Ŵakulamula 6 - Chiyawo Bible

Gidiyoni

¹ Ŵandu ŵa ku Isalaeli ŵatesile ulemwa* soni pakwalemwecesya AMBUJE.* Myoyo AMBUJE ŵakundile ŵandu ŵa ku Midiyani kuti ŵalamulile kwa yaka msano ni yiŵili.

² Amidiyani, ŵaliji ŵamacili kwapunda Aisalaeli, nipo Aisalaeli ŵajuŵaga jemanjajo mu mbanga ni m'malo gane gakuŵa m'matumbi.

³ Aisalaeli naga apandile mbeju jilijose, Amidiyani ŵayikaga ni Aamaleki ni ngosyo sya kucipululu ni kwatanda jemanjajo.

⁴ Ŵatendaga cigono pa malopo ni kusijonanga mbejusyo mpaka ku mwela ku dela jakusyungulila Gasa. Ŵakombolekaga kujigala ngondolo syosope, ng'ombe, ni acibulu ŵakwe, ni ngalecela Aisalaeli cilicose cakuti akulupucile ku sala.

⁵ Jemanjajo ŵayikaga ni yilangwa yawo ni matenti gawo, kutupa kwakwe mpela sombe. Jemanjajo ŵatupaga pamo ni ngamila* syawo mwakuti ngaŵa mkuŵalanjika. Ŵayikaga ni kucijonanga cilamboco,

⁶ nipo Aisalaeli gamalile macili kusyesyene ligongo lya Amidiyani.

⁷ Kaneko ŵandu ŵa ku Isalaeli ŵalisile kwa AMBUJE kuti ŵakamucisye pa Amidiyani,

⁸ nipo AMBUJE ŵatumicisye jemanjajo jwakulocesya* juŵajigalile awu mtengawu kutyocela kwa AMBUJE, Mlungu jwa Aisalaeli: “Une namkopwesye jemanja mu ukapolo mu Iguputo.

⁹ Une namkulupwisye m'myala mwa Aiguputo ni mwa ŵiŵamenyene ni jemanja akuno mu cele cilamboci. Une natopwesye jemanjajo pimwaŵandicilaga, nipo nampele jemanja cilambo cawo.

¹⁰ Une namsalile kuti Ndili AMBUJE Mlungu jwenu ni kuti jemanja mkasimlambila milungu ja Aamoli, ŵimkutama mcilambo mwawo sambano jino. Nambo jemanja nginimumbikanila une.”

¹¹ Kaneko gayice malayika ga AMBUJE ku musi wa Ofula ni gatemi pasi pa citela ca mtundu cicaliji ca Yowashi, jwa mtundu wa Abiyesa. Mwanagwe Gidiyoni ŵaliji mkuputa tiligu pa malo gakuminyila finyo, aku ali mkwajuŵa Amidiyani kuti akamwona.

¹² Papopo malayika ga AMBUJE gawonecele kwa jwalakwe ni gatite kuti, “AMBUJE ali ni m'mwejo, mundu jwamacili ni jwakulimba mtima!”

¹³ Gidiyoni ŵaliwusisye lilayikalyo kuti, “Naga AMBUJE ali ni uwe, ligongo cici yosopeyi yitendecekwe kwetuwe? Ana gali kwapi masengo gawo gakumasya lunda giŵatusalile acinangolo ŵetu kuti AMBUJE ŵakopwesye jemanjajo mcilambo ca Iguputo? Ana ligongo cici AMBUJE atujasile ni kutupeleka myala mwa Amidiyani?”

¹⁴ Kaneko AMBUJE ŵamlamwile jwalakwe kuti, “Jawulani ni macili genugo mkakulupusye Aisalaeli kwa Amidiyani. Une namsyene ni jungumtuma.”

¹⁵ Gidiyoni ni ŵajanjile kuti, “AMBUJE ana une mpaka nakulupusye uli Aisalaeli? Alole, liŵasa lyangu lya Manase lili lyakulepetala kupunda gane gosope, soni une ni jwa kumbesi kwa liŵasa lyetu.”

¹⁶ AMBUJE ni ŵajanjile kuti, “Mkukomboleka kuyitenda yeleyo ligongo une tinjimkamucisya. Timcapunda Amidiyani mwangasawusya mpela mkumputa mundu jumo.”

¹⁷ Gidiyoni ŵajanjile kuti, “Naga asengwile ni une, andosye cimanyisyo cakuti yisyene wawo ali AMBUJE.

¹⁸ Conde ngwaŵenda kuti akasatyoka mpaka ngajigalile mtuka wangu wa yakulya.” AMBUJE ni ŵatite, “Tilindilile mpaka mli mwusile.”

¹⁹ Myoyo Gidiyoni ŵajile m'nyumba ni ŵawuleje mwanace jwa mbusi ni kuteleka nyamajo. Kaneko ŵajigele utandi wakwana makilogalamu likumi kuti apanganyicisye mikate jangali cakusasaŵilisya. Ŵaŵisile nyamajo mlupeta ni ŵatasile msusi mu mpika ni kwika nayo kukuyipeleka kwa malayika ga AMBUJE gigaliji pasi pa citela ca mtundu.

²⁰ Malayikago gaŵecete najo kuti, “Ŵikani nyamajo ni mikatejo pa lwalalu, ni myipungulile msusi.” Gidiyoni ŵatesile myoyo.

²¹ Kaneko malayika ga AMBUJE gayikwayiye yindu yila ni songa ja simbo jiganyakwile. Nambo moto wakopwece mu lwalamo ni watinisye nyama ni mikatejo. Kaneko malayikago nganigawoneka soni.

