Ŵakulamula 13 - Chiyawo Bible

Kupagwa kwa Samusoni

¹ Aisalaeli ŵatesile soni ulemwa* kwa AMBUJE, nipo jwalakwe ŵakundile Afilisiti kwalamulila Aisalaeli kwa yaka makumi mcece.

² Pa jele ndaŵijo ŵapali mundu jwine lina lyakwe Manowa jwa ku msinda wa Sola. Jwalakwe ŵaliji jwa lukosyo lwa Dani. Ŵamkwakwe ŵaliji jwangaŵeleka.

³ Lilayika lya AMBUJE lyamwonecele ni kumsalila kuti, “M'mwejo nginimŵeleceje citandilile, nambo pangakaŵa timcikola cilu nipo timciŵeleka mwanace jwamlume.

⁴ Mlolecesye kuti mkamwa finyo kapena ukana, kapena kulya cakulya cilicose cigakukana malamusi ga Mlungu,

⁵ nipo pitacipagwa mwanagwenu mkasimlogwa kumsenga umbo syakwe, ligongo kutandila lisiku lyakupagwa kwakwe mcandajo taciŵa mnasili kwa Mlungu. Jwalakwe tacipanganya masengo gakwakulupusya Aisalaeli kwa Afilisiti.”

⁶ Kaneko jwamkongwejo ŵajile kukwasalila ŵamkwakwe kuti, “Mundu jwa Mlungu ambonecele, nipo kuwoneka kwakwe kwakogoya mpela malayika ga Mlungu. Une nganinimwusya kuŵatyocele, soni nginasalila lina lyakwe.

⁷ Nambo yiŵasalile ni yakuti une tingole cilu ni kuŵeleka mwanace jwamlume. Ŵasalile kuti ngamwa finyo jwa mtundu uliwose kapena ukana kapena kulya cakulya cigakukana malamusi ga Mlungu, ligongo mcandajo taciŵa kwa Mlungu mnasili mu umi wakwe wosope.”

⁸ Kaneko Manowa ŵapopesile kwa AMBUJE kuti, “Conde, AMBUJE, amkunde mundu jwa Mlungu juŵamtumisye jula ayice soni kuti atusalile uwe yakuŵajilwa kumtendela mwanacejo pitacipagwa.”

⁹ Papopo Mlungu ŵatesile yiŵamŵendile Manowa, nipo lilayika lyakwe lyayice soni kwa jwamkongwejo piŵaliji ali kumigunda. Manowa nginaŵa nawo ŵamkwawo,

¹⁰ ni ŵawutwice ndaŵi jijojo kukwasalila ŵamkwawo kuti, “Wawo, mundu juŵambicile lisiku line jula ambonecele soni.”

¹¹ Manowa ŵajimwice ni kwakuya ŵamkwawo. Ŵajawile kwa mundu jula ni kumwusya kuti, “Ana ni wawojo ŵiŵaŵecetaga kwa ŵamkwangu?” Jwalakwe ŵajitice kuti, “Elo.”

¹² Kaneko Manowa ŵawusisye, “Mwanagwetu tatende cici, pitigacitendecekwa maloŵe gawo? Akusosa mwanacejo tatame umi wamti uli?”

¹³ Lilayika lya AMBUJE lyajanjile kuti, “Ŵamkwenu talolecesye kuti tatende yosope yene yinasalile.

¹⁴ Ngakuŵajilwa kulya cilicose ca mbeju ja mpeleya, ngakuŵajilwa kumwa finyo kapena ukana, kapena kulya cakulya cigakukana malamusi ga Mlungu. Basi akuŵajilwa kutenda yosope yene yinasalile.”

^15-16 Pakuŵa Manowa nginamanyilila kuti lyaliji lilayika lya AMBUJE, ŵaliŵendile kuti, “Conde atujembeceye akasajawula. Tukusosa kuti twalinganyicisye nyama ja mbusi alye.” Nambo lilayikalyo lyatite kuti, “Naga ngutama, ngindya yakulya yenu. Nambo naga mkusosa kuteleka, mtende jakutinisya mpela mkupeleka mbopesi ja kwa AMBUJE.”

¹⁷ Manowa ŵajanjile kuti, “Atusalile lina lyawo, kuti pitigacitendeka maloŵe gawo uwe citwacimbicisye wawojo.”

¹⁸ Lilayikalyo lyawusisye kuti, “Ligongo cici mkusosa kumanyilila lina lyangu? Lina lyangutu liŵele lyakusimonjesya.”

¹⁹ Papopo Manowa ŵajigele mwanace jwa mbusi ni utandi, kwawula nayo pa liganga liŵalisandwisye malo gakupelecela yinduyo mbopesi kwa AMBUJE ŵakusatenda yakusimonjesya.

^20-21 Lilamba lya moto pilyakolelaga pa malopo, Manowa ni ŵamkwakwe ŵala ŵagambile kuliwona lilayika lya AMBUJE lila lili mkwinjila mwilamba mula ulendo kwinani. Kaneko Manowa ŵamanyilile kuti mundujo ŵaliji lilayika lya AMBUJE, nipo jwalakwe pamo ni ŵamkwakwe ŵajinamile pasi. Nginaliwona soni lilayika lila.

²² Manowa ŵatite kwa ŵamkwakwe, “Uwetu cituwe, ligongo tum'weni Mlungu!”

²³ Nambo ŵamkwakwewo ŵajanjile kuti, “Naga akasose AMBUJE kutuwulaga, ngamkanapocela mbopesi syetu, ngamkanatulosya yosope yeneyi kapena kutusalila yele yinduyi sambano jino.”

²⁴ Jwamkongwejo ŵaŵelece mwanace jwamlume ni ŵampele lina lyakuti Samusoni. Mwanace ŵakusile cenene nipo AMBUJE ŵampele upile.

²⁵ Msimu wa AMBUJE watandite kumlongolela piŵatamaga ku cigono ca Dani pasikati pa Sola ni Eshitawoli.