Ŵaloma 10 - Chiyawo Bible

¹ Acalongo acimjangu, ngusasacilila ni mtima wangu wosope, nipo cingusaŵenda kwa Mlungu cili cakuti Aisalaeli wosope akulupuce.

² Ngwatendela umboni jemanjajo kuti akwete mtima wakusaka kumtumicila Mlungu, nambo nganapikanicisya cenene.

³ Pakuti jemanjajo ngakumanyilila mwele Mlungu mwakusiŵalungamicisya ŵandu pameso pakwe. M'malo mwakwe akulimbicila kutenda yindu yawoyawope ni cakulinga cakuti alungamisidwe ni Mlungu pakugasunga Malamusi.

⁴ Pakuti Klistu* ŵagayicisye Malamusi giŵalembile Mose* pasyesyene, mwakuti jwalijose jwakulupilila, akusasimanikwa kuti ali jwakulungama pameso pa Mlungu.

Cikulupusyo cili ca wosope

⁵ Kuŵeceta ya cilungamo cacikusasimanikwa pakugapikanila Malamusi, Mose ŵalembile kuti, “Mundu jwakutenda yigakuŵeceta Malamusi, tacikola umi pakuyitenda yeleyo.”

⁶ Nambo kuŵeceta ya cilungamo cacikusimanikwa pagamba kukulupilila, Malemba gakuti, “Mkaŵeceta mu mtima mwenu kuti, ‘Ana ŵani ŵitakwele kwawula kwinani?’ ” (Kweleku ni kukuli kumsalila Klistu kuti ayice kwa uweji).

⁷ “Mkaŵeceta soni kuti, ‘Ana ŵani tacitulucila ku cilambo ca ŵandu ŵawe?’ ” (Kweleku ni kukuli kumwucisya Klistu kutyocela ku cilambo ca ŵandu ŵawe.)

⁸ Nambi akuti uli? Akuti, “Maloŵe ga Mlungu gali ciŵandika namwe, gali pangomo penu, soni mu mtima mwenu.”

⁹ Naga mkwiticisya ni pakamwa penu kuti Yesu* ali Ambuje, ni kulupilila mu mtima mwenu kuti Mlungu ŵamjimwisye jwalakwejo ku ŵawe, timcikulupuka.

¹⁰ Pakuti mundu akusatiji naga akulupilile ni mtima wakwe, akusasimanikwa kuti ali jwakulungama pameso pa Mlungu, soni akusatiji naga ajiticisye ni pakamwa cikulupi cakweco, akusakulupuka.

¹¹ Malemba gakuti, “Mundu jwalijose jwakulupilila mwa jwalakwejo, ngasatenda soni.”

¹² Myoyo pangali kulekangana sikati ja Ayuda ni ŵandu ŵa mitundu jine,* pakuti Mlungu ni Ambuje ŵa wosopewo, nipo akusapeleka yindu yambone yejinji kwa ŵandu ŵakumpopelelaga jwalakwejo.

¹³ Mpela mugakuŵecetela Malemba kuti, “Mundu jwalijose jutalikolanje lina lya Ambuje, tacikulupuka.”

¹⁴ Ana ŵandu mpaka akolanje uli lina lya Mlungu naga nganamkulupilila? Ana mpaka amkulupilile uli naga ŵandu nganapikana ya jwalakwejo? Ana mpaka apikane uli ya jwalakwejo naga pangali jwine jwakulalicila?*

¹⁵ Ana ŵandu mpaka alalicile uli naga pangali jwine jwakwatuma? Paja maloŵe ga Mlungu gakuti, “Cili cindu cakusangalasya kwawona ali mkwisa ŵakulalicila Ngani Syambone.”

¹⁶ Nambo ngaŵa wosope ŵaŵapocele Ngani Syambonesyo. Mpela muŵaŵecetele jwakulocesya* Yesaya kuti, “Ambuje, ana ŵani ŵiŵakulupilile Utenga utwalalice?”

¹⁷ Myoyo, mundu akusakulupilila ligongo lya yele yayipikene, nipo yele yapikeneyo yikusatyocela mu yakulalicila yakwamba Klistu.

¹⁸ Nambo mbusye kuti, “Ana nganagapikana maloŵego?” Ŵagapikene kusyesyene. Mpela mugaŵecetele maloŵe ga Mlungu kuti, “Maloŵe gawo gapikanice pa cilambo cosope capasi, Maloŵego gajile kwika mpaka kumbesi kwa cilambo.”

¹⁹ Nguwusya soni kuti: Ana Aisalaeli nganagapikanicisya maloŵego? Mose* ni juŵatandite kwanga nipo ŵatite kuti, “Une tinjimtendesya wiwu ni mtundu umkaniwuŵa usyesyene, tinjimtumbilisya ni mtundu wa ŵandu ŵakuloŵela.”

²⁰ Nambo Yesaya ŵaŵecete mwakulimba mtima kuti, “Ŵasimene ŵandu umkanasosagasosaga une. Nawonecele kwa ŵandu ŵimkanawusyaga ya une.”

²¹ Nambo kwambaga ya Aisalaeli ŵatite, “Lisiku lyosope lyene natambasukwile makono gangu ku mtundu wa ŵandu ŵangambikanila ni ŵakunjimucila une.”