Ŵakulamula 3 - Chiyawo Bible

Mitundu jakusigala mcilambo

¹ Kaneko, AMBUJE* ŵajilesile mitundu jine mcilambomo kuti ŵalinjeje Aisalaeli ŵimkanajimanyilila ngondo jilijose ku Kenani.

² Jwalakwe ŵatesile yeleyi ngaŵa ligongo line nambo kuti awujiganye mpago uliwose wa Aisalaeli ya ngondo, maka ŵele ŵiŵaliji mkanajawuleje ku ngondo kalakose.

³ Jijalecedwe mcilambomo jaliji misinda msano ja Afilisiti, Akenani wosope, Asidoni, ni Ahifi ŵiŵatamaga m'matumbi ga Lebanoni kutyocela Kwitumbi lya Baala Helimoni mpaka pakwinjilila kuja ku Mpata wa Hamati.

⁴ Jemanjaji ŵaliji cakwalinjila Aisalaeli, kuti yiwonece naga Aisalaeli mpaka agapikanile malamusi giŵagapelece AMBUJE kwa acinangolo ŵawo kupitila mwa Mose.*

⁵ Myoyo ŵandu ŵa ku Isalaeli ŵatemi pasikati pa Akenani, Ahiti, Aamoli, Apelesi, Ahifi, ni Ayebusi.

⁶ Jemanjajo ŵatesile najo ulombela mitundujo ni kujilambilaga milungu jawo.

Otiniyele

⁷ Ŵandu ŵa ku Isalaeli ŵaliŵalile AMBUJE Mlungu jwawo, ŵatesile ulemwa* kwa jwalakwe nipo ŵayilambile yimitembe ya Baala* ni Ashela.

⁸ Myoyo AMBUJE ŵatumbilile Aisalaeli nipo ŵamkundile Mwenye Kushani Lishataimu jwa ku Mesopotamiya kwapunda jemanjajo, nipo ŵalamulile jemanjajo kwa yaka msano ni yitatu.

⁹ Kaneko Aisalaeli ŵalilile kwa AMBUJE, nipo ŵatumicisye mundu juŵakulupwisye jemanjajo. Jwalakwejo jwaliji Otiniyele mwanace jwa Kenasi mpwakwe jwa Kalebu.

¹⁰ Msimu wa AMBUJE ŵayice pa jwalakwe, nipo ŵaŵele jwakulongolela jwa Aisalaeli. Otiniyele ŵajile ku ngondo, nipo AMBUJE ŵampundisye pakumpunda mwenye jwa ku Mesopotamiya.

¹¹ Mcilambomo mwaliji mwana mtendele kwa yaka makumi mcece, nipo Otiniyele ŵawile.

Ehudi

¹² Ŵandu ŵa ku Isalaeli ŵatesile soni ulemwa kwa AMBUJE. Pa lyele ligongoli AMBUJE ŵampele macili Mwenye Egiloni jwa ku Mowabu kwapunda Aisalaeli.

¹³ Egiloni ŵalipwatice kwa Aamoni ni Aamaleki, nipo ŵapundile Aisalaeli ni kwasumula Yeliko, msinda wa yitela ya migwalangwa.

¹⁴ Aisalaeli ŵamtumicile Egiloni mwenye jwa ku Mowabu kwa yaka 18.

¹⁵ Kaneko Aisalaeli ŵalisile kwa AMBUJE, nipo ŵatumicisye mundu kuti ŵagopole jemanjajo. Jweleju ŵaliji Ehudi, mundu jwakukamulicisya masengo mkono wamciji, juŵaliji mwanace jwa Gela, kutyocela ku lukosyo lwa Benjamini. Ŵandu ŵa ku Isalaeli ŵamtumisye Ehudi kwa mwenye Egiloni jwa ku Mowabu ni mituka ja mwenyejo.

