Ŵakulamula 11 - Chiyawo Bible

¹ Yefita ŵaliji msilikali jwakulimba mtima kutyocela ku Giliyadi, mamagwe ŵaliji jwamkongwe jwakuwutukawutuka nipo babagwe ŵaliji Giliyadi

² Yefita babagwe Giliyadi ŵakwete ŵanace ŵane kwa ŵamkwakwe. Piŵakusile ŵanacewo, ŵamtopwesye Yefita pa mlangopo. Jemanjajo ŵamsalile kuti, “Ngatukusosa kuti m'mwejo timpate cilicose mwa cipanje ca baba ŵetu, ligongo m'mwejo mama ŵenu ŵane.”

³ Yefita ŵatisile acakulugwe ŵala kuja kutama ku cilambo ca Tobu. Kweleko jwalakwe ŵanonyelene ni likuga lya ŵandu ŵangali mate ŵiŵajendaga nawo.

⁴ Panyuma pakwe Aamoni ŵajile kukumenyana ni Aisalaeli.

⁵ Piyatendece yeleyi, acakulungwa ŵa ku Giliyadi ŵajile kukumjigala soni Yefita kutyocela ku cilambo ca Tobu.

⁶ Jemanjajo ŵatite, “Myice mtulongolele kuti tukapute Aamoni.”

⁷ Nambo Yefita ŵajanjile kuti, “Jemanja ŵambenjile une mnope, mpaka ŵandopwele ku nyumba ja baba ŵangu. Sambano akwicila cici kwa une pa yipwetesi?”

⁸ Jemanjajo ŵamjanjile Yefita kuti, “Kuyika kwetu kwa wawojo ngaŵa cine nambo kuti, tukusosa tulonganeje ni wawojo akapute Aamoni ni kuti akalamulile ŵandu ŵa ku Giliyadi.”

⁹ Nipo Yefita ŵatite kwa jemanjajo, “Naga akunjigala soni kumusi kukumenyana ni Aamoni nipo AMBUJE* naga akumbundisya une, tinjalamulila.”

¹⁰ Jemanjajo ŵajanjile kuti, “Tukwiticisya. AMBUJE ni mboni jetu.”

¹¹ Ni Yefita ŵapite ni acakulungwa ŵa ku Giliyadi, nipo ŵandu ŵala ŵamtesile kuŵa jwakwalamulila ni jwakwalongolela. Nipo Yefita ŵaŵecete maloŵe gakwe pameso pa AMBUJE ku Misipa.

¹² Kaneko Yefita ŵatumisye ŵamitenga kwa mwenye jwa Aamoni kukumwusya jwalakwejo kuti, “Kusyesyene cimkukangana ni uwe ni cici? Ligongo cici myice kusosa kumenyana ni cilambo cetu?”

¹³ Mwenye jwa Aamoni ŵajanjile ŵamitenga ŵa Yefita kuti, “Piŵakopwece Aisalaeli mu Iguputo, ŵasumwile cilambo cangu kutyocela ku Lusulo lwa Alinoni kuja kwika ku Lusulo lwa Yaboki ni Lusulo lwa Yolodani. Nipo sambano jemanja mwucisye mwa mtendele.”

¹⁴ Myoyo Yefita ŵatumisye kaŵili ŵamitenga ŵala kwa mwenye jwa Aamoni

¹⁵ pakwajanga kuti, “Ngaŵa yakuwona kuti Aisalaeli ŵasumwile cilambo ca Mowabu kapena ca Aamoni.

¹⁶ Yiyatendece yaliji yamti kuti: Aisalaeli piŵatyosile ku Iguputo, ŵajesile kupitila ku cipululu mpaka ku Nyasa Jecejewu* ni kuja kwika ku Kadeshi.

¹⁷ Kaneko Aisalaeli ŵatumisye ŵamitenga kwa mwenye jwa ku Edomu kukumŵenda kuti ŵakunde apitile mcilambo mwakwe pa ulendo wawo. Nambo mwenye jwa ku Edomu nganiŵakunda. Jemanjajo ŵamŵendile soni mwenye jwa ku Mowabu, nambo nombe najo nganiŵakunda kuti apitile mcilambo mwakwe. Ni Aisalaeli ŵatemi ku Kadeshi.

¹⁸ Kaneko jemanjajo ŵapitile mcipululu, ŵajesile kusyungulila cilambo ca Edomu ni cilambo ca Mowabu mpaka ŵajile kwika ku mbali ja kungopoko lyuŵa ja Mowabu, pesi pa lisi lya Lusulo lwa Alinoni. Aisalaeli ŵataŵile matenti ga cigono pelepo, nambo nginajomboka kose Alinoni pakuŵa lwatesile malile ga Mowabu.

¹⁹ Kaneko Aisalaeli ŵatumisye ŵamitenga kwa Sihoni, mwenye jwa Aamoli jwa ku Heshiboni, nipo ŵamŵendile kuti ŵakunde apitile mcilambo mwakwe pakwawula ku cilambo ca kumangwawo.

²⁰ Nambo Sihoni nganiŵakunda Aisalaeli kupitilamo. M'malo mwakwe ŵasonganyisye asilikali ŵakwe wosope ŵene pamo, ni kutaŵa matenti ga cigono ku Yahasi, ni kuja kukwatanda Aisalaeli.

