵa Jwalakwejo juŵajimusidwe ku ŵawe ni Mlungu kuti tuŵe ŵakutenda yambone mpela litala lyakumtumicila Mlungu.

⁵ Pandaŵi jitwakuyaga ndamo syetu syakupagwa nasyo, ndamo syetu syakusakala sisyajimusidwe ni Malamusi syakamulaga masengo myilu yetu, nipo cakuyicisya cakwe caliji ciwa.

⁶ Nambo sambano tugopoledwe ku Malamusigo. Twatesile mpela twawile ni kulekangana ni Malamusi gigaliji mkututaŵa kala. Msimu Ŵaswela akutukamucisya sambano kumtumicila Mlungu mwa litala lya sambano, ngaŵaga soni mwa litala lyakala mpela muŵagagoselaga Malamusi gakulembedwa.

Ya Lilamusi ni ya ulemwa

⁷ Ana sambano tujile kuti Lilamusi lili lyakusakala? Iyayi. Nambo Malamusigo ni gigamanyisye une ya ulemwa.* Pakuti ngimkanimanyilila yakusakala kwa kukumbila, yikaŵe kuti Malamusi nganigasala kuti, “Mkakumbila.”

⁸ Ligongo lya lilamusili, ulemwa wapatile lipesa lyakwimusya ndamo jakukumbila mwa une. Pakaŵe kuti pangali malamusi, ulemwa ukaliji wangali macili.

⁹ Une naliji cijumi pa ndaŵi jikwaliji kwangali Malamusi gakusalila une yakwenela kutenda ni yangajenela kutenda. Nambo pigayice Malamusigo ni kusalila une yakwenela kutenda, papopo ulemwa ŵakwete soni umi

¹⁰ nipo une nawile. Malamusi gagogo gigajenele ŵandu ni kwika nawo ku umi, une ganjigalile ku ciwa.

¹¹ Pakuti ulemwa wapatile lipesa ligongo lya malamusi nipo kupitila m'malamusimo, ulemwa ŵalambwisye ni kumbulaga.

¹² Myoyo Malamusi gali gakutyocela kwa Mlungu, nipo lilamusi lililyose mwa Malamusigo lili lyeswela, lyakulungama ni lyambone.

¹³ Ana sambano ni kuti cindu camboneci ni cicambulajisye? Iyayi. Nambo ulemwa ni uwambuleje pakukamulisya masengo cindu camboneci kuti ndamo jisyesyene ja ulemwa jiwonecele pakulanguka kuti kweli uli ulemwa. Myoyo kupitila mu malamusi, ulemwa ukusawoneka kuti uli wakogoya.

Ya ndamo siŵili sikusalimbana mkati mwa mundu

¹⁴ Tukusamanyilila kuti Malamusi gapelecedwe ni Mlungu. Nambo une ndili mundu jwakulepetala jwakusumisidwa mpela kapolo ku ulemwa.

¹⁵ Yingusatenda jwangayimanyilila, pakuti jwangatenda yele yingusaka kutenda, nambo m'malo mwakwe ngusatenda yingusaŵengana nayo.

¹⁶ Nambo naga ngutenda cingangucisaka, ni kuti ngukamulana nayo yakuti Malamusi gala gali gambone.

¹⁷ Myoyo, yindu yayikusatendekwayo, ngaŵa une ni jungusayitenda, nambo ulemwa wawukusatama mwa une.

¹⁸ Ngumanyilila kuti mwa une mwangatama cindu cambone, kwambaga ya ndamo jangu ja cipago jakunonyela yakusakala. Pakuti atamose ngusasosa kutenda cindu cambone, ngusalepela kucitenda celeco.

¹⁹ Jwangatenda yambone yingusayisaka, nambo m'malo mwakwe ngusatenda yakusakala yanganguyisaka kuti niyitende.

²⁰ Nambo naga ngutenda yinganguyisaka, ngaŵaga une soni ni jungusayitenda, nambo ulemwa wawukutama mwa une.

²¹ Myoyo ngusawona kuti cele cicikusatendekwa cili cakuti, pa ndaŵi jingusaka kutenda yambone, yakusakala yikusaŵa papopo ni une.

²² Mtima wangu ukusasangalala ni Malamusi ga Mlungu,

²³ nambo mu mtima mwangu ngusawona lilamusi line lilikusalimbana ni lilamusi line liwukusajiticisya mtima wangu. Lilamusi lyelelo lindesile kuŵa kapolo jwa lilamusi lya ulemwa lili mcilu mwangu.

²⁴ Kongwene! Ana nduni jutacingulupusya une ku ndamo jangu jitijinjigalile ku ciwaji?

²⁵ Tumtogolele Mlungu, pakuti jwalakwejo ni jutacingulupusya une kupitila mwa Yesu* Klistu Ambuje ŵetu. Myoyo une ni mtima wangu wosope ngusatumicila Malamusi ga Mlungu, atamose kuti yakusosa ya cilu cangu yikusiyindendesya kuti ndumicile lilamusi lya ulemwa.