Ŵakulamula 14 - Chiyawo Bible

Samusoni ni jwamkongwe jwa ku Timuna

¹ Lisiku line Samusoni ŵajile ku Timuna, kweleko ŵam'weni jwamkongwe jwa mtundu wa Afilisiti.

² Jwalakwe ŵawujile kumangwakwe kukwasalila babagwe ni mamagwe kuti, “Ku Timuna kwana jwamkongwe jwa mtundu wa Afilisiti junimnonyele. Akanjigalile jwelejo kuti aŵe msonogwangu.”

³ Nambo babagwe ni mamagwe ŵamwusisye kuti, “Ligongo cici mkusosa kulombela jwamkongwe jwa mtundu jwangawumbala jwa Afilisiti? Ana yangakomboleka kuti mjigale jwamkongwe jwa mu mtundu wetu, atamose pasikati pa ŵandu ŵetu wosope ŵa Aisalaeli?” Nambo Samusoni ŵajanjile babagwe kuti, “Jwalakwejo ni jungusosa kuti akanjigalile, pakuŵa ni jungumnonyela une.”

⁴ Acinangolo ŵakwe nginamanyilila kuti AMBUJE* ni ŵiŵamlongolelaga Samusoni kuti atende yeleyi, pakuŵa AMBUJE ŵasosaga ligongo lyakwaputila Afilisiti. Afilisiti ni ŵiŵalamulilaga Aisalaeli jele ndaŵiji.

⁵ Ni Samusoni ŵajile ku Timuna yalumo ni babagwe ni mamagwe. Piŵajawulaga kweleko kupitila m'migunda ja mipeleya, lisimba lya mwana lyabangwile mwa ukali.

⁶ Mwakusisimucisya msimu wa AMBUJE wamlongolele Samusoni, nipo ŵalikacwile lisimbalyo ni magasa gakwe mpela akukacula mwanace jwa mbusi. Nambo nginiŵasalila acinangolo ŵakwe yiŵayitesileyo.

⁷ Kaneko jwalakwe ŵajawile ni kuŵeceta najo jwamkongwe jula, nipo ŵamnonyele.

⁸ Pigapite masiku panandi, Samusoni ŵawujile ku Timuna kukwinjila liŵasa. Ali ayice pa malo piŵawuleje lisimba pala ŵasepwice kukulilola, nipo ŵasimonjile piŵasisimene nyuci sili siŵisile uci mkati mwa lisimba lyewelyo.

⁹ Jwalakwe ŵajigele uciwo ni kulyaga ali mkwenda. Kaneko ŵajile kwa babagwe ni mamagwe ni ŵagaŵile. Jemanjajo ŵalile uciwo, nambo Samusoni nginiŵasalila kuti ŵajigele uciwo mkati mwa lisimba lyewe.

¹⁰ Babagwe ŵajile kumangwakwe kwa jwamkongwe jula, ni Samusoni ŵapanganyisye cindimba kweleko. Acacanda ŵasyoŵelele kutenda myoyo.

¹¹ Piŵam'weni Afilisiti, ŵatumisye acacanda makumi gatatu kuti akaŵe najo.

^12-13 Samusoni ŵasalile jemanjajo kuti, “Une ngusosa nawusye jemanja citagu.* Naga apakombole kwanga, tinjimpa jwalijose jwa jemanja malaja ga nguwo ja bafuta ni yakuwala ya maluŵa mkanicimale cindimba ca ulombelaci mu gele masiku msano ni gaŵiliga.” Nambo naga akulepela ni jemanja tacimba une malaja makumi gatatu ga nguwo ja bafuta ni yakuwala makumi gatatu ya maluŵa. Jemanjajo ŵatite kuti, “Atusalile citagu cawoco, tukusaka tucipikane.”

¹⁴ Ni Samusoni ŵatite kuti, “Mu cakulya cijakwe mwakopwece cakulya, Mwa msyene macili mwakopwece cakulyolyopela.” Mpaka gapite masiku gatatu ali mkulepela kwanga citaguco.

¹⁵ Lisiku lya mcece ŵaŵecete ni jwamkongwe jwa Samusoni kuti, “Mwanyenjelele ŵamkwenu kuti mtusalile gopolela kwakwe. Naga ngamkutenda, uwe tutujoce nyumba ja baba ŵenu pamo ni m'mwe ŵakwe mli m'momo. Ana jemanja ŵana ŵaŵili mwatuŵilasile kuti mtujiŵile yindu yetu?”

¹⁶ Ni msonogwe jwa Samusoni ŵamjawulile ali mkulila ni ŵatite kuti, “M'mwejo ngamkunonyela une kose! Nambo mkuŵenga une! M'mwejo mwawusisye acimjangu citagu une ni ngasalila gopolela kwakwe!” Jwalakwe ŵamjanjile kuti, “Mlole, atamose baba ni mama ngininasalila kose. Ni tinimsalile m'mwejo ligongo cici?”

¹⁷ Jwamkongwejo ŵalisile kwa masiku gosope msano ni gaŵili ga cindimbaco. Nambo pilyakwanile lisiku lya msano ni gaŵili ŵamsalile gopolela kwa citaguco pakuŵa ŵamkanganicisye mnope. Kaneko ŵasalile Afilisitiwo.

¹⁸ Ni lisiku lya msano ni gaŵili Samusoni mkanagone, ŵandu ŵa mu msindamo ŵatite kwa jwalakwe, “Cici soni cine cakulyolyopela kupunda uci? Cici campaka ciŵe camacili kupunda lisimba?” Samusoni ŵajanjile kuti, “Akaŵe kuti nganiŵasalila ŵakongwe ŵingusosa kuti lombeleŵa, ngakanacigopolela citagu cangu mpaka sambano jino.”

¹⁹ Mwakusisimucisya msimu wa AMBUJE ŵalongolele Samusoni mwamacili, nipo jwalakwe ŵapite ku Ashikeloni, kuŵajile kwawulaga acalume makumi gatatu, ŵawusile yakuwala yamaluŵa, ni kuja kukuyipeleka kwa acalume ŵiŵagopolele citaguwo. Panyuma pa yeleyi, ŵawujile kumangwakwe, ali apile mtima kwakogoya pa yiyatendeceyo.

²⁰ Nipo juŵajimilile ulombela wakwe ni juŵalombele ŵakongwewo.