Ŵaloma 2 - Chiyawo Bible

Mlungu akusajamuka mwangali lusagu

¹ Ŵane ŵa jemanja mkusimwalambucisya acimjenu kuti ali ŵakulemwa. Nambo kwa jemanja pangali kukana kulikose pa yele yimkusatenda. Pakuti pimkumlamula jwine, ni kuti mkuligomeka mwasyene pakuti m'mwejo ŵakulamulamwe mkusatendaga iyoyo.

² Tukumanyilila kuti Mlungu mukulungamika kwakwe, tacapa cilango ŵandu ŵakutenda yeleyi.

³ Nambi sambano m'mwe mjangu jumkulamula ŵane ŵakutenda yeleyi, nombe m'mwejo mli mkuyitenda iyoyo, ana mkusaganisyaga kuti Mlungu ngasamlamula?

⁴ Ana kapena mkucicembulusya canasa cekulungwa ca Mlungu, cicili kutulasya mtima, ni kupilila kwakwe? Ana ngamkumanyilila kuti Mlungu akusamtendela canasa ligongo lyakuti jwalakwejo akusaka kuti m'mwejo mgalawuce mtima?

⁵ Nambo m'mwejo mkusajumusya mtima ni kukana kupitikucila kwa Mlungu. Myoyo mkulisalacisya mwasyene lutumbilo lwa Mlungu pa lisiku litacilosya lutumbilo lwakwe nambo soni tacilamula cilambo capasi mwakulungama.

⁶ Mlungu tacalamula ŵandu wosope mwakulingana ni mwatendele jemanjajo.

⁷ Jwalakwejo tacipeleka umi wangamala* kwa ŵandu ŵakusalimbicila mwa mtawu kutenda yindu yayili yambone, kusosasosa lumbili ni ucimbicimbi ni umi wangamala wakusapeleka Mlungu.

⁸ Nambo tacapila mtima ni kwatumbilila ŵandu ŵali ŵakulinonyela acimsyene ni kukana kutenda yili yakulungama ni kusakaga kutendaga yangalumbana.

⁹ Tipaciŵa yisawusyo ni yipwetesi pa ŵandu wosope ŵakutenda yangalumbana, pandanda Ayuda kaneko ŵandu ŵa mitundu jine.*

¹⁰ Tipaciŵa lumbili, ucimbicimbi ni mtendele yakutyocela kwa Mlungu pa ŵandu wosope ŵakutenda yindu yambone, pandanda Ayuda kaneka ŵandu ŵa mitundu jine.

¹¹ Pakuti Mlungu jwangali lusagu pakulamula.

¹² Ŵandu ŵiŵalemwisye ali ŵangamanyilila Malamusi, nombe nawo tacilamulidwa pa yiŵalemwisyeyo. Nipo Lilamusi tilicikamucisidwa masengo pa kumlamula jwalijose jwakumanyilila yilikuti Lilamusilyo.

¹³ Pakuti ŵandu ŵali ŵakulungama pameso pa Mlungu ngaŵa ŵakusagamba kugapikanape Malamusi. Nambo ŵakusatenda yayikuŵecetedwa m'Malamusimo, ni ŵelewo pewo tacilungamisidwa ni Mlungu.

¹⁴ Ŵandu ŵa mitundu jine nganakola Malamusi, nambo jemanjajo pa ndaŵi jakutenda yigakuti Malamusi, akulosya kuti m'mitima mwawo akumanyilila yambone ni yakusakala.

¹⁵ Masengo gawo gakusasimicisya kuti Malamusi galembedwe m'mitima mwawo, jele jikusasimicisya iyoyopeyo, pakuti nganisyo syawo sikusisyasisya mwine kwajiticisya.

¹⁶ Mpela musikusalila Ngani Syambone* singusilalicila, syele sikuti tiyiciŵaga soni myoyo pa lisiku alila litacilamulila Mlungu kupitila mwa Yesu* Klistu* ya mtemela ni ya m'mitima ja ŵandu.

Ya Ayuda ni Malamusi

¹⁷ Nambo sambano m'mwe ŵimkusalikolanga kuti mli Myuda, ni kugakulupililaga Malamusi, mkusimpokaga kuti jemanja mli ŵandu ŵakwe ŵa Mlungu.

¹⁸ Mkuyimanyilila yindu yakusaka Mlungu kuti m'mwejo myitendeje, nambo soni ligongo lyakuti mwalijiganyisye Malamusigo, ni mkumanyilila kulekanganya sikati ja yambone ni yakusakala.

¹⁹ Mkusakulupilila kuti m'mwejo mli mlongola jwa ŵandu ŵangalola, lilanguka lyakwamulicila ŵandu ŵele ŵali mu cipi,

²⁰ jwakwawunda ŵandu ŵakuloŵela, soni mwalimu jwa ŵandu ŵele ŵingakumanyilila cilicose. Mkusakulupililaga kuti m'Malamusimo mkusapatagamo lunda losope ni yakuwona yosope.

²¹ M'mwe ŵakwajiganya ŵane, ana ligongo cici sambano ngamkulijiganya mwasyene? Mkusimwasalila ŵane kuti, “Mkajiŵa,” nambi uli m'mwejo soni mkusajiŵa?

²² M'mwe ŵimkusati, “Mkasimtenda cikululu,” nambi uli m'mwejo soni mkusatenda cikululu? M'mwe ŵimkusaŵeceta yakusisyana ni tumilungu twakupanganyidwa ni magasatu, nambi uli m'mwejo soni mkusajiŵa m'majumba mwakusalambililamo tumilungu twakupanganyidwa ni magasatu?

²³ M'mwe ŵimkusapoka ligongo lya Malamusi ga Mlungu, nambi uli m'mwejo soni mkusimumtesyaga Mlungu soni pangagapikanila Malamusigo?

²⁴ Mpela muyilembedwele, Malemba gakuti, “Lina lya Mlungu likunyosyedwa ni ŵandu ŵa mitundu jine ligongo lya jemanja Ayuda.”

²⁵ Kuwumbala* kwenu kwana mate naga mkukuya yigakuti Malamusi. Nambo naga ngimkugakuya Malamusigo, bola mkagambe kutama ngawumbala.

²⁶ Naga mundu jwangawumbala akukuya yigakuti Malamusigo, ana jwalakweju ngasaŵa mpela mundu jwamwumbale pameso pa Mlungu?

²⁷ Kwa ŵele ŵali ŵangawumbala cipagwileco nambo akugasunga Malamusi ni kuti tacimgomeka m'mwejo ŵamli ŵawumbale, pakuti mkwete Malamusi gakulembedwa nambo ngamkutendaga yigakuti Malamusigo.

²⁸ Kuŵa Myuda jwamwumbale ni kutendaga yigakuti Malamusi yeleyi ngayikumtendesya m'mwejo kuŵa Myuda msyesyene.

²⁹ Myuda msyesyene ni jwali Myuda mu mtima mwakwe, soni kuwumbala kusyesyene kukusaŵaga kwa mu mtima, kwele kukusatendekwaga ni Msimu Ŵaswela, ngaŵaga ni Malamusi gakulembedwa. Mundu jwamti myoyo akusapocela matogolelo kutyocela kwa Mlungu, ngaŵaga kwa ŵandu.