Ŵakulamula 18 - Chiyawo Bible

Mika ni lukosyo lwa Dani

¹ Mu Isalaeli mwaliji mwangali mwenye pa jele ndaŵijo. Mtundu wa Dani waliji mkulolesya dela jakuti jiŵe jawo kuti atameje mu gele masikugo ligongo ŵaliji mkinapocele cilambo cawo cawope mwa mitundu ja Aisalaeli.

² Ni ŵandu ŵa Dani ŵasagwile acalume ŵa ngondo msano mwa maŵasa gosope ga mtunduwo ni ŵatumisye kutyocela ku misinda ja Sola ni Eshitawoli ali ŵapele malamusi kukulolesya cilambo. Piŵayice ku cilambo ca kwitumbi ca Efelemu, acalumewo ŵatemi ku nyumba ja Mika.

³ Ali ciŵela kweleko, jemanjajo ŵagamanyilile maloŵe ga mundu jwine jwa Cilefi jwamnondi jula, ni ŵamjawulile kukumwusya kuti, “Ana akutenda cici akuno? Ŵani ŵiŵayicisye wawojo akuno?”

⁴ Jwalakwe ŵajanjile kuti, “Une nalangene ni Mika, ŵakusandipilaga kuti mbanganyeje masengo mpela ŵakutaga mbopesi ŵawo.”

⁵ Jemanjajo ŵamsalile kuti, “Conde atuwucisye kwa Mlungu naga ulendo wetu citujende cenene?”

⁶ Jwakutaga mbopesijo ŵajanjile kuti, “Akasadandawula cilicose. AMBUJE* akwalongolela pa wele ulendowu.”

⁷ Ni ŵandu msano ŵala ŵanyakwice ulendo ku msinda wa Laishi. Kweleko ŵayiweni muŵatamilaga ŵandu mwangaŵa mkwatanda, mpela Asidoni. Jemanjajo ŵaliji ŵandu ŵa mtendele, ŵakufasa, ŵangasosa yakangana ni jwine, ŵakwete yosope yiŵayisosaga. Jemanjajo ŵatamaga mwakutalikangana ni Asidoni soni nginiŵawusya ŵandu ŵaliwose kuti ŵacinjilicisye.

⁸ Ŵandu msano ŵala piŵawujile ku Sola ni Eshitawoli, acalongo acimjawo ŵawusisye yiŵajile kuyisimana.

⁹ Jemanjajo ŵajanjile kuti, “Ajimuce, kwende tukawutande msinda wa Laishi. Uwe twaciweni cilamboco, nipo cakusalala. Akagamba kutama kusoŵa cakutenda, ajanguye! Kwende tukajinjile ni kuja kucisumula cilamboco!

¹⁰ Pitakayice kweleko, takasimane kuti ŵanduwo ngakusamala kandu. Cilamboco cili cacikulungwa, cikwete yosope yene yakusayisosaga mundu, ni Mlungu acipelece kwa jemanja.”

¹¹ Ni ŵa ngondo 600 ŵa lukosyo lwa Dani ŵapite ku ngondo kutyocela ku Sola ni Eshitawoli.

¹² Jemanjajo ŵakwesile kuja kutaŵa matenti ga cigono kungopoko lyuŵa kwa Kiliyati Yelimu ku Yuda. Ni ligongo lyakwe malogo gakolanjidwa kuti Cigono ca Dani mpaka sambano jino.

¹³ Jemanjajo ŵapitilisye kutyocela pelepo ni kuja kwika ku nyumba ja Mika mcilambo ca kwitumbi ca Efelemu.

¹⁴ Kaneko ŵandu msano ŵiŵajile kukucisonda cilambo kusyungulila Laishi ŵala ŵasalile acimjawo kuti, “Ana akumanyilila kuti akuno jimo mwa gele majumbaga mwana cimtembe cacitela cepace silifa?* Kwana soni mitembe jine ni mkanjo ŵa jwakutaga mbopesi. Ana akuganisya kuti uwe tutende cici?”

¹⁵ Ni ŵajile m'nyumba ja Mika, kuŵatamaga mundu jwine jwa ci Lefi jwamnondi jula, ni ŵamkomasisye ni kumwusya muŵaŵelele.

¹⁶ Pa jele ndaŵiji, asilikali 600 ŵa lukosyo lwa Dani ŵaliji ali ajimi pa cipata, ŵa cile kuputa ngondo.

