Ŵakulamula 8 - Chiyawo Bible

Amidiyani akupundidwa kambesi

¹ Kaneko acalume ŵa Efelemu ŵatite kwa Gidiyoni, “Ligongo cici nganimtuŵilanga uwe pimwajawulaga kukumenyana ni Amidiyani? Ligongo cici mtutendele uwe yamti myiyi?” Jemanjajo ŵamdandawile ali atumbile mnope pa yiyatendeceyo.

² Nambo jwalakwe ŵajanjile kuti, “Yinapakombwele une kuyitenda yangali masengo pakuŵanicisya ni yatesile jemanja. Namuno yamnono yatesile jemanja acalume ŵa Efelemu yili yakuŵajilwa kusoseka kwakwe kupunda yele yiwutesile mtundu wangu wosope wene.

³ Mwambone, jemanja mwamacili ga Mlungu ŵawuleje ayimwene ŵaŵili ŵa Amidiyani, Olebu ni Seebu. Nambi cinapakombwele une kucitenda ni cici pakuwanicisya ni yele?” Piŵaŵecete yeleyi, mitima jawo japwele nganatumbila soni.

⁴ Gidiyoni ni acalume 300 ŵala ŵaliji ali ayice ni komboka Lusulo lwa Yolodani pa jele ndaŵiji. Ŵaliji ali apesile, nambo ŵaliji ali mkwatoposyape amagongo.

⁵ Piŵayice ku Sukoti, jwalakwe ŵasalile ŵandu ŵa mtawuni kuti, “Conde ŵagaŵile asilikali ŵangu mitanda ja mkate. Asakalice mnope, nipo une ngwatoposya ayimwene ŵa Amidiyani, Seba ni Salimuna.”

⁶ Nambo acakulungwa ŵa ku Sukoti ŵatite kuti, “Cakwapela asilikali ŵenu yakulya ni cici kutendaga Seba ni Salimuna nginimwakamula?”

⁷ Gidiyoni ŵajanjile kuti, “Cambone! Nambotu pitacimbapo AMBUJE* une ni kwapunda Seba ni Salimuna, pakuwuja tinjimputa jemanja pakutomokola mnowu wenu ni yikoti ya miŵa ja kucipululu!”

⁸ Gidiyoni ŵajile soni ku Penuwele kukwaŵenda ŵandu ŵa kweleko, nambo kwanga kwawo kwa ŵandu ŵa ku Penuwele kwalandene ni kwa ŵandu ŵa ku Sukoti.

⁹ Jwalakwe ŵasalile jemanjajo kuti, “Une tingawuje jwangawulala soni mwa mtendele, nambo tinjigumula sanja jenuji!”

¹⁰ Seba ni Salimuna ŵaliji pa Kalikoli ni ŵa ngondo ŵawo. Mwa ŵa ngondo ŵawo wosope ŵa mitundu ja ku cipululu, ŵasigele 15,000 basi, asilikali 120,000 ŵawulajidwe.

¹¹ Gidiyoni ŵajesile ca mu msewu mungulugulu mwa cipululu, kungopoko lyuŵa kwa Noba ni Yogibeha, ni ŵatandite ŵa ngondowo mwacisisimucisya.

¹² Ayimwene ŵaŵili ŵa Amidiyani, Seba ni Salimuna, ŵatisile, nambo ŵatopwesye ni ŵakamwile, nipo ŵa ngondo wosope ŵabalalikangene.

¹³ Gidiyoni mwanace jwa Yowashi piŵawujilaga kutyocela ku ngondo ŵapitile litala lya pa Mpata pa Helesi,

¹⁴ jwalakwe ŵamkamwile mcanda jwakutyocela ku Sukoti ni ŵamwusisye. Mcandajo ŵamlembele Gidiyoni mena 77 ga ŵandu ŵakulongolela ŵa ku Sukoti.

¹⁵ Kaneko Gidiyoni ŵajile kwa ŵandu ŵa ku Sukoti ni ŵawusisye kuti, “Ana akukumbucila kuti ŵakanile kungamucisya une? Jemanja ŵatite kuti ngamkaniŵapa yakulya asilikali ŵangu ŵiŵapesile ligongo naliji mkaninakamule Seba ni Salimuna. Myoyo, ni aŵatu!”

¹⁶ Kaneko jwalakwe ŵajigele simbo sya miŵa kutyocela ku cipululu ni ŵaputile nasyo acakulungwa ŵa ku Sukoti.

¹⁷ Jwalakwe ŵagumwile soni sanja ja ku Penuwele ni kwawulaga acalume ŵa mu msindamo.

