Ŵakulamula 19 - Chiyawo Bible

Mundu jwine jwa ci Lefi ni ŵamkwakwe ŵanondi

¹ Mu gele masikugo Aisalaeli mkinakole mwenye, ŵapali mundu jwine jwa ci Lefi juŵatamaga kusyeto kwa litumbi ku cilambo ca Efelemu. Jwalakwe ŵalombele jwamkongwe jwamnondi jwa ku Betelehemu jwa Ciyuda.

² Jwamkongwe jula nginakulupicika kwa ŵamkwakwe, ni ŵawujile kwawula kumangwakwe ku Betelehemu kuŵajile kutama kwa miesi mcece.

³ Kaneko mundujo ŵaganisisye yakwawula kuti akamkanganicisye jwamkongwejo kuti awujile kwa jwalakwe. Ŵamjigele jwamasengo jwakwe ni acibulu ŵaŵili. Jwamkongwejo ŵayice najo ku nyumba ja babagwe, nipo babagwewo piŵam'weni, ŵampocele ni magasa gaŵili.

⁴ Babawo ŵalimbicile kuti jwalakwe atame, ni ŵatemi kwa masiku gatatu. Jwalakwe ni baba ŵa msonogwejo ŵalyaga ni gonaga kukoko.

⁵ Kundaŵi kwa lyuŵa lya mcece ŵalaŵilile kwimuka ni kulilinganya kuti ajawuleje. Nambo babagwe jwamkongwejo ŵatite kwa mundu jwine jwa ci Lefijo, “Atande kulya kaje. Pitapate macilipo ni ajawuleje cenene.”

⁶ Ni ŵandu ŵaŵiliwo ŵatemi ni kulya yalumo. Kaneko babagwe jwamkongwejo ŵamsalile jwalakwe kuti, “Conde agone kunokuno ni kuti aŵe ŵakusangalala.”

⁷ Mundu jwine jwa ci Lefi jula ŵanyakwice kuti ajawuleje, nambo akwegwe ŵakwe ŵalumewo ŵamsalile kuti atame, ni jwalakwe ŵagonile soni kukoko.

⁸ Kumasikusiku kwa lyuŵa lya msano jwalakwe ŵawutandite kuti ajawuleje, nambo babagwe jwamkongwejo ŵatite, “Conde alye kaje. Ajembecele tanyakuce ca kwiguloku.” Nipo ŵandu ŵaŵili ŵala ŵalile yalumo.

⁹ Mundu jwine jwa ci Lefi pamo ni ŵamkwakwe ŵanondiwo, ni jwamasengo ŵatandite kunyakuka soni kuti ajawuleje, nambo babagwe ŵakongwewo ŵatite kuti, “Alole, kusa kusigele panandi kuswa sambano, agone soni. Pangakaŵapa tikuŵe kuli kuswele. Atame asangalaleje. Malaŵi tacikomboleka kulaŵilila ni kuwutanda ulendo wa kumusi.”

^10-11 Nambo mundu jula nginasaka kuti agone soni papopo, nipo jwalakwe ni ŵamkwakwe ŵala ŵanyakwice ulendo, pamo ni jwamasengo jwawo ni acibulu ŵaŵili ŵataŵilile yakutamila. Kwaliji kuli kutandite kuswa piŵayikaga ku Yebusi (pipakukolanjidwa Yelusalemu sambano), nipo jwamasengo jula ŵatite kwa ambujegwe kuti, “Ana tukulecela cici kwima ni kugona mu msinda wa Ayebusi uno?”

^12-13 Nambo ambujegwewo ŵajanjile kuti, “Uwe ngaŵa mkwima mu msinda wa ŵandu ŵimkinaŵa Aisalaeli. Tutupelenganye msogolo panandi ni kuja kugona ku Gibeya kapena ku Lama.”

¹⁴ Ni ŵajesile kupunda ku Yebusi ni kupitilisya ulendo wawo. Pilyakapilaga lyuŵa ni piŵayikaga ku Gibeya upande wa ŵandu ŵa lukosyo lwa Benjamini.

¹⁵ Jemanjajo ŵasepwice mu msewu mula kuti ajawule akagone kweleko. Ŵajinjile mu msindamo ni kwamba kuja kutama pa luŵala mkati mwa cipata ca msinda, nambo pangali juŵalipelece kwajigala ŵanduwo kuti akagone kumangwawo.

