Ŵakulamula 9 - Chiyawo Bible

Abimeleki

¹ Mwanace jwa Gidiyoni lina lwakwe Abimeleki ŵajile ku msinda wa Shekemu, kwa acalongo acimjawo ŵa mamagwe ni kwasalila jemanjajo kuti

² ŵawusye ŵandu ŵa ku Shekemu kuti, “Cici ca mpaka asagule? Pasikati pakulamulidwa ni ŵanace wosope 70 ŵa Gidiyoni kapena mundu jumope basi? Akumbucile soni kuti une Abimeleki ni mundu jwa mtundu wawo ni miasi jawo jisyesyene.”

³ Alongo acimjawo ŵa mama ŵawo ŵamŵecetele kwa ŵandu ŵa ku Shekemu gele maloŵega, nipo ŵandu ŵa ku Shekemu ŵasagwile kwakuya Abimeleki ligongo ŵaliji mlongo mjawo.

⁴ Jemanjajo ŵampele Abimeleki mbiya sya silifa* 70 sya m'nyumba jakumpopelela Baala Beliti, ni syele mbiyasyo jwalakwe ŵalembile likuga lya asilikali ŵaganyu ŵakusakala umi kuti amkuye jwalakwe.

⁵ Ni ŵajile ku nyumba ja baba ŵawo ku Ofula, nipo ali ayice kweleko ŵawuleje acakulugwe 70, ŵanace ŵa Gidiyoni penani pa liganga limo. Nambo Yotamu, mwanace jwa ku mbesi jwa Gidiyoni, ŵajuŵile mwakuti nginamwulaga.

⁶ Kaneko ŵandu wosope ŵa ku Shekemu ni ku Betimilo ŵasongene pamo ni kwawula ku Shekemu pa citela cakupelecela mbopesi ca mtundu, kuŵajile kukwajinjisya Abimeleki ucimwene.

⁷ Yotamu piŵapikene yeleyi, ŵajile kwima penani pa Litumbi lya Gelisimu ni ŵagumisile kwa ŵanduwo aciŵecetaga kuti, “Mumbikanile une, jemanja ŵandu ŵa ku Shekemu, ni Mlungu tacimpikana jemanja!

⁸ Kalakala yitela yasongene pamo kuti yilisagulile mwenye. Yacisalile citela ca olifi,* ‘Mŵe mwenye jwetu.’

⁹ Citela ca olifi catite kuti, ‘Naga kuti namlamulile jemanja, tinjisosekwa kuleka koposya mawuta gangu, gasapanganyicisyaga masengo pakujicimbicisya milungu ni ŵandu ŵakwe.’

¹⁰ Kaneko yitelayo yatite kwa citela ca mkuju, ‘Myice mŵe mwenye jwetu.’

¹¹ Nambo citela ca mkuju cila catite kuti, ‘Naga kuti une namlamulile jemanja, tinjiŵajilwa kuleka kusogola cisogosi cangu cambone ni cakunong'a.’

¹² Ni yitela yatite kwa mpeleya, ‘Myice mŵe mwenye jwetu.’

¹³ Nambo mpeleya watite kuti, ‘Naga kuti une nalamulile jemanja, tinjiŵajilwa kuleka koposya finyo, jwakusasangalasya milungu ni ŵandu ŵakwe.’

¹⁴ Ni yitela yosope yene yatite kwa kacitekete kamwitinji, ‘Myice mŵe mwenye jwetu.’

¹⁵ Kacitekete ka miŵa kajanjile kuti, ‘Naga akusosa kuti andende une kuŵa mwenye jwawo, ni ayice ajuŵe mu m'bwilili wangu. Naga ngakwika, moto tiwucikolela kutyocela mu nyambi syangu sya miŵa ni kocajoca mikungusa ja ku Lebanoni.’

¹⁶ “Kaneko,” Yotamu ŵapitilisye kuŵeceta kuti, “Ana mwatesile ni mtima wenu wosope ni mwakulupicika pakwatenda Abimeleki kuti aŵe mwenye? Ana ŵalicimbicisye liŵasa lya Gidiyoni pakukumbucila yambone yiŵayitesile?

¹⁷ Akumbucile kuti baba ŵangu ŵaputile jemanja ngondo. Ŵapelece umi wawo kuti ŵakulupusye jemanja kwa Amidiyani.

¹⁸ Nambo lelo jemanja alijimucile liŵasa lya baba ŵangu. Jemanja mwawuleje ŵanace ŵawo ŵacalume 70 ni liganga limo, nipo pa ligongo lyakuti Abimeleki, mwanagwawo jwakupagwa mwa jwamkongwe jwamasengo jwawo ali mlongo mjenu jemanja, amtesile kuŵa mwenye jwa ku Shekemu.