¹⁸ Kaneko Gidiyoni ŵamwusisye Seba ni Salimuna kuti, “Musalile ya acalume ŵimwawuleje pa Taboli, ana ŵawonekaga camtuli?” Jemanjajo ŵajanjile kuti, “Ŵawonekaga mpela wawojo, jwalijose jwa jemanjajo ŵawonekaga mpela mwanace jwa mwenye.”

¹⁹ Papopo Gidiyoni ŵasalile kuti, “Jemanja jitatu ŵaliji alongo acimjangu, ŵanace ŵa mama ŵangu. Une ngulumbila kuti mkaŵe ŵangawulaga jemanja jila, ngamkaninimwulaga.”

²⁰ Kaneko ŵamsalile Yetelo, mwanagwe jwandanda kupagwa kuti, “Jimukani, mwawulajeni jemanjajo!” Nambo mcandajo nginajigala upanga wakwe. Ŵajogwepe pakuŵa ŵaliji jwamnondi.

²¹ Kaneko Seba ni Salimuna ŵatite kwa Gidiyoni, “Jimukani mwasyene mtuwulaje, naga nginimkola woga.” Ni Gidiyoni ŵawuleje jemanjajo nipo ŵajigele mbande sisyaliji pa ngosi sya ngamila* syawo.

²² Pelepo ŵandu ŵa ku Isalaeli ŵamsalile Gidiyoni kuti, “Aŵe ŵakutulamulila ŵetu wawojo ni yisukulu yawo pitaciwapo. Wawo atukulupwisye uwe m'myala mwa Amidiyani.”

²³ Gidiyoni ŵatite kwa jemanjajo, “Une ngasimba kose jwakwalamulila jemanja, atamose mwanangu. AMBUJE ni ŵitaciŵa ŵakumlamulila jemanja.”

²⁴ Nambo ŵapitilisye kuŵeceta kuti, “Une mbusye cindu cimo kwa jemanja. Jwalijose jwa jemanja ambe ndolo siŵajigele ali asumwile.” (Amidiyani, ŵawalaga ndolo sya golidi,* pakuŵa ŵaliji ŵa mtundu wa Ishimaeli).

²⁵ Ŵanduwo ŵajanjile, “Tuciŵa ŵakusengwa kusipeleka kwa wawojo.” Jemanjajo ŵatandice nguwo, ni jwalijose ŵaŵisile pelepo ndolo siŵajigele ali asumwilesyo.

²⁶ Ndolo sya golidi siŵapocele Gidiyoni usito wakwe waliji wakwana makilogalamu 20, nipo pa ngaŵalanjila mbande, yakutunga ya pa lukosi, nguwo siŵawalaga ayimwene ŵa ku Midiyani sya papo, atamose mawunyolo gakusalalisya giŵawecaga ngosi sya ngamila syawo.

²⁷ Gidiyoni ŵapanganyisye cimtembe ca golidijo ni kuciŵika mu tawuni ja kumangwakwe, mu Ofula. Aisalaeli wosope ŵamlesile Mlungu ni ŵajawulaga kweleko kukucilambila cimtembeco. Papopo caliji mpela citega kwa Gidiyoni ni liŵasa lyakwe.

²⁸ Ni Aisalaeli ŵapundile Amidiyani nipo nginaŵa soni ŵakogoya kose. Cilambo caliji pa mtendele kwa yaka makumi mcece, mpaka piŵawile Gidiyoni.

Ciwa ca Gidiyoni

²⁹ Gidiyoni ŵawujile kumangwakwe ni kutamaga kweleko.

³⁰ Jwalakwe ŵakwete ŵanace 70 ŵacalume, pakuŵa ŵakwete acakongwe ŵajinji.

³¹ Jwalakwe ŵakwete soni ŵakongwe ŵanondi ku Shekemu, ŵiŵamŵelecele mwanace jwamlume, nipo ŵampele lina lyakuti Abimeleki.

³² Gidiyoni mwanace jwa Yowashi ŵawile ali acekulwipe cenene ni ŵasicile mwilembe lya baba ŵawo Yowashi, mu Ofula msinda wa mtundu wa Abiyesa.

³³ Gidiyoni ali awile, ŵandu ŵa ku Isalaeli ŵaliji ŵangakulupicika soni kwa Mlungu ni ŵamlambile Baala.* Jemanjajo ŵamtesile Baala Beliti mlungu jwawo.

³⁴ Ŵandu ŵa ku Isalaeli nganiŵatumicila soni AMBUJE Mlungu ŵawo, ŵiŵakulupwisye jemanjajo kwa amagongo ŵawo wosope ŵakwasyungulila.

³⁵ Nginapeleka atamose ucimbicimbi ku liŵasa lya Gidiyoni pa yambone yosope yiŵatendele Aisalaeli.