Ŵaloma 1 - Chiyawo Bible

¹ Cikalataci cikutyocela kwa une Paulo, jwakutumicila jwa Yesu* Klistu* jwakusagulidwa* ni Mlungu kuti mbe jwandumetume soni jwele junasagulidwe kuti ndalicile Ngani syakwe Syambone.

² Ngani Syambone* siŵasasile Mlungu kala kupitila mwa ŵakulocesya ŵakwe, mpela muyilembedwele m'Malemba Geswela.

³ Ngani Syambonesi sikwamba Ambuje Yesu Klistu Mwanace jwa Mlungu. Sikwamba ya umundu wakwe, nambo soni kuti ŵaliji cisukulu ca Daudi.*

⁴ Kwamba ya umlungu wakwe; jwalakwe jwalosyedwe mwamacili ga msimu kuti ali Mwanace jwa Mlungu pakwimusidwa ku ŵawe.

⁵ Kupitila mwa jwalakwejo une napocele upile ŵakuwa jwandumetume ligongo lya Klistu, ni cakulinga cakuti nalongolele ŵandu ŵa mitundu josope kuti amkulupilileje ni kumpikanila.

⁶ Ŵane mwa ŵanduwo mli jemanja, umwaŵilanjidwe ni Mlungu kuti mŵe ŵakwe ŵa Yesu Klistu.

⁷ Myoyo ngumlembela jemanja wosope ŵimli ku yilambo ya ku Loma, ŵimkusanonyeledwa ni Mlungu, nipo ŵimŵilanjidwe ni Mlungu kuti mŵe ŵandu ŵakweŵakwepe. Umbone mtima ni mtendele yakutyocela kwa Mlungu Atati ŵetu ni kwa Ambuje Yesu Klistu yiŵe ni jemanja.

Lipopelo lyakutogolela

⁸ Pandanda ngumtogolela Mlungu jwangu, kupitila mwa Yesu Klistu, ligongo lya jemanja wosope, pakuti pa cilambo cosope capasi ŵandu akuŵeceta ya cikulupi cenu.

⁹ Pakuti Mlungu jwele jungusinamtumicila ni mtima wangu wosope pakulalicila ya Ngani Syambone sya Mwanace jwakwe, jwalakwejo ali mboni jangu kuti une ngusinampopelela jemanja ndaŵi syosope.

¹⁰ M'mapopelo gangu, ngusinamŵenda Mlungu kuti mbate lipesa, mwa lisosa lyakwe kuti yice kumangwenuko.

¹¹ Ngusacilisya mnope kumwona jemanja, kuti nimgaŵile jemanja mituka jine ja usimu, kuti pakutenda myoyo ngakombolece kumlimbikasya mitima.

¹² Cingugopolela cili cakuti jemanja pamo ni une jwakwe tukalimbisyane jwine ni mjakwe mu cikulupi cetu.

¹³ Acalongo acimjangu, ngusaka m'manyilile kuti kaŵilikaŵili une mbele ndili mkuganisya yakuti mbice kweleko, nambo mpaka sambano jino yapali yine yakundepelekasya. Ngusosa kuti tingamule masengo ni jemanja ni kuyiwona yakuyicisya yakwe mpela munatendele ni ŵandu ŵa mitundu jine.*

¹⁴ Ngwete masengo gakulalicila kwa ŵandu wosope, kwa ŵandu ŵa mitundu jine, kwa ŵalijiganye ni ŵangalijiganya.

¹⁵ Yeleyi yikundendesya une kuti lalicile kwa jemanja soni kwa ŵandu ŵa ku Loma Ngani Syambonesi.

Ya macili ga Ngani Syambone

¹⁶ Une ngangutenda soni ni Ngani Syambone, ligongo Nganisyo sili macili ga Mlungu ga cikulupusyo kwa jwalijose jwakukulupilila, pandanda Ayuda, kaneko kwa ŵandu ŵa mitundu jine.

¹⁷ Ngani Syambonesi sikusatujuwulila mwele Mlungu mwakusiŵalungamicisya ŵandu pameso pakwe. Yeleyitu yikusakwanilisidwa kutyocela pandanda mpaka pambesi mwa cikulupi mpela muyilembedwele m'Malemba kuti, “Mundu jwele jwali jwakulungama pameso pa Mlungu tacilama kupitila mu cikulupi.”

