Ŵaloma 12 - Chiyawo Bible

Ya umi wasambano wa ciklistu

¹ Sambano acalongo acimjangu, pakuti Mlungu atutendele canasa cekulungwa camti myiyi, ngumŵenda kuti mpelece yilu yenu kuti yiŵe mbopesi ja cijumi, jajiswela, ni jakumsangalasya Mlungu. Lyeleli liŵe litala lyenu lyakumlambila Mlungu mu usyesyene.

² Mkasimkuyaga ndamo syakusakala sya ŵandu ŵa cilambo capasi pano, nambo kuti Mlungu agalawusye umi wenu wosope pakumpa jemanja mitima ja sambano. Pelepo timcipakombola kumanyilila yakusaka Mlungu, nipo timcimanyilila yele yili yambone ni yakumsangalasya jwalakwejo.

³ Ligongo lya umbone mtima wa Mlungu, jwalakwejo ŵasagwile une kuti mbe ndumetume,* ngumsalila jemanja wosope kuti mkalitenda kuti mli ŵalunda kupunda mumŵelele. Mnopemnope mŵeje ŵakulitimalika mu kuganisya kwenu, mwakulingana ni winji wa cikulupi capelece Mlungu kwa jwalijose jwa jemanja.

⁴ Mcilu cetu cimpepeci tukwete yiŵalo yejinji, nipo yiŵalo yeleyi yikusakamula masengo gakulekanganalekangana.

⁵ Myoyo uwe soni, atamose kuti tuli ŵajinji, tuli cilu cimpepe ŵakulumbikanyidwa mwa Klistu,* nipo jwalijose ali ciŵalo ca mjakwe.

⁶ Tukwete mituka jakulekanganalekangana malinga ni muŵatugaŵilile Mlungu mwa umbone mtima wakwe. Naga mtuka wetu uli kulalicila maloŵe ga Mlungu, tukamulisye masengo mtukawo mwakulingana ni cikulupi citukwete.

⁷ Naga mtuka wetu uli kwatumicila ŵane, tutumicile nditu, naga kuli kwiganya, tujiganye nditu.

⁸ Naga kuli kwalimbikasya ŵane, twalimbikasye nditu. Jwakugaŵana ni acimjakwe yele yakwete, atendeje yeleyi mwalisosa lyakwe. Jwele jwali mlongola, akamuleje masengo gakwe mwacitema. Jwakwatendela ŵane canasa, atendeje mwakusangalala.

Yakusosekwa mu umi wa ciklistu

⁹ Cinonyelo ciŵeje cisyesyene. Mciŵenjeje cicili cakusakala, ni mŵiceje mtima wenu pa kutenda yambone.

¹⁰ Mnonyelaneje jwine ni mjakwe, ni kwacimbicisya ŵane kupunda mumkusatendela mwasyene.

¹¹ Mkamule masengo mwakulimbika, mkatenda ulesi. Mwatumicile Ambuje ni mtima wakulipeleka.

¹² Mŵeje ŵakusangalala ligongo lya cembeceyo cenu. Mŵeje ŵakupilila mu ndaŵi ja yisawusyo, soni mpopeleje ndaŵi syosope.

¹³ Mpeleceje yimkwete kuti yakamucisye ŵakulupilila acimjenu, soni mlinjilileje kwapocela acalendo cenene ku nyumba kwenu.

¹⁴ Mumŵende Mlungu kuti ŵape upile ŵele ŵakusamlagasya. Mŵende kuti Mlungu ŵape upile jemanjajo, ngaŵaga kwalwesa.

¹⁵ Msengwe ni ŵali mkusengwa, mlile pampepe ni ŵali mkulila.

¹⁶ Mŵeje ŵakupikanganana jwine ni mjakwe, soni mkalikwesyaga, nambo msyoŵekaneje nawo ŵandu wamba. Mkalijigalaga mwasyene mpela ŵalunda.

¹⁷ Mundu naga akumtendela yakusakala, mkasimumwucisya cakusakalaco. Mlinjilileje kutenda yindu yakusayiwona ŵandu kuti yili yambone.

¹⁸ Naga kuli kwakomboleka, mtameje mwa mtendele ni ŵandu wosope mpela mutimpakombolele.

¹⁹ Ŵakunonyeledwa ŵangu, mkasimwucisya cakusakala, m'malo mwakwe mwalece, pakuti Mlungu ni jutaciwucisya. Pakuti yilembedwe m'Malemba kuti, “Kuwucisya kuli kwangu, uneji timbucisye, akuti myoyo Ambuje.”

²⁰ Mnopemnope mpela muyilembedwele m'Malemba kuti, “Naga m'magongo jwenu jimkwete sala mumpeni yakulya, naga jimkwete njota mumpe yakumwa, ligongo pakutenda yeleyo timcimtesya soni mnope.”

²¹ Mkasimkunda kuti cakusakala cilicose cimgomece, nambo mcigomece cakusakalaco pakutenda yindu yambone.