Ŵaloma 11 - Chiyawo Bible

Ya canasa ca Mlungu pa Aisalaeli

¹ Sambano nguwusya kuti, “Ana Mlungu ŵakanile ŵandu ŵakwe?” Iyayi, Mlungu nganajasa ŵandu ŵakwe. Une soni ndili jumo jwa mtundu wa Aisalaeli, cisukulu ca Abulahamu* jwa lukosyo lwa Benjamini.

² Mlungu nganiŵajasa ŵandu ŵakwe ŵiŵasagwile kala. Ana ngamkumanyilila yigakuti Malemba kwambaga ya muŵadandawulile Eliya* kwa Mlungu kuti ŵape cilango Aisalaeli? Jwalakwejo piŵatite kuti,

³ “Ambuje jemanjaji ŵawuleje ŵakulocesya ŵa ŵalakwe, ŵagwisisye soni malo gakupelecela mbopesi ga ŵalakwe. Sigele une jikape, ni sambano akusaka kumbulaga ni une jwakwe.”

⁴ Ana Mlungu jwanjanjile cici jwalakwejo? Mlungu jwatite, “Nalisalacisye namsyenepe ŵandu 7,000 ŵele ŵinganamtindiŵalila kose Baala,* mlungu jwakulambucisya.”

⁵ Yili myoyo soni ndaŵi ajino, pasigalile ŵandu panandi ŵele Mlungu ŵasagwile kupitila mu umbone wakwe mtima.

⁶ Yeleyi yatendekwe ligongo lya umbone wakwe mtima wa Mlungu ngaŵaga ligongo lya cilicose catesile jemanjajo. Yikaŵe myoyo, umbone mtima wa Mlungu ngimkaniwuŵa soni umbone mtima.

⁷ Sambano uli? Aisalaeli nganasimana yiŵasosaga. Nambo ŵandu ŵapanandi ŵele ŵiŵasagulidwe ni Mlungu ni ŵiŵayisimene. Ŵakusigalawo m'mapikanilo mwawo mwawugele,

⁸ mpela mugaŵecetele Malemba kuti, “Mlungu ŵapele mtima wangapakombola kupikanicisya yindu, mpaka sambano jino ŵasandwisye jemanjajo kuŵa ŵangalola soni ŵangapikana.”

⁹ Sambano Daudi* akuti, “Yindimba yawo yiŵe lwawu lwakwatejela ŵandu ni kwagwisya kuti apocele cilango.

¹⁰ Meso gawo gatatele kuti akalola, migongo jawo jiŵe jepindice ndaŵi syosope.”

¹¹ Sambano mbusye kuti, “Ana Ayuda ŵakuŵele kuti agwe akajimuka soni?” Iyayi. Nambo ligongo lya kulemwa kwa Ayudawo, cikulupusyo cayice soni pa ŵandu ŵa mitundu jine, kuti Ayuda ŵatendele wiwu.

¹² Naga kulemwa kwa Ayuda kwapindulisye ŵandu ŵa pa cilambo capasi, soni naga kulepela kwawo kupindulisye mnope kwa ŵandu ŵa mitundu jine, nambi uli wosope pitacigapikanila maloŵe ga Mlungu, ni kuti ciŵalanjilo cawo ticicitupa.

Ya cikulupusyo ca ŵandu ŵa mitundu jine

¹³ Sambano ngusaka kumsalila jemanja ŵimkinimŵa Ayuda. Mpelaga une ndili jwandumetume kwa ŵandu ŵa mitundu jine, myoyo ngusalikwesya pa masengo gangu kuti gali gakusosekwa mnope.

¹⁴ Nambo ngusasosa kuti natesye wiwu ŵandu ŵa mtundu ŵangu ŵele ŵali Ayuda, kuti pakutenda myoyo nipakombole kwakulupusya ŵane mwa jemanjajo.

¹⁵ Naga ŵandu ŵa cilambo capasi ŵalungamisidwe ni Mlungu ligongo lyakuti Mlungu ŵakanile Ayuda, nambi tiyiciŵa uli jwalakwejo pitacapocela soni jemanjajo, tiyiciŵa mpela ŵandu ŵawe akwimuka ku ŵawe!

¹⁶ Naga ciduswa candanda ca mkate cipelecedwe kwa Mlungu, ni kuti mkate wosopewo uli wakwe wa Mlungu; naga miciga ja citela jili jipelecedwa kwa Mlungu, ni kuti nyambi syakwesyo sili soni syakwe sya Mlungu.

¹⁷ Nyambi sine sya citela cakupanda ca olifi* syapacwice, nipo nyambi sya citela ca mwitinji ca olifi cilumbikanyidwe pelepo. Myoyo jemanja ŵa mitundu jine, mli mpela ka nyambi ka citela ca olifi ca mwitinji nipo sambano mkusagaŵana umi wa usimu wa Ayuda.

