Ŵaloma 6 - Chiyawo Bible

Ya kutama ni umi mwa Klistu

¹ Ana sambano tujile cici? Ana kapena tujile kuti tugambeje kulemwape kuti umbone mtima wa Mlungu utupe?

² Iyayi. Twatesile mpela kuwa mu ulemwa.* Ana tupitilisyeje kutamape mu ulemwawo?

³ Ana ngamkumanyilila kuti wosopewe twaŵele ŵampepe ni Klistu* Yesu pakubatisidwa, myoyo ni ubatiso uwowo twaŵele soni ŵampepe ni jwalakwejo mu ciwa cakwe?

⁴ Ali ni ligongo lyakwe kupitila mu ubatiso twatesile mpela kuwa ni kusicidwa mwilembe pampepe ni jwalakwejo, kuti mpela muŵajimucile Klistu ku ŵawe mwamacili ga Atati, myoyo soni uwe tutameje mu umi wasambano.

⁵ Naga tulumbikene ni jwalakwejo mu ciwa cakwe, myoyo soni tuciŵa ŵalumbikane ni jwalakwejo ni kwimuka ku ŵawe mpela muŵajimucile jwalakwejo.

⁶ Tukumanyilila kuti umundu wetu wakala wakolecedwe pa msalaba ni jwalakwejo, m'malo mwakuti cilu ca ulemwaci citakonasika, ni kuti tukaŵa soni acikapolo wa ulemwa.

⁷ Pakuti naga mundu awile, ni kuti jwalakwejo agopoledwe ku macili ga ulemwa.

⁸ Ni naga twawile pamo ni Klistu, tukulupilila kuti tucikola soni umi pamo ni jwalakwejo.

⁹ Tukumanyilila kuti Klistu ŵajimwice ku ŵawe, nipo ngasawa soni; myoyo ciwa cangali soni ulamusi pa jwalakwejo.

¹⁰ Ciwa ciŵawileco kwaliji kuwa kwakulekangana ni ulemwa, nipo ŵawile kampepe peko nipo akutama mu umi wakusyoŵekana ni Mlungu.

¹¹ Myoyo soni jemanja mlitendeje ŵawe kwambaga ku ulemwa nambo ŵacijumi kwa Mlungu mwa Klistu Yesu.*

¹² Ni ligongo lyakwe mkasimkunda ulemwa kuti ulamulile yilu yenu yele tiyiciwa, nipo mkayipikanila yakusaka ya cilu cenuco.

¹³ Mkapeleka ciŵalo cilicose ca cilu cenu ku ulemwa, kuti cikamule masengo gakusakala. Mlipelece kwa Mlungu mpela ŵandu ŵacijumi ŵakutyocela ku ŵawe nipo yiŵalo yenu yiŵe yakupanganya masengo ga Cilungamo.

¹⁴ Myoyo ulemwa ngasiwukola soni ulamusi pa jemanja ligongo nganimŵa pasi pa ulamusi wa Mose* nambo mli pasi pa umbone mtima wa Mlungu.

Aklistu aŵeje ŵakutenda cilungamo

¹⁵ Ana uli sambano? Ana tuŵeje tuli mkulemwape ligongo lyakuti cele cikusalamulila umi wetu ngaŵa Malamusi, nambo umbone mtima wa Mlungu? Iyayi.

¹⁶ Mkumanyilila kuti naga mkulipeleka kuti mŵe kapolo jwa mundu ni kumpikanila, ni kuti jemanja mli kapolo jwa mundu jumkupikanilajo. Sambano jemanja naga mli acikapolo ŵa ulemwa, timciwa. Nambo naga jemanja mli acikapolo ŵa Mlungu timciŵa ŵakulungama pameso pakwe.

¹⁷ Nambo tumtogolele Mlungu kuti atamose twaliji acikapolo ŵa ulemwa, nambo sambano mkupikanila ni mtima wosope yakuwona yisyesyene ya majiganyo gimwapocele.

¹⁸ Mwagopoledwe ku ulemwa, nipo sambano mli ŵakutumicila ŵa Mlungu jwa cilungamo.

¹⁹ Nguŵeceta ayi mwa umundu kogopela kuti mpaka mlepele kuyipikanicisya yeleyi cenene. Kala mwalipelekaga kuti mŵe acikapolo ŵa yindu yakusakala ni yangalumbana. Myoyo sambano mlipelece kuti mŵe ŵakutumicila ŵacilungamo ŵa Mlungu ni kuŵa soni ŵaswejesedwe.

²⁰ Pimwaliji acikapolo ŵa ulemwa, nganimŵajilwaga kuti mumsangalasyeje Mlungu.

²¹ Ana mwapindwile cici pakutenda yindu yele yikumtesya soni sambano jinoyi? Pakuti yeleyo mbesi jakwe cili ciwa.

²² Sambano mgopoledwe ku ulemwa, nipo sambano mli acikapolo ŵa Mlungu. Yeleyi tiyimtendekasye m'mwejo kuti mŵe ŵaswela mtima, pambesi pakwe yeleyi tiyimlongolele ku umi wangamala.*

²³ Pakuti malipilo ga ulemwa cili ciwa, nambo mtuka walulele wa Mlungu uli umi wangamala mwa Klistu Yesu Ambuje ŵetu.