¹⁹ Myoyo, naga yayitesile lelo kwa Gidiyoni ni liŵasa lyakwe yaliji yacikulupi ni yakuwona, ni asangalaleje ni Abimeleki, soni ŵelewo asangalaleje ni jemanja.

²⁰ Nambo naga ngaŵa myoyo, moto ukolele kutyocela kwa Abimeleki ni wajoce ŵandu ŵa ku Shekemu ni ku Betimilo. Moto ukolele kutyocela kwa ŵandu ŵa ku Shekemu ni ku Betimilo ni wajoce Abimeleki.”

²¹ Yotamu ŵatisile kuja kutama ku Biye, pakuŵa ŵajogopaga akulugwe, Abimeleki.

²² Myoyo Abimeleki ŵalamulile Isalaeli kwa yaka yitatu.

²³ Kaneko Mlungu ŵaŵengenye Abimeleki ni ŵandu ŵa ku Shekemu, ni ŵamjimucile.

²⁴ Abimeleki ni ŵandu ŵa ku Shekemu ŵiŵamlimbicisye kwawulaga ŵanace 70 ŵa Gidiyoni, yatendecele yeleyi kuti Mlungu ŵalosye yisawusyo pa ulemwa* uŵatesile.

²⁵ Ŵandu ŵa ku Shekemu ŵaŵisile acalume penani pa matumbi kuti amjuŵilile Abimeleki, nipo jemanjajo ŵamswambile jwalijose juŵapite lyele litalalyo. Nambo ŵandu ŵane ŵasalile Abimeleki ya nganiji.

²⁶ Kaneko mwanace jwa Ebedi lina lyakwe Gaala jwayice ku Shekemu ni acakulugwe, nipo ŵandu ŵa ku Shekemu ŵamkulupilile jwalakwejo.

²⁷ Wosope ŵene ŵajile m'migunda mwawo kukukaŵa yisogosi ya mipeleya, ŵapanganyisye finyo ni kutenda cindimba. Jemanjajo ŵajinjile m'nyumba jakumlambilila mlungu jwawo, kuŵajile kukulya ni kumwa ni kwatukana Abimeleki.

²⁸ Gaala mwanace jwa Ebedi ŵatite, “Ana mu Shekemu muno tuli ŵandu ŵamti uli? Abimeleki ni ŵani kuti tukwatumicila? Mwambone ana ŵeleŵa ŵani? Mwanace jwa Gidiyoni! Nombe najo Sebuli kasembe jwakwe ni kuŵa ŵandu ŵakwatumicila uwe? Amcimbicisye Hamoli nangolo jwawo, jwali babagwe Shekemu!

²⁹ Yingaŵe kuti une ni jungwalamulila ŵele ŵanduŵa, ningamtyosisye Abimeleki! Ningamsalile kuti ‘Mliŵicile cile pakonjecesya ŵa ngondo ŵenu ni myice tumenyane!’ ”

³⁰ Piŵapikene Sebuli jwakulamula jwa msindawo yiŵaŵecete Gaala yila, jwalakwejo ŵapile mtima.

³¹ Ŵatumisye ŵamitenga ku Aluma kukusala kwa Abimeleki kuti, “Ku Shekemu ayice Gaala mwanace jwa Ebedi ni acakulugwe, jemanjajo ngiŵakunda wawojo kuti ajinjile mu msinda.

³² Myoyo, wawo ni asilikali ŵawo ajende cilo ni akajuŵe m'migunda.

³³ Pakopoka lyuŵa malaŵi kundaŵi tajimuce ni kuja kuwutanda msindawo mwacisisimucisya. Kaneko pitaciyikaga Gaala ni ŵandu ŵakwe kukwatanda wawojo, tiŵapute yakulimba ni kwapunda mwacitema!”

³⁴ Myoyo Abimeleki ni asilikali ŵakwe ŵiŵaliji m'makuga mcece ŵajesile ni cilo ni ŵajuŵile kusa kwa msinda wa Shekemu.

³⁵ Abimeleki ni asilikali ŵakwe piŵam'weni Gaala ali ajimi pa cipata cakwinjilila mu msinda, jemanjajo ŵajimwice pa malo gawo giŵajuŵilego.

³⁶ Gaala ali ŵaweni jemanjajo ŵamsalile Sebuli kuti, “Mlole! Ŵandu akutuluka kutyocela penani pa matumbi!” Sebuli ŵajanjile kuti, “Nganaŵa ŵandu ŵelewo.” “Mkuciwona ciwilili ca matumbi cicikuwoneka mpela ŵandu.”

³⁷ Gaala ŵawilisye soni kuti, “Mlole! Ŵandu akutuluka kutyocela sikati ja litumbi nipo likuga line likwenda mu msewu utyocele ku citela ca mtundu kwakusaŵecetaga ŵandu ni misimu ja ŵandu ŵawe!”

