Ŵaloma 3 - Chiyawo Bible

¹ Ana Ayuda akusiŵapunda uli ŵandu ŵa mitundu jine?* Kapena ana tapate cici mu kuwumbala?*

² Pana kupindula kwekulungwa kuŵa Myuda. Pandanda, Mlungu ŵapele Ayuda maloŵe gakwe kuti agasunje.

³ Nambi naga ŵane mwa jemanjajo ŵaliji ŵangakulupicika, ana ligongo lya ungakulupicika wawo ni kuti nombe najo Mlungu ngasakulupicika?

⁴ Mkaganisya myoyo. Ŵandu akwenela kumanyilila kuti yakusaŵeceta Mlungu yikusaŵa yakuwona, atamose kuti ŵandu wosope ali ŵa unami, mpela muyilembedwele m'Malemba kuti, “Ŵalakwe Mlungu, ŵandu amanyilile kuti ŵalakwe akusaŵeceta yakuwona, amanyilile soni kuti ŵalakwe akusapunda pa ndaŵi jakulamulidwa.”

⁵ Nambo naga ungalumbana wetu ukulosya kuti Mlungu ali jwakulungama, citujile cici? Ana citujile kuti Mlungu ali jwangakulupicika pa ndaŵi jakutupa uwe cilango? (Nguŵeceta mpela mwakusaŵecetela ŵandu ŵane.)

⁶ Mkaganisya myoyo. Ana Mlungu akaŵe kuti ali jwangalungama, ana akapakombwele uli kuŵa jwakulamula ŵandu wosope?

⁷ Naga kulambusya kwangu kuli kulosisye kupunda kala kuti Mlungu ali jwakuwona, ana ligongo cici mpaka andamule kuti une ndili jwakulemwa?

⁸ Uli ngagamba kuŵeceta kuti, “Kwende tutendeje yakusakala mpela litala lyakumcimbicisya Mlungu.” Pana ŵandu ŵane ŵakusatulambucisya uwe kuti tukusaŵeceta yamti myiyi. Jwalakwejo tacapa cilango jemanjaji.

Pangali jwakulungama

⁹ Ana tuŵecete cici sambano? Ana uwe Ayuda tukwapunda ŵandu ŵa mitundu jine? Iyayi, paja tuŵecete kala kuti ŵandu wosope ali ŵakulemwa, Ayuda ni ŵandu ŵa mitundu jine josope.

¹⁰ Mpela muyilembedwele m'Malemba kuti, “Pangali mundu jwakulungama pangali atamose jumo jose.

¹¹ Pangali mundu jwakupikanicisya yili yakuwona, pangali jwakusaka kuti aŵe pa ulongo ni Mlungu.

¹² Ŵane ngakusosa kuti akole Mlungu m'mitima mwawo, pangali jwakutenda yambone atamose ni jumo jose.

¹³ Kungulo kwawo kuli mpela malembe gangasilila, akusaŵeceta ya unami ni malulumi gawo, pangomo pawo pakusakopoka maloŵe ga ululu, ululu wakwe mpela wa lijoka lya mamba.

¹⁴ Mkamwa mwawo mugumbele ni malweso soni mukusakopoka maloŵe gakupweteka,

¹⁵ Akusajanguya kwapweteka ni kwawulaga acimjawo.

¹⁶ Akusiŵatendekasya ŵandu kuti ajonanjidwe ni kulagasika,

¹⁷ soni litala lya mtendele ngakulimanyilila.

¹⁸ Ŵangamjogopa Mlungu amta panandi.”

¹⁹ Tukumanyilila kuti yosope yigakuti pakuŵeceta Malamusi ga Mlungu, yikwakwaya ŵandu ŵakulamulilidwa ni Malamusigo. Cakulinga cakwe cili cakuti ŵandu wosope asoŵe cakuŵeceta pameso pa Mlungu, ni tajimbidwe magambo ni Mlungu.

²⁰ Pakuti pangali mundu jwele Mlungu jwakusamwona jwalakwejo mpela jwakulungama ligongo lyagamba kugakuya Malamusi. Malamusi gagamba kutumanyisya kulemwa kwetu.

Ya litala lya Mlungu lyakwalungamicisya ŵandu

²¹ Nambo sambano litala lya Mlungu lyakwalungamicisya ŵandu pameso pakwe liwonece. Lyele litalali ngalikwamba ya kugagosa Malamusi giŵalembile Mose.* Ŵakulocesya ŵa Mlungu nombe nawo akusatendela umboni ya litalalyo.

²² Litala lyakusasimanikwila ŵandu kuti ali ŵakulungama pameso pa Mlungu lili lyakuti ŵanduwo amkulupilile Yesu* Klistu.* Mlungu akusiŵatendela yeleyi ŵandu wosope ŵakukulupilila mwa Yesu Klistu. Pajatu pangali kulekangana sikati ja ŵandu,

²³ pakuti wosope ŵalemwisye, ni ŵalepele kwika mu lumbili luŵalinganyicisye Mlungu.

²⁴ Nambo mu umbone mtima wa Mlungu, ŵandu akusasimanikwa kuti ali ŵakulungama pameso pakwe, ligongo lya Yesu Klistu jwele juŵatuwombwele uwe.

²⁵ Mlungu ŵampelece jwalakweju kuti kupitila mu ciwa cakwe aŵe mbopesi jakululucila ulemwa* wa ŵandu ŵakumkulupilila Jwalakwejo. Mlungu ŵatesile yeleyi kuti alosye litala lyakwe lyakusiŵalungamicisya nalyo ŵandu pameso pakwe. Nambo kalakala, Mlungu mwakulitimalika mtima mwakwe nganiŵapa cilango ŵandu.

²⁶ Mlungu ŵampelece jwalakwejo kusaka kusimicisya cilungamo cakwe kwa uweji, kuti soni ŵandu amanyilile kuti jwalakwejo msyene ali jwakulungama, nambo soni kuti akusamlungamisya jwalijose jwakumkulupilila Yesu.

²⁷ Nambi pelepa mundu mpaka alikwesye soni? Iyayi, ngaŵa mkulikwesya soni. Ana ligongo cici? Ana lili ligongo lyakuti tukugapikanila Malamusi? Iyayi, nambo ligongo lyakuti tukukulupilila.

²⁸ Tukusawona kuti mundu akusaŵa jwakulungama pameso pa Mlungu kupitila mu kukulupilila, ngaŵaga pakugagosa Malamusi.

²⁹ Ana kapena Mlungu ali jwa Ayudape? Ana soni ngati ali Mlungu jwa ŵandu ŵa mitundu jine? Kusyene jwalakwejo soni ali Mlungu jwa ŵandu ŵa mitundu jine.

³⁰ Kwana Mlungu jumpepe jwa Ayuda ni jwa ŵandu ŵa mitundu jine, jwalakwejo tacalungamisya Ayuda ni ŵandu ŵa mitundu jinewo kupitila mu cikulupi cawo ngaŵaga kupitila mu kutenda yindu yele yigakuti Malamusi.

³¹ Ana nikuti tukugajasa Malamusi patukuŵeceta kuti pakusacikwa cikulupi? Iyayi, ngatukwasa Malamusi. Mnopemnope pelepa nikuti tukugalimbisya Malamusigo.