Ŵaloma 16 - Chiyawo Bible

Maloŵe gakulangana

¹ Ngumtendela umboni Febe, mlumbugwetu mwa Ambuje, jwele jwakusatumicila ku mpingo* wa ku Kenkiliya.

² Mumpocele mu lina lya Ambuje, mpela mwakwenela kupocelelana ŵandu ŵa Mlungu. Mumkamusye naga akusaka cikamucisyo cenu pa yakusoŵa yakwe, pakuti jwalakwejo ŵakamucisye ŵandu ŵajinji ni une jwakwe.

³ Mumbelecele moni kwa Pulisila ni Akwila, ŵele ŵali acimjangu ŵakusamtumicila Klistu* Yesu* pampepe ni une.

⁴ Jemanjaji ŵaliji ŵacilepe kuwulajidwa ni cakulinga cakuti akulupusye umi wangu. Ngaŵaga unepe ni jungwatogolela jemanjaji, nambo soni ni mipingo josope ja ku yilambo ya ŵandu ŵa mitundu jine.*

⁵ Mumbelecele moni kwa ŵandu wosope ŵakusasongana mpela mpingo m'majumba mwawo. Mumbelecele moni kwa mjangu jwapamtima Epeneto, jwele juŵaliji jwandanda kukulupilila mwa Klistu ku upande wosope wa Asiya.*

⁶ Mumbelecele moni kwa Maliya, ŵele ŵaŵele ali mkukamula masengo mwakulimbangana.

⁷ Mumbelecele moni kwa Andiloniko ni Yuniya, ŵali acalongo acimjangu ŵa Ciyuda ŵiŵataŵidwe pampepe ni une. Jemanjaji ŵaliji ŵakumanyika sikati ja ŵandumetume, soni jemanjaji ni ŵaŵaliji ŵandanda kuŵa aklistu une mkanimbe.

⁸ Mumbelecele moni kwa Ampiliato, mlongo mjangu jwakunonyeledwa pakutama pampepe mwa Ambuje.

⁹ Mumbelecele soni moni kwa Ulibano, jwakutumicila mjetu pa masengo ga Klistu, nambo soni Sitakisi jungusamnonyela.

¹⁰ Mumbelecele moni kwa Apelesi, mklistu jwakulimbangana jula. Mumbelecele moni kwa wosope ŵa mwiŵasa lya Alisitobulo.

¹¹ Mumbelecele moni kwa Helodiyoni, Myuda mjangu. Mumbelecele soni moni kwa aklistu wosope ŵa mwiŵasa lya Nalikiso.

¹² Mumbelecele moni kwa Tilifena ni Tilifosa, ŵele ŵakamulaga mwamacili masengo ga Ambuje. Mumbelecele moni kwa Pelisisi jungumnonyela jula, jwatesile masengo gejinji ga Ambuje.

¹³ Ngupeleka moni kwa Lufusi, jwakutumicila juŵasagwile kwatumicila Ambuje, pamo ni mamagwe ŵele soni ŵaŵanjigele une mpela mwanagwawo.

¹⁴ Mumbelecele moni kwa Asikilinto, Filegoni, Helemesi, Patilobasi, Helemesi ni aklistu wosope ŵali nawo kweleko.

¹⁵ Mumbelecele moni kwa Filologosi ni Juliya, kwa Neliyasi ni mlongo mjakwe, kwa Olimpa ni kwa ŵandu wosope ŵa Mlungu ŵali nawo kweleko.

¹⁶ Mpelegane moni kwa jwine ni mjakwe mwa cinonyelo cisyesyene. Mipingo josope ja Klistu akuno jikumpa moni.

Maloŵe gakupeleka misyungu gakumalicisya

¹⁷ Ngumŵenda acalongo acimjangu kuti mkalamuce nawo ŵandu ŵele ŵakwagaŵanisya ŵakulupilila ni kwalemwekasya. Jemanjajo akusajiganya yakulekangana ni yele yimwalijiganyisye jemanja. Mwaŵambaleje jemanjajo,

¹⁸ pakuti ŵandu ŵa syele ndamosyo ngakumtumicila Klistu Ambuje ŵetu, nambo akusagamba kutumicila yakusaka ya mitima jawo. Ni kuŵeceta ni maloŵe gawo gambone gakunonyelesya akusiŵalambusyaga ŵandu ŵangalemwa.

¹⁹ Ŵandu wosope ŵajipikene mbili ja kupikanila kwenu, myoyo une ngumpocela jemanja, nambo mnopemnope ngusaka kuti mŵe ŵalunda pa yindu yambone, soni ŵakuŵambala yindu yakusakala.

²⁰ Mlungu jwakusapeleka mtendele, pangakaŵa tacimswanya Satana* pasi pa sajo syenu.

²¹ Timoteo, mjangu jwakukamula najo masengo akumpa moni. Lusiyasi, Yasoni ni Sosipatele, nombe nawo Ayuda acimjangu akuti moni.

²² Une Telesiyo, jwakulemba cikalata ca Pauloci, ngupeleka moni, kwa jemanja acalongo acimjangu mwa Ambuje.

²³ Gayo akupeleka moni jwele m'nyumba mwakwe muwukusasongana mpingo* wosope. Nombe najo Elasito jwakusunga yipanje ya mu msinda akumpa moni pamo ni Kwalito ŵakwe, pamo ni mlongo mjetu Kwalito.

²⁴ Ambuje ŵetu Yesu Klistu ampe upile jemanja wosope. Ami.*

Mlungu acimbicikwe

²⁵ Kwende tumcimbicisye Mlungu! Jwalakwe akwete macili gakumlimbisya jemanja pakukuya Ngani Syambone* singusalalicila, syele sisili maloŵe gakwenesya ya Yesu Klistu. Yiyaliji ya mtemela nipo soni yaliji yakusisika pa yaka yosope kutyocela kalakala.

²⁶ Nambo sambano yikopocele pakulanguka kupitila mu yele yiŵalembile ŵakulocesya, nambo soni kupitila mu Lilamusi lya Mlungu jwa cijumi yimanyice kwa ŵandu ŵa mitundu josope, mwakuti ayikulupilile ni kuyipikanila.

²⁷ Kwa Mlungu jumo pejo, jwali jwalunda, kuŵe lumbili kupitila mwa Yesu Klistu mpaka ndaŵi syosope. Ami.