Ŵaloma 5 - Chiyawo Bible

Yakuyicisya pakutama jwakulungama pameso pa Mlungu

¹ Pakuti tuli ŵakulungamisidwa pameso pa Mlungu ligongo lya cikulupi citukwete mwa Mlungu, myoyo Ambuje ŵetu Yesu* Klistu* ŵatutendesye uwe kuti tuŵe pa mtendele ni Mlungu.

² Jwalakwejo ni juŵatuwugulile litala kuti pakukulupilila tupocele umbone mtima wa Mlungu wakusapeleka mwa lulele, myoyo tukusasangalala mu cembeceyo cetu patukwembecela kuti tucipocela lumbili lwa Mlungu.

³ Nambo ngaŵa iyiyipeyi, tukusasangalala soni myisawusyo yetu, pakuti tukumanyilila kuti yisawusyo yikusiyimjiganya mundu kuti aŵe jwakupilila

⁴ kwele kukusampaga ndamo syakwiticisidwa ni Mlungu, nipo ndamo syasijiticikwesyo sikusampaga cembeceyo.

⁵ Cembeceyo celeci ngasicitudandawulisya uwe, ligongo cinonyelo ca Mlungu cigumbele m'mitima mwetu kupitila mwa Msimu Ŵaswela ŵiŵapelecedwe kwetuwe.

⁶ Pitwaliji ŵakulemwa, Klistu ŵatuwilile ligongo lya ulemwa* wetu, ŵawile pa ndaŵi jiŵajisagwile Mlungu.

⁷ Cili cakusawusya kuti mundu awile mundu jwine atamose kuti jwinejo aŵe jwakulungama. Kwali mwine kapena mundu mpaka alimbe mtima ni kum'wila mundu jwakulungama.

⁸ Nambo Mlungu atulosisye mwakusatunonyelela uwe, yaliji kuti pitwaliji ŵakulemwa, Klistu ŵatuwilile.

⁹ Pakuti sambano tusimanikwe kuti tuli ŵakulungama pameso pa Mlungu ligongo lya miasi ja Yesu. Jwalakwejo tacitukulupusya ku lutumbilo lwa Mlungu.

¹⁰ Atamose pitwaliji amagongo ŵa Mlungu, ciwa ca Mwanace jwakwe catujilenye ni jwalakwejo. Pakuti ciwa ca Klistu catujilenye ni Mlungu, myoyo soni tucikulupusidwa ni umi wa Mwanagwawo.

¹¹ Nambo kupwatika pa yeleyi, tukusasangalala kupitila mwa Ambuje ŵetu Yesu Klistu, jwele jwatujilenye ni Mlungu.

Ya Adamu ni Klistu

¹² Ulemwa wayice pa cilambo capasi ligongo lya mundu jumo, nipo ulemwawo wayice naco ciwa. Myoyo ciwa cijendelecele kwa ŵandu wosope ligongo jwalijose alemwisye.

¹³ Ulemwa wapali pa cilambo capasi Mlungu mkanapelece Malamusi. Nambo naga pangali lilamusi mundu ngakusosekwa kupocela cilango ligongo lya kulemwa kwakwe.

¹⁴ Nambo kutyocela ndaŵi ja Adamu* mpaka ndaŵi ja Mose,* ciwa cakwete ulamusi pa ŵandu wosope. Ciwaco calamulile soni pa ŵandu ŵele kulemwa kwawo kwaliji kwakulekangana ni Adamu, ŵele nganapikanila Lilamusi lya Mlungu.

¹⁵ Nambo ngaŵa mkulandanya mtuka wa lulele wa Mlungu ni kulemwa kwa Adamu. Ŵandu ŵajinji ŵawile ligongo lya kulemwa kwa mundu jumpepe, nambo umbone mtima wa Mlungu, nambo soni mtuka wakwe wa lulele kwa ŵandu ŵajinji kupitila mwa mundu jumpepe, Yesu Klistu.

¹⁶ Pana soni kulekangana pasikati pamtuka welewu wa Mlungu ni yakuyicisya yakwe ya kulemwa kwakwe kwa mundu jumo jula. Pakuti jwalakwe jula piŵalemwisye kampepe, Mlungu ŵalamwile kuti mundujo apegwe cilango. Nambo mtuka wa umbone mtima wa Mlungu uli wakuti ŵandu akusatamape ali ŵakulungama atamose kuti yakulemwa yawo yaliji yejinji.

¹⁷ Ligongo lya kulemwa kwa mundu jumpepe jula, ciwa catandite kulamulila ligongo lya mundujo. Nambi uli yakuyicisya yakwe ya yiŵatesile mundu jumo jula, Yesu Klistu! Wosope ŵakusapocela upile wakutyocela kwa Mlungu ni kulungamisidwa ni Mlungu taciŵa cijumi ni kulamulila mpela ayimwene kupitila mwa Yesu Klistu.

¹⁸ Myoyo, mpela ulemwa umpepe wayice naco cilango pa ŵandu wosope, myoyo soni masengo gakulungama gakusigagopola ŵandu wosope ni kwapa jemanjajo mtendele.

¹⁹ Pakuti mpela muyaŵelele kuti ŵandu ŵajinji ŵaliji ŵakulemwa, ligongo lya ungapikanila wa mundu jumo jula, myoyo soni ŵandu akusasimanikwa kuti ali ŵakulungama, ligongo lyakupikanila kwa mundu jwine soni jumpepe.

²⁰ Mlungu ŵapelece Malamusi kuti ŵandu amanyilile winji wa ulemwa wawo. Nambo piwatupile ulemwa, umbone mtima wa Mlungu watupile mnope.

²¹ Myoyo mpela muŵalamulilaga ŵandu ulemwa ni kwikasya ciwa pasikati pawo, myoyo soni kwaliji kwakusosekwa kuti umbone mtima wa Mlungu ulamulile pakwikasya cilungamo kwa ŵandu, ni kwayicisya ku umi wangamala* mwa Yesu Klistu Ambuje ŵetu.