²² Pelepo Gidiyoni ŵamanyilile kuti giŵagawenigo galiji malayika ga AMBUJE, ni ŵatite, “Likungu une, AMBUJE Mlungu! Pakuŵa sambano nagaweni malayika ga AMBUJE meso ni meso!”

²³ Nambo AMBUJE ŵatite kwa jwalakwe, “Mtendele. Mkajogopa. Ngasim'wa.”

²⁴ Papopo Gidiyoni ŵataŵile malo gakupelecela mbopesi kwa AMBUJE ni ŵagapele lina lyakuti “AMBUJE ali Mtendele.” (Malogo gali ciŵela ku Ofula, jijili tawuni ja mtundu wa Abiyesa).

²⁵ Cele ciloco AMBUJE ŵamsalile Gidiyoni kuti, “Mjigale ng'ombe jaŵili jamkambako ja atati ŵenu ni jine ja yaka msano ni yiŵili, mpasule malo ga atati ŵenu gakupelecela mbopesi kwa Baala,* mkate ni kugwisya lusici lulukwete cimanyisyo ca Ashela mlungu jwamkongwe jwali pambali pakwepo.

²⁶ Mwataŵile AMBUJE Mlungu ŵenu malo gakusalala ga mbopesi penani mnope pa litumbi piwutaŵidwe msinda wenuwu. Kaneko mjigale ng'ombe jaŵili jila ni mjitinisye josope jene mpela mbopesi, mjocele sasu sya cimanyisyo ca Ashela cimcigwisisyeco.”

²⁷ Myoyo Gidiyoni ŵajigele ŵamasengo ŵakwe likumi ni ŵatesile yiŵamtumile AMBUJE. Ŵelewo ŵalepele kuyitenda musi ligongo ŵajogopaga mnope ŵa peŵasa pakwe ni ŵandu ŵa mtawuni, ni m'malo mwakwe ŵayitesile cilo.

²⁸ Ŵandu ŵa mtawunimo piŵalaŵilile kwimuka kundaŵi, ŵagambile kusimana malo gakupelecela mbopesi kwa Baala gapasulidwe, soni cimanyisyo ca Ashela acikatile cigwile pasi, nambo soni pataŵidwepo malo gane ga mbopesi ni ng'ombe jaŵili jila ajitinicisye pelepo.

²⁹ Jemanjajo ŵawusyene jwine ni mjakwe kuti, “Ŵani ŵatesile yeleyi?” Ali awusisye cenene mwakuwungunya ŵakopocele kuti juŵatesile yeleyi ŵaliji Gidiyoni mwanace jwa Yowashi.

³⁰ Kaneko ŵamsalile Yowashi kuti, “Myice najo akuno mwanagwenu, kuti tumwulaje! Pakuŵa jwalakwe agumwile malo gakupelecela mbopesi kwa Baala soni akatile ni kucigwisya cimanyisyo ca Ashela cicaliji pambali pakwe.”

³¹ Nambo Yowashi ŵawusisye ŵandu wosope ŵiŵamjimucilewo kuti, “Ana akusosa kuwucisya ligongo lya Baala? Jwalijose jwakusosa kuwucisya ligongo lya Baala, taciwulajidwa mkanikuce. Naga Baala ali mlungu, amlece alicenjele msyene pakuŵa malo gakwe gakupelecela mbopesi gagumulidwe.”

³² Kutandila lyele lyuŵalyo Gidiyoni ŵaliji mkolanjidwa kuti Yelubaala, ligongo Yowashi ŵatite kuti, “Amlece Baala alicenjele msyene, pakuŵa amgumulile malo gakwe ga mbopesi.”

³³ Kaneko Amidiyani wosope, Aamaleki, ni mitundu jine ja kungopoko lyuŵa jasongene, ŵajombwece Lusulo lwa Yolodani, ni ŵataŵile matenti pa malo ga cigono m'Ciŵata ca Yesilele.

³⁴ Msimu wa AMBUJE ŵalamulile Gidiyoni, nipo jwalakwe ŵagombile lipenga kwaŵilanga acalume ŵa mtundu wa Abiyesa kuti amkuye.

³⁵ Jwalakwe ŵatumisye ŵamitenga ku madela gosope ga mbali syosope siŵili sya Manase kwaŵilanga kuti amkuye. Ŵatumisye ŵamitenga kwa ngosyo sya Asha, Sebuloni, ni Nafutali, nipo nombe nawo ŵayice kukupwatikana najo.

³⁶ Kaneko Gidiyoni ŵatite kwa Mlungu, “Ngumanyilila kuti wawojo aŵisile cilanga* kuti tangamulisye masengo une kuti nakulupusye Aisalaeli.

³⁷ Myoyo, une nguŵika litonji pa luŵala lutukukosolela tiligu. Patikuceje naga tipaŵe pana mangame pa litonji pepo nambo ngaŵa ni pa luŵala pakwe, ni tinjimanyilila kuti wawojo tambanganyicisyedi une masengo gakwakulupusya Aisalaeli.”

³⁸ Yeleyi ni yiyatendece. Piŵalaŵilile kwimuka kundaŵi, Gidiyoni ŵaminyile litonji lila mpaka mangame gakopwece mwakuti mesi gagumbele mu mbale.

³⁹ Kaneko Gidiyoni ŵatite kwa Mlungu, “Akasatumbila ligongo lya une, angunde soni kuti mbecete kamo. Conde angunde ndende soni mayeso gane ni litonji. Aji ndaŵiji sambano ngusosa litonjipe liŵe lyakumula, nipo luŵala lunyoŵe.”

⁴⁰ Cele ciloco Mlungu ŵatesile iyoyo. Kundaŵi kwakwe kwasimanice kuti, litonji lila lyaliji lyejumu, nambo luŵala lwaliji lwenyoŵe ni mangame.