³⁸ Kaneko Sebuli ŵamwusisye jwalakwe kuti, “Ana yimŵecetejeŵeceteje yila ni yapi sambano? Eti m'mwejo nganimŵa ŵimwatiji kuti, ‘Abimeleki ni ŵani kuti twatumicile? Ŵandu ŵimwatukanaga ŵala ni ŵeleŵa. Mjawule mkapute sambano jino.’ ”

³⁹ Gaala ŵakopwece ni kwalongolela ŵandu ŵa ku Shekemu kukwaputa Abimeleki.

⁴⁰ Gaala ŵatisile, nipo Abimeleki ŵamtopwesye jwalakwejo. Ŵakuwulala ŵaliji ŵajinji mpaka pakwinjilila pa cipata ca msinda.

⁴¹ Abimeleki ŵatemi ku Aluma, nipo Sebuli ŵakopwesye Gaala ni acakulugwe kutyocela mu Shekemu, kuti akasimanikamo soni.

⁴² Kundaŵi kwakwe ŵandu ŵa ku Shekemu ŵalilinganyisye kuti ajawule ku migunda mpela mwa masiku gosope nambo mundu jwine ŵasalile Abimeleki yeleyi.

⁴³ Pelepo ŵagaŵenye asilikali ŵakwe m'makuga gatatu, ni ŵajuŵilile m'migundamo. Piŵaweni ŵandu ŵala ali mkopoka mu msinda ŵakwipwice kuŵajuŵileko kuti ŵawulaje.

⁴⁴ Abimeleki ni likuga lyakwe ŵawutucile kukulondela cipata ca msinda, kutendaga makuga gane gaŵiligo gagundicile kwawulaga ŵandu wosope ŵiŵaliji m'migunda.

⁴⁵ Ngondojo japelengenye mpaka lyuŵa lyosope. Abimeleki ŵawusumwile msindawo, ŵawuleje ŵandu ŵakwe, ŵawupaswile, ni kuwalawasya njete palipose.

⁴⁶ Ŵandu ŵa ku Sanja ja ku Shekemu piŵapikene yeleyo, myoyo ŵatilile ku malo gesyungulile ni lipupa ku nyumba jakumlambililamo Elibeliti.

⁴⁷ Abimeleki ŵasalile kuti ŵasongene kweleko.

⁴⁸ Jwalakwe ŵajile ni asilikali ŵakwe Kwitumbi lya Salimoni kukukata lunyambi lwa citela ni liŵago. Ŵasalile kuti jwalijose ajanguye kutenda yiŵatesile jwalakwe pakunyakula citela pekoyo.

⁴⁹ Ni mundu jwalijose ŵakatile lunyambi lwakwe ni kwakuya Abimeleki ni kuja kuwunjika sasusyo pa lipupa lya nyumba jakulambilila. Ŵajipambile moto nyumbajo ŵanduwo ali mkati m'momo, nipo ŵandu wosope ŵene ŵiŵaliji mkati ŵakwana acalume ni acakongwe 1,000 ŵawile.

⁵⁰ Kaneko Abimeleki ŵajile ku Thebesi, ŵawusyungulile msindawo ni kuwusumula.

⁵¹ Mu msindamo mwaliji mwana sanja jakulimbangana, acakulungwa ŵa msindawo, acalume ni acakongwe ŵakwe ŵatilile mwelemo. Jemanjajo ŵaliwugalile mkati ni kwela mwinani kumsakasa.

⁵² Abimeleki piŵayice ni asilikali ŵakwe ku sanjako kusosa kuti ajinjile mkati. Jwalakwe ŵayice mpaka pa litanga lya sanja kuti alijoce ni moto.

⁵³ Nambo jwamkongwe jwine ŵaponyisye lisyago pa mtwe pa Abimeleki ni kasa cikalakasa cawo.

⁵⁴ Kaneko ŵamŵilasile mcanda juŵanyakwile yida yakwe ni ŵamlamwile kuti, “Jigalani upanga wenu mumbulaje. Ngingusosa ŵandu tajileje kuti nawulajidwe ni jwamkongwe!” Nipo mcandajo ŵamsomile ni lipanga Abimeleki, mwakuti lipangalyo lyakopocele ku mgongo nipo ŵawile.

⁵⁵ Piŵayiweni asilikali ŵa ku Isalaeli kuti Abimeleki awile, wosope ŵene ŵawujile kumangwawo.

⁵⁶ Mlungu ŵamwucisye Abimeleki yamti myiyi ligongo lya ulemwa uŵatesile acakulugwe makumi msano ni gaŵili ni kulitesya soni liŵasa lya babagwe.

⁵⁷ Nipo Mlungu ŵapele yisawusyo ŵandu ŵa ku Shekemu ligongo lya kusakala kwawo, soni ŵalwesece mpela muŵaŵecetele Yotamu mwanace jwa Gidiyoni.