¹⁸ Ni ligongo lyakwe mkasimwanyosyaga ŵele ŵaŵapacwice mpela nyambi ŵala. Ana jemanja mpaka mlikwesye camtuli? Jemanja mli mpela lunyambi cabe. Jemanja nganimŵa ŵimkusakamulila miciga, nambo micigajo ni jikusijimkamulila jemanja.

¹⁹ Nambo timciti kuti, “Nambo nyambi syapacwice kuti une lumbikane nawo pa citelapo.”

²⁰ Yakuwona, jemanjajo ŵapacwice ligongo nganakulupilila, nambo jemanja mli ciŵela kutama mcitela ligongo lyakulupilila kwenu.

²¹ Mlungu nganiŵalecelela Ayuda ŵiŵaliji mpela nyambi sisyesyene sya citela. Ana sambano mkupela kuti tacimlecelela ni jemanja ŵakwe?

²² Pelepo m'manyilile kuti Mlungu ali jwa canasa, nambo soni jwaukali kwa ŵandu ŵiŵalepele, ŵa lutumbilo, nambo kwa jemanja jwalakwejo ali jwa canasa, bola naga mkusamala umbone mtima wakwe. Naga ngimtenda yeleyi, nomwe ŵakwe Mlungu tacimtyosya.

²³ Naga ŵanewo akuleka ungakulupilila wawo, tiŵalumbikanye ku citela pakuti Mlungu ali jwamacili, pakuti jwalakwejo ali jwakupakombola kwalumbikanya soni.

²⁴ Jemanja, ŵimli mpela nyambi sya citela ca olifi ca mwitinji, Mlungu ŵampacwile kutyocela ku citela cicamŵelece, ni kumlumbikanya ku citela ca olifi cakupanda. Naga yili myoyo, ana ngasiciŵa cindu cangasawusya kwa jwalakwejo kuti alumbikanye soni ku citela ca olifi cakupanda, nyambi syakwe sisyesyene sisyapacwice?

Canasa ca Mlungu pa ŵandu wosope

²⁵ Pana yamtemela, yingusaka kuti myimanyilile jemanja acalongo acimjangu, kogopela kuti mtakulilumba kuti mli ŵalunda. Mtemelawo uli wakuti, kulimbisya mitima kwa Aisalaeli ŵane nganikuŵa kwakutamilicika, nambo tikucimala mpaka ciŵalanjilo cakwanila ca ŵandu ŵa mitundu jine jili jiyice kwa Mlungu.

²⁶ Myoyo Aisalaeli wosope tacikulupuka. Mpela Malemba mugaŵecetele kuti, “Mkulupusyo tacityocela ku Siyoni,* tacityosya ungalumbana wosope wa yisukulu ya Yakobo.*

²⁷ Tinjilangana nawo celeci, pitinjatyocesya ulemwa* wawo.”

²⁸ Ligongo lyakukana Ngani Syambone,* Ayuda aŵele amagongo ŵa Mlungu ligongo lya jemanja ŵa mitundu jine. Nambo ligongo cisagula ca Mlungu, jemanjajo ali acimjakwe ligongo lya acinangolo ŵawo ŵakala ŵala.

²⁹ Pakuti Mlungu jwangacenga naga amsagwile mundu ni kumpa mtuka.

³⁰ Pakuti mpela jemanja kala nganimumpikanilaga Mlungu, nambo sambano Mlungu akumtendela canasa ligongo lya ungapikanila wa Ayuda.

³¹ Myoyo soni ligongo lya canasa cimpocele, Ayuda sambano ngakumpikanila Mlungu, m'malo mwakuti nombe nawo sambano apocele canasa cakutyocela kwa Mlungu.

³² Pakuti Mlungu ŵatesile wosope kuŵa acikayidi ŵa ku ngapikanila, ni cakulinga cakuti jwalakwejo alosye canasa kwa jemanjajo wosope.

Mlungu ali jwakucimbicikwa

³³ Cipanje ca Mlungu cili cekulungwa nditu. Lunda ni umanyilisi wakwe yili yakusokoka mnope. Pangali ŵa mpaka alondesye nganisyo syakwe, pangali ŵa mpaka agapikanicisye matala gakwe.

³⁴ Mpela maloŵe ga Mlungu mugakuŵecetela kuti, “Ana ŵani ŵakumanyilila nganisyo sya Ambuje, ana ŵani mpaka ampe jwalakwejo misyungu?

³⁵ Ana ŵani ŵapelecejepo kandu kwa Mlungu, ni cakulinga cakuti nombe Mlungujo amwucisye kandu?”

³⁶ Pakuti yindu yosope yapanganyidwe ni jwalakwejo, nipo yindu yosope yikuŵaga ni umi ligongo lya jwalakwejo. Kwa jwalakwejo kuŵeje lumbili mpaka ndaŵi syosope! Ami.