¹⁷ Ŵakusonda msano ŵala ŵayicile kwinjila m'nyumba ni kucijigala cimtembe cacitela cepace silifa cila, mitembe jine, ni mkanjo wa ŵakutaga mbopesi, nipo jwakutaga mbopesi jula ŵatemi ku cipata ni ŵa ngondo 600 ŵala.

¹⁸ Acalumewo piŵajinjile m'nyumba mwa Mika ni kujigala yindu ya mitembeyo ni mkanjo wa jwakutaga mbopesi jula ŵawusisye kuti, “Ana akutenda cici?”

¹⁹ Jemanjajo ŵatite, “Mkaŵeceta cilicose, mjile jii. Mtukuye kuti uwe ŵakutaga mbopesi ŵetu ni ŵakutupanga lunda. Pambone ni papi pasikati pa kuŵa jwakutaga mbopesi jwa mtundu wosope wa Aisalaeli ni kuti uwe jwa liŵasa lya mundu jumo?”

²⁰ Ayi yamsangalesye jwakutaga mbopesijo kwejinji, ni ŵajigele yindu ya mitembe ni mkanjo ula ni kulonganaga nawo.

²¹ Jemanjajo ŵagalawice ni kwawulaga pamo ni ŵanace ŵawo, yilangwa yawo, ni katundu jwawo ulendo msogolo.

²² Ŵaliji ali ajesile mkuli welewu kutyocela ku nyumbako kaneko Mika ni piŵaŵilangaga ŵacinasi ŵakwe kuti akamenyane nawo mpaka ŵakuyisye ni kuja kwaŵandicila ŵandu ŵa ku Dani.

²³ Jemanjajo ŵaŵilasile ŵandu ŵa Dani mwakwesya maloŵe. Ŵandu ŵa Dani ŵagalawice ni kumwusya Mika kuti, “Cisawisye cici? Mwajigalile cici ŵa ngondo wosopeŵa?”

²⁴ Mika ŵajanjile kuti, “Ni kuti cici, ‘Cisawisye cici?’ Uli jemanja kunjigalila jwakutaga mbopesi jwangu, ni milungu jakupanganya jika, ni kutyoka! Une cingwete cici candecele?”

²⁵ Ŵandu ŵa Dani ŵatite kuti, “Wawo akatesile cenene ngaŵeceta cilicose nambo naga akusosa kuti ŵanduŵa atumbile pakwatanda ni asale. Ni amanyilile kuti wawo ni liŵasa lyawo lyosope tawe.”

²⁶ Kaneko ŵapitilisye ulendo. Mika ali ayiweni kuti ŵanduwo ŵaliji ŵamacili kumpunda jwalakwe, ŵagambile kugalawuka ni kwawulaga kumusi.

^27-28 Ŵandu ŵa Dani ali amjigele jwakutaga mbopesi ni yindu yiŵapanganyisye Mika, ŵajile kukuwutanda msinda wa Laishi, wa ŵandu ŵa mtendele ni ŵakufasa wula, uwaliji m'ciŵata cicoco mpela msinda wa Beti Lehobu. Ŵawuleje ŵandu ŵiŵatamaga mwelemo ni kuwujoca. Paliji pangali jwalijose jwakuti ŵakulupusye jemanjajo, ligongo msinda wa Laishi watalikangene ni wa Sidoni, soni nganalangana ni ŵandu ŵane kuti tiŵacinjilicisye. Ŵandu wa ku Dani ŵawutaŵile soni msindawo ni kutamaga mwelemo.

²⁹ Jemanjajo ŵacenjile lina lya Laishi kuŵa Dani, lilyaliji lya nangolo jwawo Dani, mwanace jwa Yakobo.*

³⁰ Ŵandu ŵa Dani ŵajimice cimtembe kuti acilambileje, nipo Yonatani, mwanace jwa Geleshomu ni cisukulu ca Mose,* ŵatumicile mpela jwakutaga mbopesi jwa lukosyo lwa Dani, nipo yisukulu yakwe yatumicile mpela ŵakutaga mbopesi ŵawo mpaka piŵakamwile Aisalaeli kwawula nawo ku ukayidi.

³¹ Cimtembe ca Mika casigele ku Shilo kukoko pakutipo Tenti muŵamlambililaga Mlungu jaliji kukoko.