Ŵakulamula 1 - Chiyawo Bible

Ngosyo sya Yuda pamo ni Simiyoni sikumkamula Adonibeseki

¹ Piŵawile Yoswa ŵandu ŵa ku Isalaeli ŵawusisye AMBUJE* kuti, “Ana ŵani sikati ja uweji ŵitatande kwawula kuja kukumenyana ni ŵandu ŵa ku Kenani?”

² AMBUJE ŵajanjile kuti, “Lukosyo lwa Yuda tilucitanda kwawula. Une napele jemanjajo cilamboco myala mwawo.”

³ Ŵandu ŵa ku Isalaeli ŵajile kwa acalongo acimjawo wa lukosyo lwa Simiyoni, nipo ŵasalile jemanjajo kuti, “Kwende tujawule yalumo ku cilambo cicapelecedwe kwa uwe, kuti tukamenyane nawo Akenani. Kaneko tucijawula ni jemanja ku cilambo cicapelecedwe kwa jemanja.” Myoyo ngosyo sya Simiyoni

⁴ ni Yuda syajile yalumo ku ngondo. AMBUJE ŵapundisye pakwapunda Akenani ni Apelesi, nipo ŵapundile acalume 10,000 ku Beseki.

⁵ Ku Beseki ŵamsimene Adonibeseki ni kumenyana najo.

⁶ Jwalakwe ŵatisile, nambo ŵamtopwesye, ni ŵamkamwile, ni ŵamkatile yala ya yikongo ni yala yekulungwa ya sajo syakwe.

⁷ Adonibeseki ŵatite kuti, “Ayimwene 70 ŵakatidwe yikongo yawo ni yala yayikulungwa ya ku sajo syawo ŵalokotaga nyenyeswa pasi pa tebulo jangu. Mlungu sambano atesile kwa une yinatendele jemanjajo.” Myoyo asilikali ŵa ku Yuda ŵajigele Mwenye Adonibeseki kwawula nawo ku Yelusalemu, kuŵajile kuwila.

Lukosyo lwa Yuda lukujipunda misinda ja Yelusalemu ni Hebuloni

⁸ Acalume ŵa ku Yuda ŵaputile ngondo ni msinda wa Yelusalemu nipo ŵawusumwile. Ŵawuleje ŵandu ŵakwe ni kuwupamba moto msindawo.

⁹ Panyuma pa yeleyi ŵapitilisye kwawula kukumenyana ni Akenani ŵiŵatamaga ku cilambo ca ku matumbi, ku Negebu kum'mwela kwiŵanda kwa matumbi.

¹⁰ Ŵapite kukwatanda Akenani ŵakutama mu msinda wa Hebuloni, uwakolanjidwaga Kiliyati Alaba. Kweleko ŵajipundile mitundu ja Sheshayi, Ahimani, ni Talimai.

Otiniyele akuwupunda msinda wa Dibili

¹¹ Kutyocela kweleko acalume ŵa ku Yuda ŵapite kuja kukuwutanda msinda wa Dibili, pa jele ndaŵijo wakolanjidwaga kuti Kiliyati Sefala.

¹² Jumo jwa jemanjajo, lina lyakwe Kalebu, ŵatite, “Tinjimpa mwanangu jwamkongwe, jwele lina lyakwe Akisa kuti alombele mundu jutapunde pakusumula msinda wa Kiliyati Sefala.”

¹³ Otiniyele, mwanace jwamlume jwa Kenasi mpwakwe Kalebu, ŵawusumwile msindawo, ni Kalebu ŵampele mwanagwe jwamkongwe Akisa kuti alombele.

¹⁴ Pa lisiku lya ulombela Otiniyele ŵacisisye ŵamkwawowo kuti ŵaŵende baba ŵawo mgunda. Jwamkongwejo ŵatulwice pa bulu jakwe, nipo Kalebu ŵamwusisye jwalakwe ciŵasakaga.

¹⁵ Jwalakwe ŵajanjile kuti, “Ngusaka nduluko sya mesi. Malo gambele une gali cilambo cejumu.” Nipo Kalebu ŵampele jwalakwe nduluko sya mesi sya kumkuli ni sya kwiŵanda.

Kupunda pa ngondo kwa lukosyo lwa Yuda ni lukosyo lwa Benjamini

¹⁶ Ŵandu ŵa mtundu wa Akeni ŵaliji yisukulu ya akwegwe ŵawo ŵalume ŵa Mose.* Jemanjaji ŵajile ni ŵandu ŵa ku Yuda kutyocela ku Yeliko, msinda wa yitela ya migwalangwa, kuja kwinjila mcipululu ca Yuda kum'mwela kwa Aladi. Kweleko jemanjajo ŵatemi pasikati pa Aamaleki.

