Ŵakulamula 2 - Chiyawo Bible

Lilayika lya AMBUJE ku Bokimu

¹ Lilayika lya AMBUJE* lyatyocele ku Giligala kwawula ku Bokimu ni lyasalile Aisalaeli kuti, “Une namkopwesye jemanja mu Iguputo ni kumŵika mcilambo cinalangene ni acinangolo ŵenu. Une natite kuti, ‘Ngisingasa kose cilanga* cangu ni jemanja.

² Jemanja ngamkuŵajilwa kose kutenda cilanga ni ŵandu ŵakutama mu cele cilamboci. Mkuŵajilwa kupasula malo gawo gakupelecela mbopesi.’ Nambo jemanja nganimtenda yinamsalileyo. Mtesile yakusisyana ni yeleyo!

³ Ni ngumsalila kuti une ngisinatoposya ŵanduŵa jemanja pitimŵandicileje. Jemanjajo taciŵa amagongo ŵenu, nipo milungu jawo jakujilambila tijiciŵa mpela lwawu lwenu.”

⁴ Pilyaŵecete yeleyi lilayikalyo, ŵandu wosope ŵa ku Isalaeli ŵatandite kulila,

⁵ ni ligongo lyakwe malogo gakolanjidwa Bokimu. Pelepo ŵapelece mbopesi kwa AMBUJE.

Ciwa ca Yoswa

⁶ Yoswa piŵapwilinganyisye ŵandu ŵa ku Isalaeli, jwalijose ŵajile kukujigala cilambo cakwe.

⁷ Nipo ŵandu ŵa ku Isalaeli ŵatumicile AMBUJE masiku gosope giŵaliji Yoswa cijumi, nipo panyuma pa ciwa cakwe ŵapitilisye kutenda myoyo masiku gosope giŵaliji cijumi ŵakulongolela ŵiŵayiweni yindu yayikulungwa yiŵatendele AMBUJE ŵandu ŵa ku Isalaeli.

⁸ Yoswa mwanace jwa Nuni, jwakutumicila jwa AMBUJE ŵawile ali ni yaka 110.

⁹ Jwalakwe ŵamsicile mbali jine ja cilambo cakwe ku Timunati Sela mcilambo ca kwitumbi ca Efelemu kumpoto kwa Litumbi lya Gaashi.

¹⁰ Mpago wosopewo ŵawile soni, nipo mpago wakuyicisya wakwe ŵaliŵalile AMBUJE ni yiŵatendele jwalakwejo Aisalaeli.

Aisalaeli akuleka kwalambila AMBUJE

¹¹ Sambano ŵandu ŵa ku Isalaeli ŵatesile ulemwa* kwa AMBUJE ni kutanda kwatumicila Baala.

¹² Jemanjajo ŵalesile kwalambila AMBUJE, Mlungu jwa acinangolo ŵawo, Mlungu juŵakopwesye mcilambo ca Iguputo, nipo ŵatandite kujilambila milungu jine, milungu ja ŵandu ŵiŵasyungulile jemanjajo. Ŵajijinamile jelejo nipo ŵatumbilisye AMBUJE.

¹³ Jemanjajo ŵalesile kwalambila AMBUJE ni kutanda kwatumicila Baala* ni Ashitoleti.

¹⁴ Ni myoyo AMBUJE ŵapilile mtima Aisalaeli nipo ŵakundile kuti ŵaciswamba ŵatande nipo ŵajiŵile yindu yawo. Ŵakundile amagongo ŵiŵasyungulile mosope mwene ni ŵapundile jemanjajo, nipo Aisalaeli ngamkanapakombola soni kulicinjilicisya acimsyenepe.

¹⁵ Ndaŵi jilijose jiŵajile ku ngondo, AMBUJE ŵakundile amagongo kwapunda Aisalaeli, mpela ŵaliji muŵalumbile kala kuti tacaleka. Jemanjajo ŵalasile mnope.

¹⁶ Kaneko AMBUJE ŵapele Aisalaeli ŵakulongolela ŵiŵakulupwisye jemanjajo kwa amagongo ŵaciswamba ŵala.

¹⁷ Nambo Aisalaeli nginiŵapikanila ŵakulongolela ŵawowo. Aisalaeli nganakulupicika kwa AMBUJE nipo ŵajilambile milungu jine. Acatati ŵawo ŵagapikanile Malamusi ga AMBUJE, nambo awu mpago wasambanowu walesile kutenda myoyo mwacitema.

¹⁸ Ndaŵi jilijose jamti AMBUJE ŵapele Aisalaeli jwakulongolela, AMBUJE ŵamkamucisyaga jwakulongolelajo ni kwakulupusya ŵandu kwa amagongo ŵawo mu ndaŵi josope jiŵaliji umi jwakulongolelajo. AMBUJE ŵatendelaga canasa jemanjajo ligongo ŵawuwulaga mkulaga ni mkusawusidwa kwawo.

¹⁹ Nambo naga jwakulongolela jula awile, ŵawujilaga ku matala gawo gakala ni kutendaga yindu yakusakala mnope kupunda ya acatati ŵawo. Ŵalambilaga milungu jine, ni kukana kuleka matala gawo gakusakala.

²⁰ Kaneko AMBUJE ŵapyaga mtima ni Aisalaeli ni kuŵeceta kuti, “Awu mtunduwu ukasile cilanga cinalamwile acinangolo ŵawo kuti acisunje. Pakuŵapo nginambikanila une,

²¹ tinjileka ngawutoposya uliwose wa mitundu jijaliji ciŵela mcilambomo piŵawaga Yoswa.

²² Tinjijikamulisya masengo mitundujo pakwalinga Aisalaeli kuti ndole naga tacikuya matala gangu kapena iyayi, mpela muŵatendele acinangolo ŵawo.”

²³ Myoyo AMBUJE ŵajikundile jele mitundujo kuti jisigale mcilambomo, nginampundisya Yoswa kuti ajipunde, soni nginajitoposya citema panyuma pa ciwa ca Yoswa.