¹⁶ Ehudi ŵaliji ali apanganyisye upanga wakutema kosekose wa ulewu ŵakwana mpelaga masentimita 50. Nipo ŵawutaŵilile mbali ja mkono ŵakwe wamlyo mkati mwa yakuwala yakwe.

¹⁷ Kaneko ŵajigele mituka jila kuja najo kwa Egiloni, juŵaliji mundu jwakwimbala mnope.

¹⁸ Ehudi piŵapelece mitukajo, ŵasalile ŵandu ŵiŵajigele mitukawo kuti awujileje kumusi.

¹⁹ Nambo Ehudi msyenejo ŵawujile pa maganga gesepe yimtembe ciŵandika ni Giligala, kwawula soni kwa Egiloni, ni ŵatite, “Ŵakucimbicika, une ngwete mtenga wa wawo wa mtemela.” Myoyo mwenyewo ŵalamwile ŵamasengo ŵawo kuti, “Atyoce tusigale uwepe!” Nipo wosope ŵakopwece.

²⁰ Kaneko, mwenye piŵatemi jika mcipinda cawo cakupita mbepo ca penani, Ehudi ŵamjawulile ni kumsalila kuti, “Une njigele utenga wenu wakutyocela kwa Mlungu.” Mwenyejo ŵajimi.

²¹ Ehudi ŵajigele upanga ku mkono wakwe wamlyo ni mkono wakwe wa mciji ni kuwutwinyicisya pa lutumbo lwa Egiloni.

²² Upanga wosope wajinjile mkati ni cikumbu cakwe cosope, nipo mawuta gagumbilile upangawo. Ehudi nginawukoposya upangawo mcitumbomo, pakuti wakopocele kunyuma, ni kanilila pasikati pa ngongolo syakwe.

²³ Kaneko Ehudi ŵakopwece pasa, ŵawugele matanga, kumwugalila Egiloni m'momo.

²⁴ Piŵatyosile, ŵamasengo ŵayice ni kusimana kuti matanga galiji gewugale ni makiyi, nipo ŵaganisyaga kuti mwenye ŵaliji mkulikamucisya mkatimo.

²⁵ Jemanjajo ŵajembecele mpaka ŵapesile, nipo piŵaliji jwangawugulape litanga, jemanjajo ŵajigele kiyi ni kuwugula. Piŵajinjile mwelemo ŵamsimene mbuje gwawo, ali agonile pasi jwam'we.

²⁶ Ehudi ŵatisile, jemanjajo piŵaliji mkwembeceya. Jwalakwe ŵapite kupeleta maganga gegobedwe mitembe gala ni kutilila ku Seyila.

²⁷ Piŵayice kucilambo ca kwitumbi ca Efelemu, jwalakwe ŵagombile lipenga kwaŵilanga acalume ŵa ku Isalaeli kuti ajawule ku ngondo, kaneko ŵatulwice nawo matumbi ali mkwalongolela.

²⁸ Jwalakwe ŵasalile kuti, “Anguye une! AMBUJE ampundisye jemanja kwa amagongo ŵenu, Amowabu.” Myoyo ŵamkuyisye Ehudi acitulukaga kuja kukusumula malo gakajombwece Amowabu pa Lusulo lwa Yolodani, jemanjajo nginakunda mundu jwalijose kuti ajomboce.

²⁹ Lyele lyuŵalyo ŵawuleje asilikali ŵamacili mnope ŵa ku Mowabu ciŵandika 10,000, pangali jumo juŵatisile.

³⁰ Lyele lyuŵalyo Aisalaeli ŵapundile Amowabu, nipo wapali mtendele mcilambomo kwa yaka 80.

Shamugali

³¹ Jwakulongolela jwakuyicisya ŵaliji Shamugali mwanace jwa Anati. Nombe najo ŵamkulupwisye Aisalaeli, nipo ŵayitesile yeleyi pakwawulaga Afilisiti 600 ni simbo jakuputila ng'ombe jakusongoka.