Ŵakulamula 10 - Chiyawo Bible

Tola

¹ Piŵawile Abimeleki, Tola, mwanace jwamlume jwa Puwa soni cisukulu ca Dodo, ni juŵakulupwisye Aisalaeli. Jwalakwe ŵaliji jwa lukosyo lwa Isakala nipo ŵatamaga ku Shamilu mcilambo ca kwitumbi ca Efelemu.

² Jwalakwe ŵaliji mlongola jwa Aisalaeli kwa yaka 23. Piŵawile ŵamsicile ku Shamilu.

Yaili

³ Piŵawile Tola, Yaili jwa ku Giliyadi ni juŵalongolele Aisalaeli kwa yaka 22.

⁴ Jwalakwe ŵakwete ŵanace makumi gatatu ŵacalume ŵiŵakwelaga acibulu makumi gatatu. Ŵakwete misinda makumi gatatu mcilambo ca Giliyadi, jijikukolanjidwa kuti misi ja Yaili mpaka lelo.

⁵ Piŵawile Yaili ŵamsicile ku Kamoni.

Yefita

⁶ Aisalaeli ŵatesile soni ulemwa* kwa Mlungu pakwalambila Baala* ni Ashitoleti Kanaimu, kupwatika soni milungu ja Asiliya, ja Asidoni, ja Amowabu, ja Aamoni, ni ja Afilisiti. Jemanjajo ŵalesile kwapikanila AMBUJE* ni kuleka kwalambila.

⁷ Myoyo AMBUJE ŵatumbilile Aisalaeli, pakwakunda Afilisiti ni Aamoni kuti ŵapunde jemanjajo.

⁸ Kwa yaka 18 mitundu jiŵiliji jalamulile Aisalaeli wosope ŵiŵatamaga mcilambo ca Aamoli ca Giliyadi kungopoko lyuŵa kwa Lusulo lwa Yolodani mwakupweteka, mwa ngalwe, ni yisawusyo.

⁹ Aamoni ŵayikene mwakomboka Yolodani kuja kukusiputa ngosyo sya Yuda, Benjamini, ni Efelemu. Aisalaeli ŵalasile kwakogoya.

¹⁰ Kaneko Aisalaeli ŵalisile kwa AMBUJE acitiji, “Uwe twalemwecesye wawojo, nganitwapikanila wawojo Mlungu jwetu, nipo twalambile Baala.”

¹¹ AMBUJE ŵajanjile kuti: “Aiguputo, Aamoli, Aamoni, Afilisiti,

¹² Asidoni, Aamaleki, ni Aamoni ŵamlamwile mwakupweteka ni mwa ngalwe munyumamu, ni mwandilile une. Ana nganinimkulupusya kwa jemanjajo?

¹³ Nambope mwandesile une ni kutanda kujilambila milungu jine, nipo une nginimkulupusya soni.

¹⁴ Jawulagani mkajililileje milungu jimjisagwilejo. Jelejo ni jitijimkulupusyeje pitimŵeje mu yakusawusya.”

¹⁵ Nambo Aisalaeli ŵatite kwa AMBUJE, “Uwe tutesile ulemwa. Atende yiliyose yitayisose kwa uwe nambo conde atukulupusye kwa Aamoli lelo.”

¹⁶ Ni ŵajityosisye milungu jawo ja cilendojo ni kwalambila AMBUJE, nipo jwalakwe payice pakumtesya canasa ligongo lya yisawusyo yiŵasimene nayo Aisalaeli.

¹⁷ Kaneko asilikali ŵa Aamoni ŵaliŵicile cile kutenda ngondo ni ŵataŵile matenti ga cigono m'Giliyadi. Ŵandu ŵa ku Isalaeli ŵayice ni kusongana pamo acitaŵaga matenti ga cigono ku Misipa ku Giliyadi.

¹⁸ Kweleko ŵandu ni ŵakulongolela ŵa mitundu ja Aisalaeli ŵawusyanaga kuti, “Ana ŵani ŵitalongolele kuja kukwatanda Aamoni? Jutalongolelejo taciŵa jwakulamulila jwetu jwa ku Giliyadi.”