Ŵaloma 14 - Chiyawo Bible

Mkalamulanaga jwine ni mjakwe

¹ Mumpocele cenene mundu jwele cikulupi cakwe cili cangali macili, nambo ngaŵaga kuti msisyane najo pa nganisyo syakwe.

² Jwine akusakulupilila kuti akukomboleka kulya cilicose nambo jwine jwele cikulupi cakwe cili cangali macili, akusalya lipondape.

³ Jwele jwakusalya cilicose, akamnyosya mjakwe jwali jwangalya yeleyo. Ŵele ŵali ŵangalya yindu yine akamlamula mjakwe jwakusalya, pakuti Mlungu ampocele jwalakwejo.

⁴ Ana m'mwejo mli ŵani kuti mumlamule jwakutumicila jwamsyene kuti alemwisye? Mbujegwepe ni jutalamule naga jwalakwejo akombwele kapena alepele pa masengo gakwe. Jwalakwejo tacipakombola ligongo Ambuje komboleka kumkombolekasya.

⁵ Ŵane akusaganisyaga kuti lisiku lyamti lili lisiku lyakupunda masiku gane, nambo ŵane akusaganisya kuti masiku gosope gali yalumo. Myoyo jwalijose atende mpela mwakuganicisya mu mtima mwakwe.

⁶ Jwele jwakusagosa mnope lisiku line lyakwe, akusatenda myoyo ni cakulinga cakuti Ambuje acimbicikwe. Ŵele ŵakusalya cilicose, akusatenda myoyo kuti Ambuje acimbicikwe, pakuti akusamtogolela Mlungu ligongo lya cakulyaco. Ŵele ŵali ŵangalya yindu yine akusatenda myoyo ni cakulinga cakuti Ambuje acimbicikwe, nipo pakutenda myoyo jemanjajo akusiŵatogolela Ambuje.

⁷ Pangali jumo jwa uweji jwakusalama ligongo lya jwalakwejo jikape, kapena kuwa ligongo lya ugwe msyene.

⁸ Naga tuli cijumi, umiwo uli wa Ambuje, naga tukuwa, tukusituŵa ŵakwe ŵa Ambuje.

⁹ Paja Klistu* ŵawile ni ŵajimwice soni ku ŵawe, ni cakulinga cakuti aŵe Ambuje ŵa ŵandu ŵawe ni ŵa cijumi.

¹⁰ Nambi m'mweji, ana ligongo cici kumlamula mjenu? Nambi m'mwe, ana ligongo cici kumnyosya mjenu? Pakuti wosope ŵene tucijima pameso pa Mlungu kuti atulamule.

¹¹ Paja yilembedwe m'Malemba kuti, “Ambuje akuti, ‘Pandili une, ŵandu tacindindiŵalila ni kwiticisya kuti une ndili Mlungu.’ ”

¹² Myoyo jwalijose jwa uwe tacililondecesya msyene kwa Mlungu yiŵatesile.

Kusamalilana

¹³ Sambano kwende tulece kulamulana jwine ni mjakwe. Mnopemnope msimicisye kuti mkasimtenda kandu kakumkuŵasya mlongo mjenu kapena kakumlemwecesya.

¹⁴ Ngumanyilila soni ngwiticisya mwakamulana ni Ambuje Yesu* Klistu kuti pangali cindu cacili cakusakala mwa jikape, nambo cikusaŵa cakusakala kwa jwele jwakuciganicisya kuti cili cakusakala.

¹⁵ Naga mlongo mjenu mkumdandawulisya ligongo lya cakulya ca mtundu wine wakwe, ni kuti yimkutenda m'mwejo yikulosya kuti ngimkunonyela jwalakwejo. Kasimkunda kuti yakulya yimkusalya yimjonanje mundu jwele Klistu ŵam'wilile!

¹⁶ Sambano kasimkunda kuti ŵandu ŵane ayijigale mpela yakusakala yindu yele m'mwejo mkusayiwona mpela yambone.

¹⁷ Pakuti mu Ucimwene wa Mlungu* cakusosekwa mnope ngaŵa cakulya kapena cakumwa, nambo cilungamo, mtendele ni lukondwa yakusapeleka Msimu Ŵaswela.

¹⁸ Jwalijose jwakutumicila Klistu mu litala lyeleli, akusamsangalasya Mlungu, soni akusaŵa jwakwiticisidwa pameso pa ŵandu.

¹⁹ Ni ligongo lyakwe sambano tusosejesoseje yindu ya mpaka yikamucisye kuti paŵe pana mtendele nambo soni kulimbisyana jwine ni mjakwe.

²⁰ Mkasimjonanga masengo ga Mlungu ligongo lya cakulya. Yakulya yosope yili yeswejesedwe, nambo kuli kulemwa kulya cindu ca mpaka calemwekasye ŵane.

²¹ Kuli kwambone ngalya nyama, ngamwa finyo, soni kungatenda kandu kalikose kamti mpaka kamlemwecesye mjenu.

²² Yele yimkusakulupilila pa yeleyi, yiŵe sikati ja m'mwejo ni Mlungu. Jwana upile mundu jwangawukumsisya mtima wakwe pa ndaŵi jakusaka kutenda kandu.

²³ Nambo jwine akukayicila pa yele yakulya ni kuti akulemwa, ligongo ngakutenda ayi kutyocela mcikulupi cakwete. Cilicose cakusatenda cakusisyana ni yakusakulupilila jwalakwejo, celeco cikusaŵa ulemwa.*