¹⁶ Ali ciŵela kweleko, jwamlume jwine jwamcekulupe ŵayice ali aŵelwice ku migunda ligulo. Kumangwakwe kuŵatyocele kwaliji ku cilambo ca kwitumbi ca Efelemu, nambo sambano ŵatamaga ku Gibeya. (Ŵandu ŵane kweleko ŵatyocele ku lukosyo lwa Benjamini).

¹⁷ Jwamlume jwamcekulupe jula ŵamanyilile kuti mlendojo ŵagambaga gonela ulendo wakwe basi. Ni ŵamwusisye mundu jwine jwa ci Lefijo kuti, “Ana akutyocela kwapi? Nambi akwawula kwapi?”

¹⁸ Mlefi ŵajanjile, “Uwe twaliji ku Betelehemu ku Yuda, ni sambano tukwawula kumusi kusyeto litumbi ku cilambo ca Efelemu. Pangali jwakutujigala kuti tukagone,

¹⁹ pakuŵa tujigele yakulya ya acibulu ŵetu nambo soni mkate ni finyo yangune, ŵamkwangu ŵanondi, ni jwamasengo jwangu. Tukwete yosope yene.”

²⁰ Jwamlume jwamcekulupe jula ŵatite kuti, “Une ngwapocela jemanja kumangwetu kuno! Tinjasamalila, pangali ligongo lyakuti agone pa luŵala pano.”

²¹ Jwalakwe ŵajigele ŵanduwo kwawula nawo kumangwakwe ni kuja kwalisya acibulu ŵala. Acalendo ŵakwewo ŵapele mesi gakucapila sajo syawo nipo ŵapele yakulya.

²² Jemanjajo ŵaliji mkusangalala nambo mwakusisimucisya ŵandu ŵangalumbana ŵakutyocela mu msindamo ŵajisyungulile nyumbajo ni kutanda kuputa petanga. Ŵamsalilaga jwamlume jwamcekulepe jula kuti, “Amkoposye mundu jwayice najojo! Tukusosa kutenda najo cikululu!”

²³ Nambo jwamlume jwamcekulepe jula ŵakopwece pasa ni ŵasalile jemanjajo kuti, “Iyayi acimjangu! Conde! Akatenda cindu cakusakala mnope mpela celeci! Aju munduju ali mlendo jwangu.

²⁴ Alole, ngumpa jwamkongwe jwangu jwamnondiju ni mwanangu jusyesyene jwamkongwe, jwali mwali jumkinasimangane ni jwamlume jwalijose. Tinakoposye sambano jino, atende nawo yakusosayo. Nambo akatenda cindu cakuloŵelaci kwa aju munduju!”

²⁵ Nambo ŵandu ŵala nginampikanila kose. Nipo mlendo jula ŵapelece pasa ŵamkwakwe ŵala kwa jemanjajo. Ŵatesile najo cikululu ni kutenda najo yakusakala cilo cosope cene ngamleka mpaka kwacele.

²⁶ Pikwacele jwamkongwe jula ŵayice ni kugwila pa mlango pa nyumba ja mundu jwamcekulepejo, muŵaliji msonogwe jula. Jwamkongwejo ŵakomwece mpaka lyuŵa pilyakopwece.

²⁷ Mlefijo piŵajimwice kundaŵi, ni kuwugula litanga kuti ajawuleje, ŵasimene ŵamkwakwewo ali agonile ku meso kwa nyumbajo magasa gawo gali pa mlango pa litangalyo.

²⁸ Jwalakwe ŵatite, “Ajimuce. Kwende tujawuleje.” Nambo nginajanga. Ni ŵanyakwile cilu cakwe kucipinjikanya pa bulu ulendo kumangwakwe.

²⁹ Piŵayice, ŵajinjile m'nyumba ni kujigala cipula. Ŵajigele cilu ca msonogweco ni kucikata m'yipiciti likumi ni yiŵili, ni ŵatumisye cipiciti cimo kwa lukosyo lulilose lwa ku Isalaeli.

³⁰ Jwalijose juŵayiweni yeleyi ŵatite kuti, “Citandilile nganitupikane cindu ca mtundu welewu! Cikopocele Aisalaeli mu Iguputo nganicitendekweje cindu ca mtundu welewu! Pakusosekwa tutendepo kandu pa cele cinduci! Ana ticiŵe camtuli?”