Ŵakulamula 5 - Chiyawo Bible

Nyimbo ja Debola ni Balaki

¹ Pa lyele lisikulyo Debola ni Balaki mwanace jwa Abinowamu ŵajimbile aji nyimboji:

² Ŵalumbe AMBUJE!* Aisalaeli ŵalipelece kuputa ngondo, ŵalipelece ŵanduwo mwakusosa kwawo.

³ Apikane, jemanja ayimwene! Atejele mapikanilo jemanja ŵakulamulila! Une tinjijimba, une tinjajimbila nyimbo kwa AMBUJE, Mlungu jwa Aisalaeli.

⁴ AMBUJE, piŵatyosile wawo m'matumbi ga Seyili, piŵayice wawo kutyocela ku upande wa ku Edomu, litaka lyatenganyice, nipo kwinani kwagwile ula. Elo, mawunde gakuswile mesi.

⁵ Matumbi gatenganyice pameso pa AMBUJE ŵa ku Sinayi, pameso pa AMBUJE, Mlungu jwa Aisalaeli.

⁶ M'masiku ga Shamugali mwanace jwa Anati, m'masiku ga Yaeli, yakujigalila katundu jwa pa ulendo yalesile kupitila gele malogo, ŵa pa ulendo ŵapitilaga misewo jine.

⁷ Matawuni ga mu Isalaeli gagambile kulecedwa, galecedwe gangali cilicose mpaka pinayice une Debola, mpela mamagwe Isalaeli.

⁸ Kaneko japali ngondo mcilambomo piŵasagwile Aisalaeli milungu jasambano. Mwa acalume 40,000 mu Isalaeli, ana apali juŵanyakwile cakulicinjilicisya naco kapena lipanga?

⁹ Mtima wangu uli pa ŵakulongolela ngondo ŵa ku Isalaeli, ni asilikali ŵiŵalipelece mwa kusosa kwawo. Ŵalumbe AMBUJE!

¹⁰ Asale ya yeleyo, jemanja ŵakwenda ali akwesile pa acibulu ŵaswela, jemanja ŵakutama pa yakutamila ya ucimbicimbi, ni jemanja ŵakwenda pasi kulikose kwakwawulako.

¹¹ Mpikane! Lisegwe lya makuga gigasyungulile yisima gakusala ya kupunda kwa AMBUJE, kupunda kwa ŵandu ŵa ku Isalaeli! Kaneko ŵandu ŵa AMBUJE ŵajesile kutyocela ku misinda jawo.

¹² Mlongolele, Debola, mlongolele! Mlongolele! Mjimbe nyimbo! Mlongolele! Mjitande, Balaki mwanace jwa Abinowamu, mwalongolele acikapolo ŵenu!

¹³ Kaneko ŵandu ŵakulupilila ŵayice kukuwanganicilana ni ŵakulamulila ŵawo, ŵandu ŵa AMBUJEWO ŵayice kwa jwalakwe kukuputa ngondo.

¹⁴ Jemanjajo ŵatyocele ku Efelemu kukwinjila m'ciŵata, ŵalukuyisye lukosyo lwa Benjamini ni ŵandu ŵakwe. Ŵakulamulila ŵa asilikali ŵayice kutyocela ku Makili, acakulungwa ŵa ngondo ŵayice kutyocela ku Sebuloni, ali anyakwile simbo ja ulamusi.

¹⁵ Ŵakulongolela ŵa Isakala ŵayice ni Debola, elo, Isakala ŵayice ni Balaki jwakwe, jemanjajo ŵamkuyisye Balaki m'ciŵata. Nambo lukosyo lwa Lubeni lwagaŵikene, ŵalepele kuganicisya naga kuli kwakomboleka kwawula.

¹⁶ Ligongo cici ŵasigalile ni ngondolo? Kuti ŵapikaneje ŵakulanga yilangwa ali mkuyiŵilanga? Elo, lukosyo lwa Lubeni lwagaŵikene, ŵalepele kuganicisya naga kuli kwakomboleka kwawula.

¹⁷ Lukosyo lwa Gadi watemi kungopoko lyuŵa kwa Yolodani, nipo soni lukosyo lwa Dani, ligongo cici ŵagambile kutama ni masitima ga m'nyasa? Lukosyo lwa Asha lwatemi mungulugulu mwa nyasa, jemanjajo ŵatemi ciŵandika ni ku ciko.

¹⁸ Nambo ŵandu wa lukosyo lwa Sebuloni ni Nafutali ŵapelece umi wawo ku ciwa pakuja kukwatanda amagongo ku ngondo.

¹⁹ Ayimwene ŵayice kukumenyana, pa Tanaki mu Lusulo lwa Megido, Ayimwene ŵayice ni ŵaputile ngondo ayimwene ŵa ku Kenani ŵaputile ngondo, nambo nginajigala silifa.*

²⁰ Ndondwa syaputile ngondo kutyocela kwinani, pisyatumbulukanyaga mwakupita mwakwe kwinani syamputile Sisela.

²¹ Lusulo lwa Kishoni lwakokosile jemanjajo, lusulo lwakwenda mwamacili lwa Kishoni. Une tinjijenda, tinjipitilisya kwenda, ni macili!

²² Kaneko mahaci ga Sisela gayice gali mkusumbasumba, masegwe ga sajo syawo gapikanice.

²³ “Mwulwese msinda wa Melosi,” likuti myoyo lilayika lya AMBUJE, “Malweso, malweso pa ŵele ŵakutama kweleko. Jemanjajo nginayika kukwakamucisya AMBUJE, myice mpela asilikali kukwaputila AMBUJE ngondo.”

²⁴ Jwa upile mnope mwa acakongwe ni Yaeli, ŵamkwawo Hebele jwa mtundu wa Akeni jwa upile mnope mwa acakongwe ŵakutama m'matenti.

²⁵ Sisela ŵaŵendile mesi, nambo jwalakwe ŵampele mkaka, jwalakwe ŵamjigalile mawuta ga mkaka mu cakujigalila cakusalala.

²⁶ Jwalakwe ŵajigele cicili mu ligasa lyakwe limo, nyundo jakupanganyicisya ŵandu masengo mu ligasa lijakwelyo, ŵamkomele Sisela ni kasa cikalakasa cakwe, ŵampowele mu mtwe mwakwe.

²⁷ Sisela ŵatiningwice malungo gakwe, ŵagwile pasi ni ŵagambile gona pa sajo sya Yaeli. Pa sajo sya Yaeli, pa malungo gakwe ni ŵagwile, ŵagwile pasi ali awile.

²⁸ Mama ŵawo ŵa Sisela ŵalingulile pasa pa cimbeleta, ŵam'weni kupitila pa likatani lya yitela. Ŵawusisye mamawo kuti, “Ligongo cici ligeleta lyakwe likokweŵe kwika? Ligongo cici mahaci gakwe gakukokoŵa kuwuja?”

²⁹ Acakongwe ŵakwe ŵalunda lwakupunda ŵajanjile, nipo mamawo ŵalijanjile jika,

³⁰ “Jemanjaji akwamba kusosa yindu kuti asumule ni kugaŵana, jwamkongwe jumo kapena ŵaŵili kwa msilikali jwalijose, nguwo ja penani ja Sisela, nguwo syapenani syetotetote mumbali ni yilesi, ya pa lukosi pangu mpela mwenye jwamkongwe.”

³¹ Aa! AMBUJE, amagongo ŵawo wosope awe camti myoyo, nambo acimjawo aŵale mpela lyuŵa lyakopoka kwene! Nipo wapali mtendele pa cilambopo kwa yaka 40.