Ŵandu wosope ali ŵakulemwa

¹⁸ Mlungu akusalosya lutumbilo lwakwe kutyocela kwinani kuja kwa ŵandu wosope ŵali ŵakulemwa. Akusiŵatumbilila ŵandu ŵangalungama ŵele ŵangasosa kumanyilila yakuwona.

¹⁹ Mlungu akusiŵapa cilango jemanjaji, ligongo yakwenela mundu kuyimanyilila yakwamba Mlungu, jemanjajo akuyimanyilila cenene pakuti Mlungu ni juŵajuwulile jemanjaji yeleyi.

²⁰ Kutyocela pa ndaŵi jiŵapanganyisye cilambo, ŵandu aŵele ali mkumanyilila ndamo jangawoneka ja Mlungu, yele yili macili gakwe gangamala nambo soni umlungu wakwe. Aŵele ali mkumanyilila pakuyiwona yiŵapanganyisye jwalakwejo. Myoyo ŵangali pakutilila palipose.

²¹ Atamose kuti jemanjajo ŵam'manyi Mlungu, m'malo mwakuti amlumbe jwalakwejo kapena kumtogolela, nganisyo sya ŵanduwo syaliji syangali mate, nipo soni m'mitwe mwawo mugumbele ni nganisyo syakusakala.

²² Jemanjajo akusatiji kuti ali ŵakalamuka nambo citamileco ali ŵakuloŵela.

²³ Ŵalesile kumlambila Mlungu jwa cijumi jwangali mbesi, m'malo mwakwe ŵalambilaga yilandanyo yiyapanganyidwe kuti yiwoneceje mpela mundu jwele jwakusawaga kapena mpela yijuni ni yinyama yine, kapena yakwaŵa.

²⁴ Ali ni ligongo lyakwe Mlungu ŵalesile jemanjajo kuti atendeje yindu yakusakala yiyasakaga mitima jawo mpaka kutenda yindu yakutesya soni jwine ni mjakwe.

²⁵ Ŵalesile yakuwona yisyesyene ya Mlungu m'malo mwakwe ni kukuyaga ya unami. Ŵatandite kulambila yindu yakupanganyidwa ni Mlungu m'malo mwakumtumicila Mlungu msyenejo, jwele jwali jwakwenela kumcimbicisya mpaka kalakala! Ami.*

²⁶ Pa lyele ligongoli, Mlungu ŵalesile jemanjajo kuti atende yindu yakutesya soni yijasakaga mitima jawojo. Atamose acakongwe, ŵalesile kutenda yindu ya mu ulombela muyikusosekwela kuŵela mwiŵasa nambo m'malo mwakwe akukuya utende wine wakusisyana ni muyikwenela kuŵela.

²⁷ Nombe nawo acalume, ŵalesile ndamo ja cipago jakwakumbila acakongwe, nambo m'malo mwakwe akukumbilana mnope acalumepe. Ŵatendaga yakutesya soni, myoyo ŵaliŵilacisye acimsyene cilango cakwaŵajilwa malinga ni yitendo yawo yakusakalayo.

²⁸ Pakuti jemanjajo nganayitendela masengo ya kumpikanila Mlungu, Mlungujo ŵalesile jemanjajo mu nganisyo syawo syakusakalasyo, pakuti ŵatendaga yangasosekwa.

²⁹ M'mitima mwawo mwagumbele ni yindu yangalumbana yejinji, mpela kusakala, mitulo ni lupuso. Akusagamba ganisya ya wiwu, yakuwulaga ŵandu, ya ndeu, yakulambusya ni ya lupuso. Akusanonyela misogodo

³⁰ ni kulambucisyana jwine ni mjakwe, nipo ŵakuŵengana ni Mlungu, ŵacipongwe, ŵakulikwesya soni ŵakusimbwa. Akusasosasosa matala gasambano gakutendela yakusakala soni ŵangapikanila acinangolo ŵawo.

³¹ Ali ŵakuloŵela, ŵangakulupicika, ŵangali cinonyelo cakupagwa naco kapena canasa.

³² Akusamanyilila Lilamusi lya Mlungu lyakuti ŵandu ŵakutenda yeleyi akuŵajilwa kuwa, nambo jemanjajo ŵakutenda yeleyowo, akusakamulana ni ŵandu ŵane ŵakusayitendaga yeleyi.