¹⁷ Ŵandu ŵa ku Yuda ni ŵandu ŵa lukosyo lwa Simiyoni yalumo, ŵajile kukwapunda pa ngondo ŵandu ŵa ku Kenani pamo ŵandu ŵiŵatemi mu msinda wa Sefati. Ŵawulwesile msindawo, kuwujonanga, ni ŵawupele lina lyakuti Holoma.

^18-19 AMBUJE ŵakamucisye ŵandu ŵa ku Yuda, nipo ŵajigele cilambo ca kwitumbi kuŵa cawo. Nambo nganasumula misinda ja Gasa, Ashikeloni, kapena Ekiloni, ni madela gakwe gakusyungulila. Ŵandu ŵele ŵiŵatamaga mwilamboŵa ŵakwete mageleta ga yisyano ya ayiloni, nipo ŵandu ŵa ku Yuda nginapakombola kwatoposya jemanjajo.

²⁰ Mpela muŵalamulile Mose, msinda wa Hebuloni wapelecedwe kwa Kalebu, juŵajitopwesye mitundu jitatu mu msindamo jijaliji yisukulu ya Aanaki.

²¹ Nambo ŵandu ŵa lukosyo lwa Benjamini nginiŵatoposya Ayebusi ŵiŵatamaga mu Yelusalemu, nipo Ayebusi aŵele mkutama kweleko ni ŵandu ŵa lukosyo lwa Benjamini kutandila kalakala.

Ngosyo sya Efelemu ni Manase sikuwupunda msinda wa Beteli

^22-23 Ngosyo sya Efelemu ni Manase syajile kukuwutanda msinda wa Beteli, pa jele ndaŵijo wakolanjidwaga kuti Lusi. AMBUJE ŵakamwisye jemanjajo. Ŵatumisye ŵakusonda mwa asili ku msindako,

²⁴ ŵakusonda mwa asiliwo ŵam'weni mundu jwamlume ali mkutyocela mu msindamo ni ŵamwusisye jwalakwejo kuti, “Mtulosye uwe winjile wakwe wa mu msindamu, nipo ngitumwulasya.”

²⁵ Myoyo jwalakwejo ŵalosisye, nipo ŵandu ŵa ngosyo sya Efelemu ni Manase ŵamwuleje jwalijose mu msindamo, kutyosyapo aju mundu peju ni liŵasa lyakwe.

²⁶ Panyuma pakwe mundujo ŵajile ku cilambo ca Ahiti, ŵataŵile msinda kweleko, ni kuwukolanga lina lyakuti Lusi, lyele lili lina lyakwe mpaka lelo.

Ŵandu ŵimkinatopoledwa ni Aisalaeli

²⁷ Lukosyo lwa Manase nginiŵatoposya ŵandu ŵakutama m'misinda ja Beti Shani, Tanaki, Doli, Ibuleyamu, Megido, ni matawuni gakuŵandicila, Akenani ŵapitilisye kutamape mwelemo.

²⁸ Aisalaeli piŵaŵele ŵamacili, ŵakanganicisyaga Akenani kuti ŵakamulileje masengo jemanjajo, nambope nganiŵatoposya wosope ŵene.

²⁹ Lukosyo lwa Efelemu nginiŵatoposya Akenani ŵiŵatamaga mu msinda wa Gesele, ni myoyo Akenani ŵapitilisye kutama mwelemo ni jemanjajo.

³⁰ Lukosyo lwa Sebuloni nginiŵatoposya ŵandu ŵiŵatamaga m'misinda ja Kitiloni, ni Nahalali, ni myoyo Akenani ŵapitilisye kutama ni jemanjajo nipo ŵakanganicisye kuti ŵakamulileje masengo gawo.

³¹ Lukosyo lwa Asha nginiŵatoposya ŵandu ŵiŵatamaga m'misinda ja Ako, Sidoni, Ahilabu, Akisibi, Heliba, Afiki, ni Lehobu.

³² Ŵandu ŵa lukosyo lwa Asha ŵatemi ni acimsyene ŵa cilamboco Akenani, pakuŵa nganiŵatoposya kose.

³³ Lukosyo lwa Nafutali nginiŵatoposya ŵandu ŵiŵatamaga m'misinda ja Beti Shemeshi ni Beti Anati. Ŵandu ŵa lukosyo lwa Nafutali ŵatemi ni acimsyene ŵa cilamboco, nambo Akenani ŵakanganicisyaga kuti ŵakamulileje masengo gawo.

³⁴ Aamoli ŵakanganicisyaga ŵandu ŵa lukosyo lwa Dani kuti atame ku malo ga kwitumbi nipo nganiŵakunda kuti ayice kutulucila kwilambo.

³⁵ Aamoli ŵapitilisye kutama ku Aiyaloni, Shalibimu, ni Litumbi lya Helesi, nambo ngosyo sya Efelemu ni Manase syalamulilaga jemanjajo ni kwakanganicisya kuti ŵakamulileje masengo.

³⁶ Kumpoto kwa Sela, malile ga Aedomu gakwendelecela mpaka ku kumkuli kupitila pa Mpata wa Akilabimu.