²¹ Nambo AMBUJE, Mlungu jwa Aisalaeli, ŵapundisye Aisalaeli pakumpunda Sihoni ni ŵa ngondo ŵakwe. Ni Aisalaeli ŵajigele dela josope ja Aamoli ŵiŵatamaga mcilambomo.

²² Jemanjajo ŵatemi dela josope ja Aamoli kutyocela ku Alinoni kum'mwela mpaka ku Yaboki kumpoto nipo kutyocela ku cipululu kungopoko lyuŵa mpaka ku Lusulo lwa Yolodani kungapilo lyuŵa.

²³ Myoyo ŵaliji AMBUJE, Mlungu jwa Aisalaeli, ŵiŵatopwesye Aamoli ligongo lya ŵandu ŵakwe, Aisalaeli.

²⁴ Ana akusosa awanicisye kucijigala cilamboco soni? Jemanja akukomboleka kusunga cilicose ciŵapele mlungu jwawo Kemoshi. Nambo soni uwe tucisunga cilicose catupele, AMBUJE, Mlungu jwetu.

²⁵ Ana jemanja akuganisya kuti ali ŵakumpunda Balaki mwanace jwa Sipola, mwenye jwa ku Mowabu? Ana mpela ŵakanganile ni uwe? Ana mpela ŵamenyene ni uwe?

²⁶ Aisalaeli aŵele mkutama m'misinda ja Heshiboni ni Aloeli, ni m'matawuni gakujisyungulila kwa yaka 300, pamo ni misinda ja mungulugulu mwa Lusulo lwa Alinoni. Uli nginajigalaga soni naga jaliji jawo mu jele ndaŵi josopeji?

²⁷ Iyayi, une nganinalemwecesya wawojo kose. Nambo wawojo ni ŵakulemwa ligongo akusosa kutenda ngondo ni une. AMBUJE ni ŵakulamula. Talamule lelo pasikati pa Aisalaeli ni Aamoni.”

²⁸ Nambo mwenye jwa Aamoni nginagapikanila maloŵe giŵamtumicisye Yefita.

²⁹ Kaneko msimu wa AMBUJE wamlongolele Yefita. Jwalakwe ŵapite ku Giliyadi ni Manase kukwatanda asilikali ŵa ngondo ni ŵawujile ku Misipa mu Giliyadi nipo ŵajile kwa Aamoni.

³⁰ Yefita ŵatesile cilanga* kwa AMBUJE kuti: “Naga tambundisye pakwapunda Aamoni,

³¹ tinjipeleka mpela mbopesi jakutinisya mundu jutacitanda kukopoka m'nyumba mwangu kwisa kukunjingamila une, pakutyocela kungondo jimbundilejo. Tinjimpeleka kwa wawojo jwele mundujo mpela mbopesi.”

³² Yefita ŵajombwece lusulo kuja kukwaputa Aamoni, nipo AMBUJE ŵampundisye.

³³ Jwalakwe ŵaputile jemanjajo kutyocela ku Aliyeli mpaka ku dela jakusyungulila Miniti, josope jene pamo misinda makumi gaŵili, ni mpaka ku Abele Kelamimu. Ŵawulajidwe kwakogoya kwamti Aisalaeli ŵapundile Aamoni.

Mwanace jwamkongwe jwa Yefita

³⁴ Yefita piŵawujilaga kumusi ku Misipa, mwanagwe jwamkongwe ni juŵaliji jwandanda kopoka pakwacingamila, ali mkuŵina ni gomba mcekece. Mwanagwe ŵaliji jumo pejo basi.

³⁵ Piŵagambile kumwona, ŵapapwile yakuwala yakwe mwacanasa ni ŵatite, “Ha! Mwanangu! M'mwe mkasile mtima wangu! Ligongo cici yili myoyo kuti ni m'mwejo ŵimkumbwetekasya une? Une ndesile kala cilanga kwa AMBUJE, ni ngaŵa mkomboleka soni kucenga!”

³⁶ Mwanacejo ŵatite kuti, “Naga atesile kala cilanga kwa AMBUJE, atende yalangeneyo kuti ayitende kwa une, pakuŵa AMBUJE ŵakamwisye wawojo kwawucisya amagongo ŵawo Aamoni.”

³⁷ Nambo ŵaŵendile baba wakwe kuti, “Andendele cindu cimope basi. Ambe miesi jiŵilipe basi, kuti njawule ngajendejende ni acimjangu m'matumbi ngalililile jika kuti nguŵajilwa kuwa ndili mwali.”

³⁸ Babagwe ŵamkundile kwawula kwa miesi jiŵilipe. Jwalakwe ni acimjakwe ŵakwesile m'matumbi kukulila ligongo ŵaliji jwamti tawe ali jwangalombedwa soni jwangali mwanace.

³⁹ Pijamasile miesi jiŵili ŵawujile kwa babagwe. Babagwewo ŵatesile mpela mwa cilanga kwa AMBUJE, nipo ŵawile ali mwali. Aji jaliji ndande ja msyungu wa mu Isalaeli

⁴⁰ kuti, ŵanace ŵa acakongwe ŵa Aisalaeli akusajawulaga kwa masiku mcece caka cilicose kuja kukumlilila mwanace jwamkongwe jwa Yefita jwa ku Giliyadi.